ಮೊದಲು ರಾಬರ್ಟ್ ವಾದ್ರಾ ಗೆ ಕುರ್ತಾ ಪೈಜಾಮಾ ಹಾಕಿಸುವಂತೆ ರಾಹುಲ್ ಗಾಂಧಿಗೆ ಸಲಹೆ

ನವದೆಹಲಿ: ಎಐಸಿಸಿ ಅಧ್ಯಕ್ಷೆ ಸೋನಿಯಾ ಗಾಂಧಿ ಅವರ ಅಳಿಯ  ರಾಬರ್ಟ್ ವಾದ್ರಾಗೆ ಮೊದಲು ಕುರ್ತಾ ಪೈಜಾಮ ಹಾಕಿಸುವಂತೆ ರಾಹುಲ್ ಗಾಂಧಿಗೆ ಕೇಂದ್ರ ಪೆಟ್ರೋಲಿಯಂ ಸಚಿವ ಧರ್ಮೇಂದ್ರ ಪ್ರಧಾನ್ ಸಲಹೆ ನೀಡಿದ್ದಾರೆ. ಕುರ್ತಾ ಪೈಜಾಮ ಸರ್ಕಾರ ಅಧಿಕಾರಕ್ಕೆ ಬಂದರೆ ಸಾಮಾನ್ಯ ಜನರ  ಸಮಸ್ಯೆಗಳಿಗೆ ಸ್ಪಂದಿಸುತ್ತದೆ ಎಂದು ರಾಹುಲ್ ಗಾಂಧಿ ನೀಡಿದ್ದ ಹೇಳಿಕೆಗೆ ಬಿಜೆಪಿ ಟಾಂಗ್  ನೀಡಿದೆ.

ರಾಯ್ ಬರೇಲಿಯ ರಾಜೀವ್ ಗಾಂಧಿ ಪೆಟ್ರೋಲಿಯಂ ಟೆಕ್ನಾಲಜಿ ಇನ್ ಸ್ಟಿಟ್ಯೂಟ್ ನ ಮೊದಲ ವಾರ್ಷಿಕೋತ್ಸವದಲ್ಲಿ ಭಾಗವಹಿಸಿ ಮಾತನಾಡಿದ ಅವರು, ಯುಪಿಎ ಸರ್ಕಾರದ ಅವಧಿಯಲ್ಲಿ ಆರ್ ಜಿ ಐ ಪಿಟಿ ಸ್ಥಾಪನೆಯಾಯಿತು. 7 ವರ್ಷ ಕಳೆದರೂ ಇದುವರೆಗೂ ಒಂದು ಕ್ಯಾಂಪಸ್ ಸ್ಥಾಪನೆಯಾಗಿಲ್ಲ. ಈ ದೇಶದ ಆಡಳಿತ ನಡೆಸಿದ ಕಾಂಗ್ರೆಸ್ ದೇಶವನ್ನು ಗುಡಿಸಿ ಗುಂಡಾಂತರ ಮಾಡಿದೆ.ಕೇವಲ ಘೋಷಣೆಗಳಿಂದ ದೇಶದ ಅಭಿವೃದ್ಧಿ ಆಗಲು ಸಾಧ್ಯವಿಲ್ಲ ಎಂದು ಕಾಂಗ್ರೆಸ್ ವಿರುದ್ಧ ವಾಗ್ದಾಳಿ ನಡೆಸಿದರು.

2008 ರಲ್ಲಿ ಬಾಡಿಗೆ ಕಟ್ಟಡದಲ್ಲಿ ಆರ್ಜಿಐಪಿಟಿ  ಆರಂಭವಾಯಿತು. ಈ ವೇಳೆ ಸ್ನಾತಕೋತ್ತರ ಪದವಿ, ಎಂಜಿನೀಯರಿಂಗ್ ಮತ್ತು ಎಂಬಿಎಸ, ಹಾಗೂ ಪಿಎಚ್ ಡಿ ಪದವಿ ಕೋರ್ಸ್ ಗಳು ಆರಂಭವಾದವು. ನಾವು ಬೇರೆಯವರ ವಿರುದ್ದ ಆರೋಪ ಮಾಡಿ ಓಡಿ ಹೋಗುವವರಲ್ಲ. ಪಕ್ಷಪಾತ ರಾಜಕಾರಣ ಮಾಡುವುದು ಬಿಜೆಪಿಯಲ್ಲ. ನುಡಿದಂತೆ ನಡೆಯುವವರು ನಾವು ಎಂದ ಧರ್ಮೇಂದ್ರ ಪ್ರಧಾನ್ ಮುಂದಿನ ವರ್ಷ ಕ್ಯಾಂಪಸ್ ನಿರ್ಮಿಸುವ ಭರವಸೆ ನೀಡಿದರು.