ಆಪ್ ಜಾಹೀರಾತು ಪ್ರಚಾರದ ವೆಚ್ಚ ಪ್ರಶ್ನಿಸಿದ ಬಿಜೆಪಿ

ನವದೆಹಲಿ: ಆಮ್ ಆದ್ಮಿ ಪಕ್ಷದ ಜಾಹೀರಾತು ಪ್ರಚಾರ ಹಲವು ವಿವಾದಕ್ಕೆ ಸಿಲುಕಿರುವ ಹಿನ್ನೆಲೆಯಲ್ಲೇ ಇದೀಗ ಬಿಜೆಪಿ ಸಹ ಆಪ್ ವಿರುದ್ಧ ಜಾಹೀರಾತು ಪ್ರಚಾರಕ್ಕಿಳಿದಿದ್ದು, ಜಾಹೀರಾತು ಪ್ರಚಾರಕ್ಕೆ ಖರ್ಚು ಮಾಡಿರುವ ಹಣದ ಕುರಿತಂತೆ ದೆಹಲಿ ಮುಖ್ಯಮಂತ್ರಿ ಅರವಿಂದ ಕೇಜ್ರಿವಾಲ್ ಅವರನ್ನು ಪ್ರಶ್ನಿಸಿದೆ.

ದೆಹಲಿಯಲ್ಲಿ ಅಧಿಕಾರದಲ್ಲಿರುವ ಎಎಪಿ ಸರ್ಕಾರವು ಹಣಕಾಸು ವರ್ಷದಲ್ಲಿ ತನ್ನ ಸಾಧನೆ ಪ್ರಚಾರಕ್ಕಾಗಿ 526 ಕೋಟಿ ಹಣ ಖರ್ಚು ಮಾಡಿತ್ತು. ಕೇಜ್ರಿವಾಲ್ ಸರಕಾರವು ತನ್ನ ಪ್ರಚಾರ ಕಾರ‌್ಯಗಳಿಗಾಗಿ ಜನರ ಹಣವನ್ನು ಬಳಸಿಕೊಳ್ಳುವ ಮೂಲಕ ಭ್ರಷ್ಟಾಚಾರ ನಡೆಸುತ್ತಿದೆ ಎಂದು ಹೇಳಿ ಪ್ರತಿಪಕ್ಷಗಳು ವಾಗ್ದಾಳಿ ನಡೆಸುತ್ತಿವೆ.

ಈ ಹಿಂದಷ್ಟೇ ಆಮ್ ಆದ್ಮಿ ಪಕ್ಷದ ಮುಖ್ಯಸ್ಥ ಹಾಗೂ ದೆಹಲಿ ಮುಖ್ಯಮಂತ್ರಿ ಅರವಿಂದ ಕೇಜ್ರಿವಾಲ್ ಅವರು ಪ್ರಧಾನಿ ಮೋದಿ ವಿರುದ್ಧ ಜಾಹೀರಾತು ಪ್ರಚಾರ ಮಾಡಿದ್ದರು. ಮೋದಿ ಅವರೇ ನಮ್ಮ ಕೆಲಸದಲ್ಲಿ ಮಧ್ಯೆ ಪ್ರವೇಶಿಸದೆ, ನಮ್ಮನ್ನು ಕೆಲಸ ಮಾಡಲು ಬಿಡಿ ಎಂದು ಹೇಳಿ ಬಿಜೆಪಿ ನೇತೃತ್ವದ ಎನ್ ಡಿಎ ಸರ್ಕಾರದ ವಿರುದ್ಧ ಜಾಹೀರಾತು ಪ್ರಚಾರ ಮಾಡಿತ್ತು.

ಇದೀಗ ಆಪ್ ಸರ್ಕಾರದ ಜಾಹೀರಾತು ಪ್ರಚಾರದ ಹಾದಿಯನ್ನೇ ಬಿಜೆಪಿ ಸಹ ಹಿಡಿದಿದ್ದು, ಕೇಜ್ರಿವಾಲ್ ರನ್ನು ಪ್ರಶ್ನಿಸಿ ದೆಹಲಿಯಾದ್ಯಂತ ಹಲವಾರು ಜಾಹೀರಾತು ಫಲಕಗಳನ್ನು ಹಾಕಿದೆ. ಬಿಜೆಪಿ ಪ್ರಕಟಿಸಿರುವ ಜಾಹೀರಾತಿನಲ್ಲಿ  ಪ್ರಚಾರಕ್ಕೆ ಖರ್ಚು ಮಾಡಿದ 526ಕೋಟಿ ಹಣವನ್ನು ಏನು ಮಾಡಿದಿರಿ ಎಂದು ಪ್ರಶ್ನಿಸಿದೆ. ಅಲ್ಲದೆ, ತಾವು ಪ್ರಚಾರಕ್ಕೆ ಖರ್ಚು ಮಾಡಿದ ಈ ಹಣದಲ್ಲಿ ಮಹಿಳೆಯರ ಸುರಕ್ಷೆಗಾಗಿ 5 ಲಕ್ಷ ಕ್ಯಾಮೆರಾಗಳನ್ನು ನಗರದಲ್ಲೆಡೆ ಹಾಕಬಹುದಿತ್ತು. 200 ಶಾಲೆಗಳು ಹಾಗೂ 50 ಹೊಸ ಕಾಲೇಜುಗಳನ್ನು ತೆರೆಬಹುದಿತ್ತು. 1000 ಕಾಲೋನಿಗಳ ಜನತೆಗೆ ಶುದ್ಧ ನೀರು ಕೊಡಬಹುದಿತ್ತು. ಇಷ್ಟೊಂದು ಹಣವನ್ನು ಅನಾವಶ್ಯಕವಾಗಿ ಹಾಳುಮಾಡಲಾಗಿದೆ. ನಮ್ಮ ಪ್ರಶ್ನೆಗೆ ಉತ್ತರ ಕೊಡಿ ಎಂದು ಕೇಳಿದೆ.

ಜಾಹೀರಾತು ಫಲಕಗಳ ಮೂಲಕ ಬಿಜೆಪಿ ಕೇಳಿರುವ ಪ್ರಶ್ನೆಗೆ ಉತ್ತರಿಸಲು ಆಮ್ ಆದ್ಮಿ ಪಕ್ಷ ಉತ್ತರಿಸಲು ನಿರಾಕರಿಸಿದೆ.