ಬೆಳಗಾವಿಯಲ್ಲಿ ನಕಲಿ ವಿವಿ

ನವದೆಹಲಿ: ಕರ್ನಾಟಕದ ಬೆಳಗಾವಿಯ ಬಡಗಗ್ನಾವಿ ಸರ್ಕಾರ್ ವರ್ಲ್ಡ್ ಓಪನ್ ಎಜುಕೇಷನ್ ಸೊಸೈಟಿ ಸೇರಿ ದೇಶದ ಒಟ್ಟು 21 ನಕಲಿ ವಿವಿಗಳ ಪಟ್ಟಿಯನ್ನು ಯುಜಿಸಿ ಬಿಡುಗಡೆ ಮಾಡಿದೆ.

ವಿದ್ಯಾರ್ಥಿಗಳು ಈ ನಕಲಿ ವಿವಿಗಳಿಗೆ ಪ್ರವೇಶ ಪಡೆದು ಮೋಸ ಹೋಗಕೂಡದೆಂದು ಎಚ್ಚರಿಕೆ ನೀಡಿ ಬುಧವಾರ ಅಧಿಸೂಚನೆ ಹೊರಡಿಸಿದೆ. ಈ ಕಳಂಕಿತ ಪಟ್ಟಿಯಲ್ಲಿ ಉತ್ತರ ಪ್ರದೇಶ ಅಗ್ರಸ್ಥಾನ ಹೊಂದಿದ್ದು, ಅಲ್ಲಿನ ಒಟ್ಟು 8 ವಿವಿಗಳು ಕಪ್ಪು ಪಟ್ಟಿಯಲ್ಲಿವೆ. ದೆಹಲಿಯ ಆರು ಯುನಿವರ್ಸಿಟಿಗಳು ನಕಲಿ ಎಂದು ಗುರುತಿಸಲಾಗಿದೆ. ಮಿಕ್ಕಂತೆ ತಮಿಳುನಾಡು, ಕೇರಳ, ಮಧ್ಯಪ್ರದೇಶ, ಮಹಾರಾಷ್ಟ್ರ, ಬಿಹಾರ, ಕರ್ನಾಟಕ ಹಾಗೂ ಪಶ್ಚಿಮ ಬಂಗಾಳದ ಒಂದೊಂದು ಯುನಿವರ್ಸಿಟಿಗಳು ಈ ಪಟ್ಟಿಯಲ್ಲಿ  ಕಾಣಿಸಿಕೊಂಡಿವೆ.

ಈ ಅಧಿಸೂಚನೆಯ ನಂತರವೂ ವಿದ್ಯಾರ್ಥಿಗಳು ಈ ವಿವಿಗಳಲ್ಲಿ ಪ್ರವೇಶ ಪಡೆದಲ್ಲಿ, ಅವರಿಗೆ ಪದವಿ ಪ್ರಮಾಣಪತ್ರ ನೀಡಲಾಗುವುದಿಲ್ಲ. ಅವರಿಗೆ ಸಿಗುವ ಪದವಿಗೆ ಮಾನ್ಯತೆಯೂ ಇರುವುದಿಲ್ಲ ಎಂದು ಯುಜಿಸಿ ಎಚ್ಚರಿಸಿದೆ.