ಮಹದ್ ಸೇತುವೆ ಕುಸಿತ: ನದಿಯಲ್ಲಿ ಮುಳುಗಿದ್ದ ಎಸ್ ಯುವಿ ಅವಶೇಷ ಪತ್ತೆ

ಮುಂಬೈ: 11 ನೇ ದಿನದ ಶೋಧ ಕಾರ್ಯಾಚರಣೆಯಲ್ಲಿ ಮಹದ್ ನ ಸಾವಿತ್ರಿ ನದಿಯ ಸೇತುವೆ ಕುಸಿದ ಪರಿಣಾಮ ಮುಳುಗಿ ಹೋಗಿದ್ದ ಎಸ್ ಯುವಿ ಹಾಗೂ ಎರಡು ಮೃತ ದೇಹಗಳು ಪತ್ತೆಯಾಗಿವೆ.

ಆಗಸ್ಟ್.2 ರಂದು ಸಾವಿತ್ರಿ ನದಿಯ ಸೇತುವೆ ಕುಸಿದು ಬಿದ್ದ ಪರಿಣಾಮ ಒಂದು ಬಸ್ ಹಾಗೂ ಎಸ್ ಯುವಿ ನೀರಿನಲ್ಲಿ ಮುಳುಗಿತ್ತು. ಆಗಸ್ಟ್ 11 ರಂದು ಬಸ್ ಪತ್ತೆಯಾಗಿತ್ತು. ಈ ಬೆನ್ನಲ್ಲೇ ಎಸ್ ಯುವಿ ಸಹ ಪತ್ತೆಯಾಗಿದ್ದು ಇಬ್ಬರ ಶವವೂ ಪತ್ತೆಯಾಗಿದೆ. ಪತ್ತೆಯಾಗಿರುವ ಎಸ್ ಯು ವಿ ಹಾಗೂ ಶವಗಳನ್ನು ಮೇಲೆತ್ತುವ ಪ್ರಯತ್ನ ನಡೆಯುತ್ತಿದ್ದು, ರಾಜ್ಯ ವಿಪತ್ತು ನಿರ್ವಹಣಾ ತಂಡ ಕಾರ್ಯಾಚರಣೆಯಲ್ಲಿ ತೊಡಗಿದೆ.

ಈ ಬಗ್ಗೆ ರಕ್ಷಣಾ ಇಲಾಖೆಯ ಪಿಆರ್ ಒ ಮಾಧ್ಯಮಗಳಿಗೆ ಮಾಹಿತಿ ನೀಡಿದ್ದು, ಭಗ್ನಾವಶೇಷಗಳನ್ನು ಶೀಘ್ರವೇ ಹೊರತೆಗೆಯಲಾಗುತ್ತದೆ ಎಂದು ಹೇಳಿದ್ದಾರೆ. ಎಸ್ ಯುವಿ ಯಾ ಭಗ್ನಾವಶೇಷಗಳು ಕುಸಿದ ಸೇತುವೆಯಿಂದ 300 ಮೀಟರ್ ಗಳಷ್ಟು ದೂರದಲ್ಲಿ ಪತ್ತೆಯಾಗಿದ್ದು ನದಿಯಲ್ಲಿ 4-5 ಮೀಟರ್ ಆಳದಲ್ಲಿ ಪತ್ತೆಯಾಗಿದೆ.