ಯಾತ್ರೆಗೆ ಇನ್ನು ನೋಂದಣಿ ಕಡ್ಡಾಯ

ನವದೆಹಲಿ: ಎರಡು ವರ್ಷಗಳ ಹಿಂದೆ ಪ್ರವಾಹ ಪರಿಸ್ಥಿತಿಗೆ ತುತ್ತಾಗಿದ್ದ ಉತ್ತರಾಖಂಡದಲ್ಲಿ ಹಲವು ಮುನ್ನೆಚ್ಚರಿಕಾ ಕ್ರಮಗಳನ್ನು ಕೈಗೊಳ್ಳಲಾಗುತ್ತಿದೆ. ಕೇದಾರನಾಥ ಮತ್ತು ಇತರ ಯಾತ್ರಾ ಸ್ಥಳಗಳಲ್ಲಿ ಯಾತ್ರಾರ್ಥಿಗಳ ನೋಂದಣಿ ವ್ಯವಸ್ಥೆ ಕಡ್ಡಾಯಗೊಳಿಸಲಾಗಿದೆ. 

ಎಲ್ಲದಕ್ಕಿಂತ ಪ್ರಮುಖ ಅಂಶವೆಂದರೆ ಪ್ರತಿ ದಿನ ನಿಗದಿತ ಸಂಖ್ಯೆಯ ಯಾತ್ರಾರ್ಥಿಗಳನ್ನೇ ಅಲ್ಲಿಗೆ ತೆರಳುವಂತೆ ಮಾಡಲಾಗುತ್ತದೆ ಎಂದು ಉತ್ತರಾಖಂಡ ಸರ್ಕಾರ ತಿಳಿಸಿದೆ.

ಸೋನ ಪ್ರಯಾಗದಿಂದ ಆರಂಭವಾಗುವ ಯಾತ್ರೆಯಿಂದಲೇ ಈ ನಿಯಮ ಜಾರಿಯಾಗುತ್ತದೆ. ಜತೆಗೆ ಯಾತ್ರಿಗಳಿಗೆ ಕಡ್ಡಾಯವಾಗಿ ವೈದ್ಯಕೀಯ ಪರೀಕ್ಷೆ ನಡೆಸಲೂ ತೀರ್ಮಾನಿಸಲಾಗಿದೆ ಎಂದು ಸರ್ಕಾರದ ಪ್ರಧಾನ ಕಾರ್ಯದರ್ಶಿ ರಾಕೇಶ್ ಶರ್ಮಾ ತಿಳಿಸಿದ್ದಾರೆ. ಈ ನಿಯಮಗಳ ಜತೆಗೆ ಬಯೋಮೆಟ್ರಿಕ್ ಮೂಲಕವೂ ಯಾತ್ರಿಗಳ ನೋಂದಣಿ ಮಾಡಲಾಗುತ್ತದೆ. ಜತೆಗೆ ಅವರು ಗುಡ್ಡಗಾಡು ಪ್ರದೇಶದಲ್ಲಿ ತೆರಳಲು ಉಪಯೋಗಿಸುವ ಕುದುರೆ, ಕತ್ತೆಗಳಿಗೂ ಈ ನಿಯಮ ಅನ್ವಯ ಮಾಡಲಾಗಿದೆ.

2013ರ ದುರಂತ ಆರಂಭವಾದ ಚಾರೋಬಾರಿ ಸರೋವರ ಸಮೀಪ 3 ಹಂತದ ರಕ್ಷಣಾ ವ್ಯವಸ್ಥೆ ಕೈಗೊಳ್ಳಲಾಗಿದೆ. ಜತೆಗೆ ಭಾರಿ ಗಾತ್ರದ ಬಂಡೆಗಳು ಉರುಳಿ ಬೀಳದಂತೆ ಬಲೆ ನಿರ್ಮೀಸಲಾಗುತ್ತಿದೆ ಎಂದು ಶರ್ಮಾ ತಿಳಿಸಿದ್ದಾರೆ. 

ರಂಬಾರ ಎಂಬಲ್ಲಿಂದ ಕೇದಾರನಾಥಕ್ಕೆ ಹೊಸ ದಾರಿಗಳನ್ನು ಗುರುತಿಸಲಾಗಿದೆ. 9 ಕಿಮೀ ದೂರದ ಹೊಸ ದಾರಿಯಿಂದಾಗಿ ಪರಿಹಾರ ಮತ್ತು ರಕ್ಷಣಾ ಕಾರ್ಯಗಳ ಸಂದರ್ಭದಲ್ಲಿ ಅದನ್ನು ಬಳಸಲು ಸಾಧ್ಯವಾಗುವಂತೆ ಮಾಡಲಾಗುತ್ತದೆ. ಕೇದಾರನಾಥ ಒಂದರಲ್ಲೇ ಸಂಭಾವ್ಯ ರಕ್ಷಣೆ ಮತ್ತು ಪರಿಹಾರ ಕಾಮಗಾರಿಗಳಿಗಾಗಿ 6 ಹೆಲಿಪ್ಯಾಡ್ ಗಳನ್ನು ನಿರ್ಮಿಸಲಾಗಿದೆ. ನೆಹರೂ ಇನ್ಸ್ಟಿಟ್ಯೂಟ್ ಆಫ್ ಮೌಂಟನಿಯರಿಂಗ್ ಸಂಸ್ಥೆಗೆ ಹೆಚ್ಚಿನ ದುರಸ್ತಿ ಮತ್ತು ಆಧುನೀಕರಣ ಮಾಡುವ ಹೊಣೆ ನೀಡಲಾಗಿದೆ ಎಂದು ಅವರು ತಿಳಿಸಿದ್ದಾರೆ.