ವಾಜಪೇಯಿಯಂಥ ದೇಶಭಕ್ತ ಭಾರತ ರತ್ನಕ್ಕೆ ಅರ್ಹ: ಆಡ್ವಾಣಿ

ನವದೆಹಲಿ: ಮಾಜಿ ಪ್ರಧಾನಿ ಅಟಲ್ ಬಿಹಾರಿ ವಾಜಪೇಯಿ ಅವರಿಗೆ ದೇಶದ ಅತ್ಯುತ್ನತ ಗೌರವವಾದ ಭಾರತ ರತ್ನ ನೀಡಬೇಕೆನ್ನುವ ಆಗ್ರಹಕ್ಕೆ ಪಕ್ಷದ ಹಿರಿಯ ಮುಖಂಡ ಎಲ್.ಕೆ ಆಡ್ವಾಣಿ ಅವರ ಬೆಂಬಲವೂ ಸಿಕ್ಕಿದೆ. ಭಾರತ ರತ್ನವನ್ನು ಅವರ ಕರ್ತವ್ಯಕ್ಕೆ ನೀಡಿದ ಪುರಸ್ಕಾರ ಎಂದು ಭಾವಿಸಿ ನೀಡಬಾರದು ಬದಲಾಗಿ ವಾಜಪೇಯಿ ವ್ಯಕ್ತಿತ್ವವನ್ನು ಗೌರವಿಸುವ ಪ್ರಶಸ್ತಿಯ ರೂಪದಲ್ಲಿ ನೀಡಬೇಕು. ವಾಜಪೇಯಿಯಂಥ ದೇಶಭಕ್ತರು ಭಾರತ ರತ್ನಕ್ಕೆ ಅರ್ಹರಾಗಿದ್ದಾರೆ ಎಂದು ಸಂದರ್ಶನವೊಂದರಲ್ಲಿ ಆಡ್ವಾಣಿ ಅಭಿಪ್ರಾಯ ಪಟ್ಟಿದ್ದಾರೆ,

ಸಾಧ್ಯತೆ ಇಲ್ಲದಿಲ್ಲ: ದೇಶದಲ್ಲಿ ಮತ್ತೊಮ್ಮೆ ಸಮ್ಮಿಶ್ರ ರಾಜಕೀಯ  ವಾಪಸಾದರೂ ಆಗಬಹುದು ಎಂದು ಆಡ್ವಾಣಿ ಹೇಳಿದ್ದಾರೆ. ಭಾರತದಂಥ ವೈವಿಧ್ಯ ದೇಶದಲ್ಲಿ ಈ ರೀತಿಯ ಸಾಧ್ಯತೆ ತಳ್ಳಿ ಹಾಕುವಂತಿಲ್ಲ. ಹಾಗಾಗಿ ನಮ್ಮ ದೇಶದಲ್ಲಿ ಎಲ್ಲ ರೀತಿಯ ಪರಿಸ್ಥಿತಿಗೂ ನಾವು ಸಿದ್ಧವಾಗಿರಬೇಕು ಎಂದು ಅವರು ಹೇಳಿದ್ದಾರೆ. ಕೇಂದ್ರದಲ್ಲಿ ಬಿಜೆಪಿ ನರೇಂದ್ರ ಮೋದಿ ನೇತೃತ್ವದಲ್ಲಿ ಇದೇ ಮೊದಲ ಬಾರಿಗೆ ಬಿಜೆಪಿ ಸ್ವಂತ ಬಲದಿಂದ ಅಧಿಕಾರಕ್ಕೇರಿದ್ದರೂ ಆಡ್ವಾಣಿ ಈ  ರೀತಿ ಹೇಳಿಕೆ ನೀಡಿರುವುದು ಸಾಕಷ್ಟು ಕುತೂಹಲ ಮೂಡಿಸಿದೆ.