'ದಸರಾ ಉದ್ಘಾಟನೆ ಮಾಡುವಷ್ಟು ದೊಡ್ಡವನು ನಾನಲ್ಲ, ಮಹನೀಯರು ಹಚ್ಚಿದ ದೀಪ ಆರದಿರಲಿ ಎಂದು ಪ್ರಾರ್ಥಿಸಲಿಕ್ಕೆ ಬಂದಿದ್ದೇನೆ': ಗವಿಸಿದ್ಧೇಶ್ವರ ಶ್ರೀಗಳು; Video

ಈ ದಸರಾ ಮಹೋತ್ಸವ ತುಂಗಭದ್ರ ತೀರದಿಂದ, ಕಾವೇರಿಯ ತೀರಕ್ಕೇ ಹರಿದುಬಂದಿದೆ. ಮಹಾನವಮಿ ದಿಬ್ಬದಿಂದ ಮೈಸೂರಿಗೆ ಹಬ್ಬವಾಗಿ ಬಂದಿದೆ ಈ ದಸರೆ ಇದು. ಒಂದು ಕಾಲಕ್ಕೆ ಯಾವ ದಸರಾ ಕೇವಲ ದೊರೆಗಳು ಹಬ್ಬವಾಗಿತ್ತೋ ಇಂದು ಅದೂ ದರೆಯ ಹಬ್ಬವಾಗಿ ವಿಶ್ವ ವಿಖ್ಯಾತ ಮೈಸೂರು ದಸರಾ ಹಬ್ಬವಾಗಿದೆ ಎಂದು ಕೊಪ್ಪಳದ ಗವಿಮಠದ ಅಭಿನವ ಗವಿಸಿದ್ದೇಶ್ವರ ಮಹಾಸ್ವಾಮೀಜಿಗಳು ಹೇಳಿದರು.

ವಿಶ್ವವಿಖ್ಯಾತ ಮೈಸೂರು ದಸರಾವನ್ನು ಇಂದು ಚಾಮುಂಡಿ ಬೆಟ್ಟದ ಸನ್ನಿಧಿಯಲ್ಲಿ ಸರ್ಕಾರ ವತಿಯಿಂದ ಉದ್ಘಾಟಿಸಿ ಮಾತನಾಡಿದ ಅವರು, ಮೈಸೂರು ಕರ್ನಾಟಕದ ಹಾಗೂ ಭಾರತದ ಕಿರೀಟ. ಮೈಸೂರು ಕನ್ನಡಿಗರೆಲ್ಲರ ಹೆಮ್ಮೆ, ಮೈಸೂರು ಸಾಂಸ್ಕೃತಿಕ ನಗರಿ, ಸಂಸ್ಕಾರವಂತರ ನಗರ, ಅರಿವಿನ ಜನರಿರುವ ನಗರ ಎಂದರು.

ದಸರಾ ಮಹೋತ್ಸವ ತುಂಗಭದ್ರೆ ತೀರದಿಂದ ಕಾವೇರಿ ತೀರದವರೆಗೆ ಹರಿದುಬಂದಿದೆ. ಮಹಾನವಮಿ ದಿಬ್ಬದಿಂದ ಮೈಸೂರಿಗೆ ಹಬ್ಬವಾಗಿ ಬಂದಿದೆ. ಒಂದು ಕಾಲಕ್ಕೆ ಯಾವ ದಸರಾ ದೊರೆಗಳ ಹಬ್ಬವಾಗಿತ್ತೋ, ಇಂದು ಧರೆಯ ಹಬ್ಬವಾಗಿ ವಿಶ್ವವಿಖ್ಯಾತವಾಗಿದೆ.

ಮೈಸೂರು ದಸರಾ ಉದ್ಘಾಟನೆ ಮಾಡುವಷ್ಟು ದೊಡ್ಡವನು ನಾನಲ್ಲ, ನಮ್ಮ ದೇಶದ ಅನೇಕ ಮಹನೀಯರು ಮೈಸೂರು ದಸರಾ ಉದ್ಘಾಟಿಸಿದ್ದಾರೆ. ನಾನು ಬಂದಿದ್ದು, ಚಾಮುಂಡಿ ಸನ್ನಿಧಿಯಲ್ಲಿ ಪ್ರಾರ್ಥಿಸಿ ಹಿಂದೆ ಎಲ್ಲ ಹಿರಿಯರು ನಿನ್ನ ಸನ್ನಿಧಿಯಲ್ಲಿ ಹಚ್ಚಿದ ಕನ್ನಡದ ದೀಪ ಆರದಿರಲಿ ಎಂದು ಪ್ರಾರ್ಥಿಸಲಿಕ್ಕೆ ಬಂದಿದ್ದೇನೆ ಎಂದರು.

ನಾನು ಜೋಳಿಗೆಯ ಜಂಗಮನಷ್ಟೆ, ಪ್ರಾರ್ಥಿಸಬಹುದು, ಕನ್ನಡಿಗರ ಪರವಾಗಿ ಕೈಮುಗಿದು ಬೆಳಕು ಹಚ್ಚಿದೆ, ತಾಯಿ ಚಾಮುಂಡಿ ಬೆಳಕು ನೀಡಬೇಕು, ಈ ನಾಡಿಗೆ ಪ್ರಾರ್ಥನೆ ಮಾಡಲು ಬಂದೆ. ತಾಯಿ ಚಾಮುಂಡಿ ಶಕ್ತಿಯ ಟವರ್, ಅದಕ್ಕಾಗಿ ಇಲ್ಲಿ ಬಂದು ಪ್ರಾರ್ಥನೆ ಮಾಡಿದೆ ಎಂದರು.

ಮೈಸೂರು ದಸರಾ ಗತವೈಭವ, ವರ್ತಮಾನದ ಉತ್ಸಾಹ, ನಾಡಿನ ಭವಿಷ್ಯಕ್ಕೊಂದು ದಿಕ್ಸೂಚಿ ನೀಡುತ್ತದೆ, ದಸರಾ ಭೂತ, ವರ್ತಮಾನ, ಭವಿಷ್ಯಗಳ ಸಂಗಮ ಎಂದರು.