ವಿಶ್ವದ ಮೊದಲ ತಲೆಬರುಡೆ, ತಲೆತೊಗಲು ಕಸಿ ಯಶಸ್ವಿ

ಹ್ಯೂಸ್ಟನ್: ಕಸಿ ಶಸ್ತ್ರಚಿಕಿತ್ಸೆಯಲ್ಲಿ ಮಹತ್ವದ ಮೈಲುಗಲ್ಲು. ಮೊಟ್ಟಮೊದಲ ಬಾರಿಗೆ ಅಮೆರಿಕದ ವೈದ್ಯರು 55 ವರ್ಷದ ವ್ಯಕ್ತಿಯೊಬ್ಬರ ತಲೆಬುರುಡೆ ಮತ್ತು ತಲೆತೊಗಲು ಕಸಿ ಶಸ್ತ್ರಉಚಿಕಿತ್ಸೆ ಯನ್ನು ಯಶಸ್ವಿಯಾಗಿ ಪೂರೈಸಿ ದ್ದಾರೆ. ಅಷ್ಟೇ ಅಲ್ಲ, ಈ ಶಸ್ತ್ರಉಚಿಕಿತ್ಸೆ ನಡೆಯುತ್ತಿದ್ದಾಗಲೇ ಕಿಡ್ನಿ ಹಾಗೂ ಮೇದೋಜೀರಕ ಗ್ರಂಥಿಯ ಕಸಿಯೂ ನಡೆದಿದೆ. ಬರೋಬ್ಬರಿ 15 ಗಂಟೆ ಅವಧಿಯ ಶಸ್ತ್ರಚಿಕಿತ್ಸೆ ನಡೆಸಿದ್ದು ಅಮೆರಿಕದ ಎಂಡಿ ಆ್ಯಂಡರ್ಸನ್ ಕ್ಯಾನ್ಸರ್ ಸೆಂಟರ್ ಮತ್ತು ಹ್ಯೂಸ್ಟನ್ ಮೆಥಡಿಸ್ಟ್ ಆಸ್ಪತ್ರೆಯ ತಜ್ಞರು.

ಅಪರೂಪದ ಕ್ಯಾನ್ಸರ್: ಆಸ್ಟಿನ್‍ನ ಸಾಫ್ಟ್ ವೇರ್ ಡೆವಲಪರ್ ಜೇಮ್ಸ್ ಬಾಯ್ಸನ್‍ಗೆ 5 ವರ್ಷವಿದ್ದಾಗಲೇ ಮಧುಮೇಹ ಕಾಯಿಲೆ ಬಂದಿತ್ತು. ಹೀಗಾಗಿ 1992ರಲ್ಲಿ ಅವರಿಗೆ ಮೂತ್ರಜನಕಾಂಗ- ಮೇದೋಜೀರಕಾಂಗದ ಕಸಿ ನಡೆಸಲಾಗಿತ್ತು. ಬಳಿಕ ಅವರು ನಿರಂತರ ಗುಳಿಗೆ ಗಳನ್ನು ಸೇವಿಸಬೇಕಾಗಿ ಬಂದಿದ್ದರಿಂದ, ಅಪರೂಪದ ಕ್ಯಾನ್ಸರ್‍ಗೆ ತುತ್ತಾಗಬೇಕಾಯಿತು. ಕ್ಯಾನ್ಸರ್‍ಗೆಂದು ನೀಡಲಾಗುತ್ತಿದ್ದ ರೇಡಿಯೇಷನ್ ಥೆರಪಿ ಅವರ ತಲೆಯ ಒಂದು ಭಾಗವನ್ನೇ ಹಾನಿ ಮಾಡಿತು. ತಲೆಯಲ್ಲಿ 10 -10 ಇಂಚಿನ ರಂಧ್ರ ಉಂಟಾಯಿತು. ಮತ್ತೊಂದೆಡೆ ಕಸಿಮಾಡಲಾದ ಅಂಗಾಂಗಗಳೂ ವಿಫಲವಾದವು. ಈ ಎಲ್ಲ ಸಮಸ್ಯೆಗೂ ಒಟ್ಟಿಗೇ ಪರಿಹಾರ ಕಂಡುಕೊಳ್ಳುವ ನಿಟ್ಟಿನಲ್ಲಿ ವೈದ್ಯರ ತಂಡ ಹೆಜ್ಜೆಯಿಟ್ಟಿತು.

ಏಕಕಾಲದಲ್ಲಿ 3 ಶಸ್ತ್ರಚಿಕಿತ್ಸೆ: ತಲೆಬುರುಡೆ, ತೊಗಲು, ಕಿಡ್ನಿ, ಮೇದೋಜೀರಕಾಂಗದ ಕಸಿಯನ್ನು ಒಂದೇ ಬಾರಿಗೆ ಮಾಡಿದರೆ, ಒಂದೇ ರೀತಿಯ ಔಷಧದಿಂದ ಅವುಗಳನ್ನು ರಕ್ಷಿಸಿಕೊಳ್ಳಬಹುದು ಎನ್ನುವುದು ವೈದ್ಯ ಆಲೋಚನೆಯಾಗಿತ್ತು. ಅದರಂತೆ, 15 ಗಂಟೆಗಳ ಕಾಲ ಈ ಮೂರೂ ಅಂಗಗಳ ಕಸಿ ನಡೆದು, ಅದು ಯಶಸ್ವಿಯೂ ಆಯಿತು ಎಂದು ಬಿಬಿಸಿ ವರದಿ ಮಾಡಿದೆ.