ಜಮ್ಮುವಿನಲ್ಲಿ ದಾಖಲೆ ಮತ

ನವದೆಹಲಿ: ಜಮ್ಮು ಮತ್ತು ಕಾಶ್ಮೀರದಲ್ಲಿ ಮಂಗಳವಾರ ಆರಂಭವಾದ ವಿಧಾನಸಭೆಯ ಮೊದಲ ಹಂತದ ಚುನಾವಣೆ ಇತಿಹಾಸ ಬರೆದಿದೆ. ಒಂದೆಡೆ ಶಾಂತಿ, ಮತ್ತೊಂದೆಡೆ ದಾಖಲೆ ಮತದಾನದ ಮೂಲಕ ಜನತೆ ಪ್ರತ್ಯೇಕತಾವಾದಿಗಳು ಮತ್ತು ಪಾಕ್ ಪ್ರಾಯೋಜಿತ ಉಗ್ರರಿಗೆ ಉತ್ತರ ನೀಡಿದ್ದಾರೆ.

ವಿಶೇಷವೆಂದರೆ ಚುನಾವಣೆ ನಡೆದ ಭಾಗದಲ್ಲಿ ಒಂದು ಕಡೆಯೂ ಹಿಂಸಾಚಾರವಾಗಿಲ್ಲ. ಜತೆಗೆ ಶೇ. 72.3 ರಷ್ಟು ಮತದಾನವಾಗುವ ಮೂಲಕ ದಾಖಲೆ ನಿರ್ಮಾಣವಾಗಿದೆ. ಇದು ಇನ್ನೂ ಹೆಚ್ಚುವ ಸಾಧ್ಯತೆ ಇದೆ ಎಂಬುದು ಚುನಾವಣಾ ಆಯೋಗದ ಹೆಮ್ಮೆಯ ಮಾತು. ಉಗ್ರರ ಬೆದರಿಕೆಯನ್ನೂ ಲೆಕ್ಕಿಸದೆ ಅಲ್ಲಿನ ನಾಗರಿಕರು ಮತಗಟ್ಟೆಗೆ ಧಾವಿಸಿದ್ದು, ಕೊನೆಯ ಕ್ಷಣವಾದ ಸಂಜೆ 5 ಗಂಟೆಯಾದರೂ ಸರದಿಯಲ್ಲಿ ನಿಂತು ಜನರು ಉತ್ಸಾಹದಿಂದ ಬರುತ್ತಿದ್ದರು ಎಂದಿದೆ.

85ರಲ್ಲಿ 15 ವಿಧಾನಸಭಾ ಕ್ಷೇತ್ರಗಳಿಗೆ ಚುನಾವಣೆ ನಡೆದಿದ್ದು, ಜಮ್ಮು ಭಾಗದಲ್ಲಿ 6, ಕಾಶ್ಮೀರ ವ್ಯಾಪ್ತಿಯಲ್ಲಿ 5 ಹಾಗೂ ಲಡಾಕ್‌ನ 4 ಕಡೆ ಮತದಾನ ನಡೆದಿದೆ. ಪ್ರತ್ಯೇಕತಾವಾದಿಗಳ ಬೆದರಿಕೆಯ ನಡುವೆಯೇ ನಡೆದ ಮತದಾನ 25 ವರ್ಷಗಳ ನಂತರ ಅಭೂತಪೂರ್ವ ಯಶಕಂಡಿದೆ.

ಕಳೆದ ಬಾರಿ ಹಿಂಸಾಚಾರದ ನಡುವೆ ಶೇ.64.97 ರಷ್ಟು ಮತ ಚಲಾವಣೆಯಾಗಿತ್ತು. ಆದರೆ, ಈ ಬಾರಿ ಕೈಗೊಳ್ಳಲಾಗಿರುವ ಭದ್ರತಾ ವ್ಯವಸ್ಥೆ ಅಲ್ಲಿನ ಜನರಲ್ಲಿ ಆತ್ಮವಿಶ್ವಾಸ ಮೂಡಿಸಿದ್ದು, ಮತಗಟ್ಟೆಯತ್ತ ಕಾಲಿಡುವಂತೆ ಮಾಡಿದೆ. ಜಾರ್ಖಂಡ್‌ನಲ್ಲಿಯೂ ಶೇ.62ರಷ್ಟೂ ಮತದಾನವಾಗಿದ್ದು, ಅಲ್ಲಲ್ಲಿ  ಸಣ್ಣಪುಟ್ಟ ಹಿಂಸಾಚಾರಗಳು ನಡೆದಿವೆ.