ಡಾರ್ಜಿಲಿಂಗ್ ನಲ್ಲಿ ಭಾರಿ ಮಳೆಯಿಂದ ಭೂಕುಸಿತ: 20 ಸಾವು

ಸಿಲಿಗುರಿ: ಭೀಕರ ಮಳೆಯಿಂದಾಗಿ ಪಶ್ಚಿಮ ಬಂಗಾಳದ ಡಾರ್ಜಿಲಿಂಗ್ ನಲ್ಲಿ ಭೂಕುಸಿತ ಉಂಟಾಗಿದ್ದು, 20 ಜನ ಸಾವನ್ನಪ್ಪಿದ್ದಾರೆ. ಮಿರಿಕ್ ಮತ್ತು ಕಲಿಂಪೊಂಗ್ ಎಂಬ ಪ್ರದೇಶದಲ್ಲಿ ಭೂಕುಸಿತವಾಗಿ 20ಕ್ಕೂ ಹೆಚ್ಚು ಜನರು ಮೃತಪಟ್ಟಿದ್ದಾರೆ ಎಂದು ಅಲ್ಲಿನ ಸ್ಥಳಿಯ ಮಾಧ್ಯಮಗಳು ವರದಿ ಮಾಡಿದೆ.

ಮಹೇಂದ್ರ ಗೌನ್ ಎಂಬ ಪ್ರದೇಶದಲ್ಲಿ ಮೂವರು, ಮಿರಿಕ್ ನಲ್ಲಿ ಇಬ್ಬರು ಹಾಗೂ ಲಿಂಬು ಗೌನ್ ನಲ್ಲಿ 14 ಮಂದಿ ಸಾವನ್ನಪ್ಪಿದ್ದಾರೆ. ಘಟನೆಯಲ್ಲಿ 9ನೇ ತರಗತಿ ವಿದ್ಯಾರ್ಥಿ ಕೂಡ ಸಾವನ್ನಪ್ಪಿದ್ದಾನೆ ಎಂದು ವರದಿಗಳು ಹೇಳಿವೆ. ಗಾಯಗೊಂಡವರನ್ನು ಸ್ಥಳೀಯ ಆಸ್ಪತ್ರೆಗೆ ದಾಖಲಿಸಿದ್ದು, ಸಂತ್ರಸ್ತರ ರಕ್ಷಣೆಗಾಗಿ ಕಾರ್ಯಾಚರಣೆ ಕೈಗೊಳ್ಳಲಾಗಿದೆ.

ಭೂಕುಸಿತದಿಂದಾಗಿ ರಾಷ್ಟ್ರೀಯ ಹೆದ್ದಾರಿಗಳಿಗೆ (ಎನ್ಎಚ್10 ಹಾಗೂ ಎನ್‌ಎಚ್55) ತೀವ್ರ ಹಾನಿಯಾಗಿದ್ದು, ಡಾರ್ಜಿಲಿಂಗ್‌ ಹಾಗೂ ಸಿಕ್ಕಿಂ ನಡುವಣ ರಸ್ತೆ ಸಂಪರ್ಕ ಹಾಗೂ ಸಂವಹನ ಸಂಪರ್ಕ ಕಡಿದು ಹೋಗಿದೆ. ಅಲ್ಲದೇ, ಡಾರ್ಜಿಲಿಂಗ್‌, ಕಲಿಂಪಾಂಗ್‌ ಹಾಗೂ ಕುರ್ಸೆಆಂಗ್ ಉಪವಿಭಾಗಗಳಲ್ಲಿ 25 ಭೂಕುಸಿತ ಘಟನೆಗಳು ವರದಿಯಾಗಿದ್ದು, ಕಲಿಂಪಾಂಗ್‌ನಲ್ಲಿ 8ನೇ ಹಾಗೂ 11ನೇ ಮೈಲಿ ಪ್ರದೇಶಗಳಲ್ಲಿ 15 ಜನರು ಕಾಣೆಯಾಗಿದ್ದಾರೆ ಎಂದು ಮೂಲಗಳು ತಿಳಿಸಿವೆ.