20 ರುಪಾಯಿ ಕದ್ದಿದ್ದನ್ನು ನೋಡಿದ 4 ವರ್ಷದ ಬಾಲಕಿಯನ್ನು ಕೊಂದ 15 ವರ್ಷದ ಬಾಲಕಿ

ವಿಲ್ಲುಪುರಂ: 20 ರುಪಾಯಿ ಕಳ್ಳತನ ಮಾಡುತ್ತಿರುವುದನ್ನು ನೋಡಿದ ನಾಲ್ಕು ವರ್ಷದ ಬಾಲಕಿಯನ್ನು 15 ವರ್ಷದ ಬಾಲಕಿ ಕೊಲೆ ಮಾಡಿದ ಘಟನೆ ಮಂಗಳವಾರ ತಮಿಳುನಾಡಿನಲ್ಲಿ ನಡೆದಿದೆ.

ಮೂಲಗಳ ಪ್ರಕಾರ, ಕಲ್ಲಕುರಿಚಿಯ ವೆಂಕಟೇಶನ್ ಹಾಗೂ ಸಂತಾನ ಲಕ್ಷ್ಮಿ ಅವರ ಪುತ್ರಿ, ಎಲ್ಕೆಜಿ ವಿದ್ಯಾರ್ಥಿನಿ ದುರ್ಗಾ ಭಾನುವಾರ ಸಂಜೆ 10ನೇ ತರಗತಿ ವಿದ್ಯಾರ್ಥಿನಿ ಮೋಹನಾ(ಹೆಸರು ಬದಲಾಯಿಸಲಾಗಿದೆ)ರೊಂದಿಗೆ ತಮ್ಮ ಮನೆಯಲ್ಲೇ ಆಟವಾಡುತ್ತಿದ್ದರು. ಈ ವೇಳೆ ಮೋಹನಾ 20 ರುಪಾಯಿ ಕದಿಯುತ್ತಿರುವುದನ್ನು ದುರ್ಗಾ ನೋಡಿದ್ದಳು. ಅಲ್ಲದೆ ಇದನ್ನು ತನ್ನ ತಾಯಿಗೂ ಹೇಳಿದ್ದಳು.

ಬಳಿಕ ದುರ್ಗಾ ತಾಯಿ ಸಂತಾನ ಲಕ್ಷ್ಮಿ, ಮೋಹನಾಳಿಗೆ ಬೈದು, ಬುದ್ಧಿಹೇಳಿ ಹಣ ವಾಪಸ್ ತೆಗೆದುಕೊಂಡಿದ್ದರು. ಅಲ್ಲದೆ ಮೋಹನಾಳ ಅಪ್ಪ, ಅಮ್ಮನಿಗೂ ಈ ವಿಷಯ ತಿಳಿಸಿದ್ದರಿಂದ, ಅವರೂ ಮೋಹನಾಳಿಗೆ ಹೊಡೆದು ಬುದ್ಧಿ ಹೇಳಿದ್ದರು.

ಇದರಿಂದ ತೀವ್ರ ಕೋಪಗೊಂಡಿದ್ದ ಮೋಹನಾ ಸೋಮವಾರ ಶಾಲೆಯಿಂದ ಬಂದವಳೇ, ಆಟವಾಡುವ ನೆಪ ಹೇಳಿ ದುರ್ಗಾಗಳನ್ನು ಕರೆದುಕೊಂಡು ಹೋಗಿ, ಹೊಲದಲ್ಲಿರುವ ಬಾವಿಗೆ ತಳ್ಳಿದ್ದಾಳೆ.

ರಾತ್ರಿಯಾದರೂ ದುರ್ಗಾ ಮನೆಗೆ ಬಾರದಿದ್ದಾಗ ಆತಂಕಗೊಂಡ ಪೋಷಕರು, ಮೋಹನಾಳನ್ನು ವಿಚಾರಿಸಿದ್ದಾರೆ. ಆದರೆ ವಿಷಯ ಬಾಯಿಬಿಡದ ಮೋಹನಾ, 7 ಗಂಟೆಗೆ ನಿಮ್ಮ ಮಗಳನ್ನು ಕರೆತಂದು ಮನೆಯಲ್ಲಿ ಬಿಟ್ಟಿದ್ದೇನೆ ಎಂದಿದ್ದಾಳೆ.

ಪೋಷಕರು ಇಡೀ ರಾತ್ರಿ ದುರ್ಗಾಗಳಿಗಾಗಿ ಹುಡುಕಾಟ ನಡೆಸಿದ್ದರು. ಕೊನೆಗೆ ಬಾವಿಯಲ್ಲಿ ದುರ್ಗಾಗಳ ಶವ ಪತ್ತೆಯಾಗಿದ್ದು, ಈ ಸಂಬಂಧ ಕಚಿರಪಲಯಂ ಪೊಲೀಸ್ ಠಾಣೆಗೆ ದೂರು ನೀಡಿದ್ದಾರೆ. ಅಲ್ಲದೆ ಮೋಹನಾಳ ಬಗ್ಗೆ ಶಂಕೆ ವ್ಯಕ್ತಪಡಿಸಿದ್ದಾರೆ.

ಪೊಲೀಸರು ಮೋಹನಾಳನ್ನು ವಶಕ್ಕೆ ಪಡೆದ ವಿಚಾರಣೆಗೆ ಒಳಪಡಿಸಿದ್ದು, ವಿಚಾರಣೆ ವೇಳೆ ಮೋಹನಾ, ದುರ್ಗಾಗಳನ್ನು ಬಾವಿಗೆ ತಳ್ಳಿ ಹತ್ಯೆ ಮಾಡಿರುವುದಾಗಿ ತಪ್ಪೊಪ್ಪಿಕೊಂಡಿದ್ದಾಳೆ.