ಮೋದಿ ಯುಎನ್‍ಎಸ್ಸಿ ಕಾರ್ಯತಂತ್ರ ಸರಿಯಿಲ್ಲ: ಸಿನ್ಹಾ

ನವದೆಹಲಿ: ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯಲ್ಲಿ ಕಾಯಂ ಸ್ಥಾನಕ್ಕಾಗಿ ಜಿ4 ರಾಷ್ಟ್ರಗಳ ಬೆಂಬಲ ಪಡೆಯಲು ಪ್ರಧಾನಿ ಮೋದಿ ಮುಂದಾಗಿರುವುದು, ಅವರು ಮಾಡಿದ ಅತಿದೊಡ್ಡ ತಪ್ಪು ಎಂದು  ಮಾಜಿ ವಿದೇಶಾಂಗ ಸಚಿವ ಯಶವಂತ್ ಸಿನ್ಹಾ ಶನಿವಾರ ಅಭಿಪ್ರಾಯಪಟ್ಟಿದ್ದಾರೆ.

ಜಿ4 ರಾಷ್ಟ್ರಗಳ ಶೃಂಗ ಆರಂಭವಾಗುವುದಕ್ಕೂ ಮುನ್ನ ಇಂಡಿಯಾ ಟುಡೇಗೆ ನೀಡಿದ ಸಂದರ್ಶನದಲ್ಲಿ ಮಾತನಾಡಿದ ಸಿನ್ಹಾ, ಜಿ4 ರಾಷ್ಟ್ರಗಳ ಬೆಂಬಲ ಕೋರುವುದು ಯುಪಿಎ ಅವಧಿಯಿಂದಲೂ ನಡೆದುಬಂದಿದೆ. ಅದರ ಬದಲಿಗೆ, ಐಎಸ್‍ಉಗ್ರರ ವಿರುದ್ಧದ ಹೋರಾಟದಂತಹ ಅಂತಾರಾಷ್ಟ್ರೀಯ ರಾಜಕೀಯ ಮತ್ತು ಭದ್ರತಾ ವಿಚಾರಗಳಲ್ಲಿ ಸಕ್ರಿಯ ಪಾತ್ರ ವಹಿಸುವ ಮೂಲಕ ಜಗತ್ತಿನ  ಮನವೊಲಿಸಲು ಮೋದಿ ಪ್ರಯತ್ನಿಸಬಹುದಿತ್ತು ಎಂದಿದ್ದಾರೆ. ಜತೆಗೆ, ಜಿ4 ರಾಷ್ಟ್ರಗಳು ಒಗ್ಗಟ್ಟಾಗಿವೆ ಎಂದು ತೋರಿಸಿಕೊಳ್ಳಲು ಹೋದಷ್ಟೂ ವಿರೋಧಗಳೂ ಹೆಚ್ಚಾಗುತ್ತವೆ ಎಂದೂ ಅವರು ಅಭಿಪ್ರಾಯಪಟ್ಟಿದ್ದಾರೆ.