ಬಿಜೆಪಿ, ಕಾಂಗ್ರೆಸ್ ವಿರುದ್ಧ ಗುಡುಗಿದ ಮಾಯಾವತಿ

ಲಖನೌ: ರಾಷ್ಟ್ರೀಯ ಪಕ್ಷಗಳಾದ ಬಿಜೆಪಿ ಮತ್ತು ಕಾಂಗ್ರೆಸ್ ದಲಿತರನ್ನು ವೋಟ್ ಬ್ಯಾಂಕ್ ಎಂದು ಪರಿಗಣಿಸಿದೆ ಎಂದು ಬಿಎಸ್ ಪಿ ನಾಯಕಿ ಮಾಯಾವತಿ ಮಂಗಳವಾರ ಆರೋಪಿಸಿದ್ದಾರೆ.

ಪಕ್ಷದ ವತಿಯಿಂದ ಹಮ್ಮಿಕೊಂಡಿದ್ದ ಅಂಬೇಡ್ಕರ್ ಜಯಂತಿ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ದಲಿತರನ್ನು ಕೇವಲ ವೋಟ್ ಬ್ಯಾಂಕ್ ಗಾಗಿ ಬಳಸಿಕೊಳ್ಳಲಾಗುತ್ತಿದ್ದು, ಭಾರತರತ್ನ  ಅಂಬೇಡ್ಕರ್ ಅವರನ್ನೂ ಕೂಡ ಅದಕ್ಕಾಗಿಯೇ ನೆನೆಯುತ್ತಾರೆ ಎಂದು ಮಾಯಾವತಿ ಎರಡು ಪಕ್ಷಗಳ ವಿರುದ್ಧ ಕಿಡಿಕಾರಿದ್ದಾರೆ.

ಕಾಂಗ್ರೆಸ್ ಮತ್ತು ಬಿಜೆಪಿ ಎಂದೆಂದಿಗೂ ಅಂಬೇಡ್ಕರ್ ಅವರನ್ನು ಗೌರವ ಭಾವನೆಯಿಂದ ಕಂಡಿಲ್ಲ. ಕೇವಲ ರಾಜಕಾರಣಕ್ಕೆ ಮಾತ್ರ ಅವರನ್ನು ಬಳಸಿಕೊಂಡಿದೆ ಎಂದ ಅವರು, ಇತ್ತೀಚಿನ ಚುನಾವಣೆಯಲ್ಲಿ ಕಾಂಗ್ರೆಸ್‌ಗೆ ಸೋಲಾಗಲು ಮೂಲ ಕಾರಣ ದಲಿತರನ್ನು ಕಡೆಗಣಿಸಿದ್ದು ಎಂದು ಟೀಕಿಸಿದ್ದಾರೆ.

ಇನ್ನು ಬಿಜೆಪಿಯವರು ದೊಡ್ಡ ನಾಟಕವನ್ನೇ ಆಡುತ್ತಾರೆ. ಅದನ್ನು ದಲಿತರು ನಂಬಲು ಸಾಧ್ಯವಿಲ್ಲ. ಬಿಎಸ್‌ಪಿ ಮಾತ್ರ ಶೋಷಿತರ, ಹಿಂದುಳಿದವರ ಪರವಾದ ಪಕ್ಷವಾಗಿದೆ, ಆದರೆ, ರಾಷ್ಟ್ರೀಯ ಪಕ್ಷಗಳು ಇದನ್ನು ತುಳಿಯಲೆತ್ನಿಸುತ್ತಿದೆ ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.