ಮೃತದೇಹ ರಸ್ತೆಯಲ್ಲಿಟ್ಟು ಪ್ರತಿಭಟನೆ

ಚೆನ್ನೈ/ತಿರುವಣ್ಣಾಮಲೈ: ಚಿತ್ತೂರು ಜಿಲ್ಲೆಯಲ್ಲಿ ನಡೆದ 20 ಮಂದಿಯ ಎನ್ ಕೌಂಟರ್ ಪ್ರಕರಣ ಸದ್ಯಕ್ಕೆ ತಣ್ಣಗಾಗುವಂತೆ ಕಾಣುತ್ತಿಲ್ಲ. ಕಳೆದ 2 ದಿನಗಳಿಂದಲೂ ಘಟನೆ ಖಂಡಿಸಿ ಪ್ರತಿಭಟನೆಗಳು ನಡೆಯುತ್ತಲೇ ಇವೆ. ಎನ್‍ಕೌಂಟರ್‍ಗೆ ಬಲಿಯಾದ ಇಬ್ಬರ ಮೃತದೇಹಗಳನ್ನು ಕುಟುಂಬ ಸದಸ್ಯರು ಗುರುವಾರ ತಮಿಳು ನಾಡಿನ ತಿರುವಣ್ಣಾಮಲೈನ ರಸ್ತೆಯಲ್ಲಿಟ್ಟು ಪ್ರತಿಭಟನೆ ನಡೆಸಿದರು. ಜತೆಗೆ, ಪ್ರಕರಣದ ಬಗ್ಗೆ ಸ್ವತಂತ್ರ ತನಿಖೆಯಾಗಬೇಕು ಎಂದು ಆಗ್ರಹಿಸಿದರು. ಇದೇ ವೇಳೆ, ಮೃತ ಕಾರ್ಮಿಕರ ಸಾವಿಗೆ ಆಂಧ್ರಪ್ರದೇಶ ಸರ್ಕಾರವೇ ಕಾರಣ ಎಂದು ಆರೋಪಿಸಿರುವ ತಮಿಳುನಾಡು ಸರ್ಕಾರ, ಮೃತರು ಸ್ಮಗ್ಲರ್‍ಗಳಲ್ಲ ಎಂದು ವಾದಿಸಿದೆ. ಏತನ್ಮಧ್ಯೆ, ಎನ್‍ಕೌಂಟರ್ ಬಗ್ಗೆ ಪ್ರಧಾನಿ ನರೇಂದ್ರ ಮೋದಿ ಅವರು ತಾಳಿರುವ ಮಾನಕ್ಕೆ ಎನ್‍ಡಿಎ ಮಿತ್ರಪಕ್ಷ ಪಿಎಂಕೆ ಆಕ್ರೋಶ ವ್ಯಕ್ತಪಡಿಸಿದೆ. ಇಂತಹುದೊಂದು ಘಟನೆ ನಡೆದರೂ ಪ್ರಧಾನಿ ಮೋದಿ ಅವರು ಚಕಾರವೆತ್ತದಿರುವುದು ದುರಂತ. ಇಂತಹ ಘಟನೆಗಳಾದಾಗ ಪ್ರಧಾನಿ ಮೊದಲು ಎರಡೂ ರಾಜ್ಯಗಳ ಸಿಎಂಗಳಿಗೆ ಕರೆ ಮಾಡಿ ಮಾತನಾಡಬೇಕು. ಆದರೆ ಅವರು ಈ ಘಟನೆಯನ್ನು ಗಂಭೀರವಾಗಿ ಪರಿಗಣಿಸಲೇ ಇಲ್ಲ ಎಂದು ಪಿಎಂಕೆ ಆರೋಪಿಸಿದೆ. ಜತೆಗೆ, ಪ್ರಕರಣದಬಗ್ಗೆ ಸಿಬಿಐ ಅಥವಾ ಸುಪ್ರೀಂ ಕೋರ್ಟ್ ನ್ಯಾಯಮೂರ್ತಿಯಿಂದ ತನಿಖೆ ಯಾಗಬೇಕು ಎಂದು ಆಗ್ರಹಿಸಿದೆ.