ರಾಜ್ಯದ ಸಂಶೋಧಕರಿಂದ ಚಿರತೆ ಬೆಕ್ಕು ದಾಖಲಾತಿ

ನವದೆಹಲಿ: ಪಶ್ಚಿಮಘಟ್ಟದಲ್ಲಿ ಸಾಮಾನ್ಯವಾಗಿ  ಕಾಣಸಿಗುವ ಆದರೆ ಹೆಚ್ಚಿನವರಿಗೆ ಪರಿಚಿತವಲ್ಲದ ಚಿರತೆ ಬೆಕ್ಕಿನ ದಾಖಲಾತಿ ಕಾರ್ಯ ವನ್ನು ಕರ್ನಾಟಕದ ಪ್ರಾಣಿ ಸಂಶೋಧಕರು ಆರಂಭಿಸಿದ್ದಾರೆ.

ಹೆಸರೇ ಸೂಚಿಸುವಂತೆ ಈ ಬೆಕ್ಕುಗಳು ನೋಡಲು ಮರಿಚಿರತೆಯನ್ನೇ ಹೋಲುತ್ತವೆ. ದಕ್ಷಿಣ ಏಷ್ಯಾದಲ್ಲಿ ಹೆಚ್ಚಾಗಿ ಕಂಡು ಬರುವ ಈ ರೀತಿಯ ಬೆಕ್ಕುಗಳ ಕುರಿತು ಅನ್ಯ ದೇಶಗಳಲ್ಲಿ ಸಾಕಷ್ಟು ಅಧ್ಯಯನಗಳು ನಡೆದಿವೆ. ಆದರೆ, ಭಾರತದಲ್ಲಿ ಮಾತ್ರ ಈ ಕುರಿತ ಅಧ್ಯಯನ ನಡೆದದ್ದು ಕಡಿಮೆ. ಆದರೆ, ಈಗ ಕರ್ನಾಟಕದ ಶ್ರೀವತ್ಸ, ರವಿಶಂಕರ್ ಪರಮೇಶ್ವರನ್, ಸುಷ್ಮಾ ಶರ್ಮಾ ಮತ್ತು ಡಾ. ಉಲ್ಲಾಸ್ ಕಾರಂತ್‍ರನ್ನೊಳಗೊಂಡ ತಂಡವೊಂದು 2,075 ಕಿ.ಮೀ. ವ್ಯಾಪ್ತಿಯ ಭದ್ರಾ, ಬಿಳಿಗಿರಿರಂಗಸ್ವಾಮಿ ದೇವಸ್ಥಾನ, ಬಂಡೀಪುರ ಮತ್ತು ನಾಗರಹೊಳೆ ಹುಲಿ ರಕ್ಷಿತಾರಣ್ಯದಲ್ಲಿ ಕ್ಯಾಮೆರಾ ಟ್ರ್ಯಾಪ್ ಮೂಲಕ ಇಂಥ ಬೆಕ್ಕುಗಳ ಕುರಿತು ಮಹತ್ವದ ದಾಖಲೆಗಳನ್ನು ಸಂಗ್ರಹಿಸಿದ್ದಾರೆ.

ಕರ್ನಾಟಕದ ಭದ್ರಾ ವನ್ಯಮೃಗ ಅರಣ್ಯಧಾಮದಲ್ಲಿ 100 ಚದರ ಕಿ.ಮೀ.ಗೆ ಇಂಥ ಹತ್ತು ಬೆಕ್ಕುಗಳಿವೆ. ಬಿಳಿಗಿರಿ ರಂಗ ದೇವಸ್ಥಾನ ಹುಲಿ ರಕ್ಷಿತಾರಣ್ಯದಲ್ಲಿ 100 ಚದರ ಕಿ.ಮೀ.ಗೆ ನಾಲ್ಕು ಚಿರತೆಬೆಕ್ಕುಗಳಿರುವುದು ಪತ್ತೆಯಾಗಿದೆ. ಸಾಮಾನ್ಯವಾಗಿ ಈ ರೀತಿಯ ಬೆಕ್ಕುಗಳು, ಇಲಿ, ಮೊಲದಂಥ ಪ್ರಾಣಿಗಳು ಹೆಚ್ಚಿರುವ ಪ್ರದೇಶದಲ್ಲೇ ವಾಸಿಸುತ್ತವೆ ಎಂದು ಜರ್ನಲ್ ಆಫ್
ಮ್ಯಾಮಲೊಜಿಯಲ್ಲಿ ಪ್ರಕಟವಾದ ಲೇಖನದಲ್ಲಿ ಹೇಳಲಾಗಿದೆ.