ಬಂಗಾಳ ಅಭಿವೃದ್ಧಿ ಕಾಂಗ್ರೆಸ್ ನಿಂದ ಮಾತ್ರ ಸಾಧ್ಯ: ರಾಹುಲ್ ಗಾಂಧಿ

ರಿಶ್ರಾ(ಪಶ್ಚಿಮ ಬಂಗಾಳ): ಎಡರಂಗ ಮತ್ತು ತೃಣಮೂಲ ಕಾಂಗ್ರೆಸ್ ಎರಡೂ ಪಕ್ಷಗಳು ಪಶ್ಚಿಮ ಬಂಗಾಳ ಜನತೆಯ ಆಶೋತ್ತರಗಳನ್ನು ಈಡೇರಿಸುವಲ್ಲಿ ವಿಫಲವಾಗಿದ್ದು, ಕೇವಲ ಕಾಂಗ್ರೆಸ್ ನಿಂದ ಮಾತ್ರ ಪುನಹ ರಾಜ್ಯವನ್ನು ಅಭಿವೃದ್ಧಿ ಹಾದಿಯಲ್ಲಿ ತರಲು ಸಾಧ್ಯ ಎಂದು ರಾಹುಲ್ ಗಾಂಧಿ ಹೇಳಿದ್ದಾರೆ.

ಸಿಪಿಎಂ ನೇತೃತ್ವದ ಎಡರಂಗ 34 ವರ್ಷಗಳ ಕಾಲ ರಾಜ್ಯದಲ್ಲಿ ಆಳ್ವಿಕೆ ನಡೆಸಿದ್ದು, ಅದು ಅಭಿವೃದ್ಧಿಗೆ ತಡೆಯನ್ನು ತಂದಿತ್ತು ಎಂದು ಅವರು ಆರೋಪಿಸಿದರು, ಅವರು ಇಂದು ಕೋಲ್ಕತ್ತಾದಿಂದ 25 ಕಿ.ಮೀ ದೂರದಲ್ಲಿ ಹೂಗ್ಲಿ ಜಿಲ್ಲೆಯ ಗಂಗಾ ನದಿ  ತೀರದಲ್ಲಿ ವೆಲ್ಲಿಂಗ್ಟನ್ ಸೆಣಬಿನ ಗಿರಣಿಯ ಕಾರ್ಮಿಕರನ್ನುದ್ದೇಶಿಸಿ ಮಾತನಾಡುವ ಸಂದರ್ಭದಲ್ಲಿ  ಹೀಗೆ ಹೇಳಿದರು.ಕಾರ್ಮಿಕರ ಸಮಸ್ಯೆಗಳನ್ನು ಸಂಸತ್ತಿನಲ್ಲಿ ಅಧಿವೇಶನ ಸಂದರ್ಭದಲ್ಲಿ ಎತ್ತುವುದಾಗಿ ಅವರು ಭರವಸೆ ನೀಡಿದರು.

2011ರಲ್ಲಿ ಅಧಿಕಾರಕ್ಕೆ ಬಂದ ತೃಣಮೂಲ ಕಾಂಗ್ರೆಸ್ ಸಹ ಅಭಿವೃದ್ಧಿ ಕೆಲಸ ಮಾಡಲಿಲ್ಲ, ರಾಜ್ಯವನ್ನು ಅಭಿವೃದ್ಧಿಯ ಹಾದಿಯತ್ತ ಕೊಂಡೊಯ್ಯಬಹುದು  ಎಂದು ಜನತೆ ಇಟ್ಟಿದ್ದ ಭರವಸೆಗಳು ಹುಸಿಯಾದವು.ಮುಂದಿನ ಬಾರಿ ಕಾಂಗ್ರೆಸ್ ನ್ನು ಅಧಿಕಾರಕ್ಕೆ ತರುವಂತೆ ಒತ್ತಾಯಿಸಿದರು.1977ರಲ್ಲಿ ವಿಧಾನಸಭೆಯಲ್ಲಿ ಸೋತ ಬಳಿಕ ಕಾಂಗ್ರೆಸ್ ಇಲ್ಲಿಯವರೆಗೆ ಅಧಿಕಾರಕ್ಕೆ ಬಂದಿಲ್ಲ. ತೀರಾ ಇತ್ತೀಚೆಗೆ ನಡೆದ ನಗರಪಾಲಿಕೆ ಚುನಾವಣೆಯಲ್ಲಿ ರಾಜ್ಯದಲ್ಲಿ ತೃಣಮೂಲ ಕಾಂಗ್ರೆಸ್ ಮೊದಲ ಸ್ಥಾನ ಗಳಿಸಿದ್ದರೆ,ಎಡರಂಗ, ಬಿಜೆಪಿ ನಂತರದ ಸ್ಥಾನಗಳು ಮತ್ತು  ಕಾಂಗ್ರೆಸ್ ಕೊನೆಯ ಸ್ಥಾನ ಪಡೆದಿತ್ತು. 

ಸೆಣಬಿನ ಗಿರಣಿ  ಕಾರ್ಮಿಕರ ಜೊತೆಗಿನ ಸಂವಾದದ ವೇಳೆ ಅವರ ಸಮಸ್ಯೆಗಳ ಕುರಿತು ಭಾರತೀಯ ರಾಷ್ಟ್ರೀಯ ಟ್ರೇಡ್ ಯೂನಿಯನ್ ಕಾಂಗ್ರೆಸ್ ನ ಅಧ್ಯಕ್ಷ ರಮೆನ್ ಪಾಂಡೆ ರಾಹುಲ್ ಗಾಂಧಿ ಅವರಿಗೆ ವಿವರಿಸಿದರು. ಅವರ ವೇತನ, ಪಿಂಚಣಿ, ಬೋನಸ್ ಇತ್ಯಾದಿಗಳ ಕುರಿತು ಚರ್ಚಿಸಿದರು.

ರಾಹುಲ್ ಗಾಂಧಿಯವರ ಜೊತೆಗಿನ ಸಂವಾದವನ್ನು  ನಂತರ ಸುದ್ದಿಗಾರರಿಗೆ ವಿವರಿಸಿದ ಪಾಂಡೆ,ಸೆಣಬು ಕಾರ್ಖಾನೆಯನ್ನು ಉಳಿಸಲು ಪ್ಯಾಕೇಜ್ ನೀಡುವಂತೆ ಸಂಸತ್ತಿನಲ್ಲಿ ಒತ್ತಾಯಿಸುವುದಾಗಿ ಹೇಳಿದ್ದಾರೆ ಎಂದರು.

ಉತ್ತರ ಬಂಗಾಳದ ಟೀ ಬೆಳೆಗಾರರ ಸಮಸ್ಯೆಗಳು ಮತ್ತು ಹಿಂದೂಸ್ತಾನ್ ಮೋಟಾರ್ ಕಂಪೆನಿಯನ್ನು ಮುಚ್ಚುವುದರಿಂದ ಅಲ್ಲಿನ ಕಾರ್ಮಿಕರಿಗೆ ಮತ್ತು ಸ್ಥಳೀಯ ವ್ಯಾಪಾರಿಗಳಿಗೆ ಉಂಟಾಗುವ ಸಮಸ್ಯೆಗಳ ಕುರಿತು ಮನವಿಯನ್ನು ರಾಹುಲ್ ಗಾಂಧಿಯವರಿಗೆ ನೀಡಿರುವುದಾಗಿ ರಮಣ್ ಪಾಂಡೆ ತಿಳಿಸಿದರು.