ರಾಜ್ಯದಲ್ಲಿ ಕಳೆದ ಮೂರು ವರ್ಷಗಳಲ್ಲಿ ಕೌಟುಂಬಿಕ ಹಿಂಸಾಚಾರ ಪ್ರಕರಣಗಳಲ್ಲಿ ತೀವ್ರ ಹೆಚ್ಚಳ!

ಮೈಸೂರು: ಆತಂಕಕಾರಿ ಬೆಳವಣಿಗೆಯಲ್ಲಿ, ಕಳೆದ ಮೂರು ವರ್ಷಗಳಲ್ಲಿ ರಾಜ್ಯಾದ್ಯಂತ ಮಹಿಳೆಯರ ಮೇಲಿನ ಕೌಟುಂಬಿಕ ದೌರ್ಜನ್ಯ ಪ್ರಕರಣಗಳು ತೀವ್ರವಾಗಿ ಏರಿಕೆಯಾಗಿವೆ.

ಕರ್ನಾಟಕ ರಾಜ್ಯ ಮಹಿಳಾ ಆಯೋಗದ ಇತ್ತೀಚಿನ ಮಾಹಿತಿಯ ಪ್ರಕಾರ, ಆಯೋಗವು 2023-24 ರಲ್ಲಿ ಒಟ್ಟು 2,179 ದೂರುಗಳನ್ನು ಸ್ವೀಕರಿಸಿತ್ತು. 2024-25 ರಲ್ಲಿ 2,907 ದೂರುಗಳನ್ನು ಮತ್ತು 2025-26 ರಲ್ಲಿ(ಜನವರಿ 2026 ರವರೆಗೆ) 4,482 ದೂರುಗಳನ್ನು ಸ್ವೀಕರಿಸಿದೆ.

2023-24 ರಲ್ಲಿ 434 ಕೌಟುಂಬಿಕ ದೌರ್ಜನ್ಯ ದೂರುಗಳಾಗಿದ್ದು, ಈ ಸಂಖ್ಯೆ 2024-25 ರಲ್ಲಿ 458 ಕ್ಕೆ ಏರಿತ್ತು ಮತ್ತು 2025-26 ರಲ್ಲಿ(ಏಪ್ರಿಲ್ 2025 ರಿಂದ ಜನವರಿ 2026 ರವರೆಗೆ) 668 ಕ್ಕೆ ಏರಿಕೆಯಾಗಿದೆ.

ಸಂತ್ರಸ್ತರು, ಪೊಲೀಸರು ಮತ್ತು ಕಾನೂನು ಸೇವೆಗಳ ನಡುವೆ ಸೇತುವೆಯಾಗಿ ಕಾರ್ಯನಿರ್ವಹಿಸುವ ಮಹಿಳಾ ಆಯೋಗವು 2023-24ರಲ್ಲಿ 434 ಪ್ರಕರಣಗಳನ್ನು, 2024-25ರಲ್ಲಿ 450 ಪ್ರಕರಣಗಳನ್ನು (ಇನ್ನೂ ಎಂಟು ಪ್ರಕರಣಗಳು ಬಾಕಿ ಉಳಿದಿವೆ) ಮತ್ತು 2025-26ರಲ್ಲಿ 472 ಪ್ರಕರಣಗಳನ್ನು ಪರಿಹರಿಸಿದೆ.

ಕೌಟುಂಬಿಕ ಹಿಂಸಾಚಾರದ ಹೊರತಾಗಿ, ರಕ್ಷಣೆ ಕೋರಿ, ವರದಕ್ಷಿಣೆ ಕಿರುಕುಳ, ಕೆಲಸದ ಸ್ಥಳದಲ್ಲಿ ಕಿರುಕುಳ, ಪೊಲೀಸ್ ಕಿರುಕುಳ ಮತ್ತು ಲೈಂಗಿಕ ಕಿರುಕುಳಕ್ಕೆ ಸಂಬಂಧಿಸಿದ ದೂರುಗಳಿಂದ ಆಯೋಗ ತುಂಬಿದೆ. ತನಿಖಾ ಮತ್ತು ಮಧ್ಯವರ್ತಿ ಸಂಸ್ಥೆಯಾಗಿ ಕಾರ್ಯನಿರ್ವಹಿಸುವ ಇದು ಪೊಲೀಸ್ ತನಿಖೆಗಳನ್ನು ಮೇಲ್ವಿಚಾರಣೆ ಮಾಡುತ್ತದೆ. ಸಾರ್ವಜನಿಕ ವಿಚಾರಣೆಗಳನ್ನು ನಡೆಸುತ್ತದೆ.

2023-24ರಲ್ಲಿ ರಕ್ಷಣೆ ಕೋರಿ 586 ದೂರುಗಳು, 2024-25ರಲ್ಲಿ 943 ಮತ್ತು 2025-26ರಲ್ಲಿ 1,289 ಕ್ಕೆ ಏರಿದೆ ಎಂದು ಡೇಟಾ ತೋರಿಸುತ್ತದೆ. ಲೈಂಗಿಕ ಕಿರುಕುಳದ ಪ್ರಕರಣಗಳು ಮೂರು ವರ್ಷಗಳಲ್ಲಿ ಕ್ರಮವಾಗಿ 26, 29 ಮತ್ತು 30 ರಷ್ಟಿವೆ. ಕೆಲಸದ ಸ್ಥಳದಲ್ಲಿ ಮಹಿಳೆಯರ ಮೇಲಿನ ಲೈಂಗಿಕ ದೌರ್ಜನ್ಯದ ದೂರುಗಳು 2023-24ರಲ್ಲಿ 95 ರಿಂದ 2024-25ರಲ್ಲಿ 131 ಕ್ಕೆ ಏರಿದೆಯ ನಂತರ 2025-26ರಲ್ಲಿ 123ಕ್ಕೆ ಸ್ವಲ್ಪ ಇಳಿದಿದೆ. ಏತನ್ಮಧ್ಯೆ, "ಪ್ರೇಮ ಸಂಬಂಧಿತ" ಪ್ರಕರಣಗಳು ಸಹ ಅದೇ ಅವಧಿಯಲ್ಲಿ 29 ರಿಂದ 45 ಕ್ಕೆ ಏರಿದ್ದು, ಕಳೆದ ವರ್ಷ 62 ಕ್ಕೆ ಏರಿದೆ.

ದಿ ನ್ಯೂ ಇಂಡಿಯನ್ ಎಕ್ಸ್‌ಪ್ರೆಸ್‌ನೊಂದಿಗೆ ಮಾತನಾಡಿದ ಕರ್ನಾಟಕ ರಾಜ್ಯ ಮಹಿಳಾ ಆಯೋಗದ ಅಧ್ಯಕ್ಷೆ ನಾಗಲಕ್ಷ್ಮಿ ಚೌಧರಿ, ನಗರ ಪ್ರದೇಶಗಳಿಗಿಂತ ಗ್ರಾಮೀಣ ಪ್ರದೇಶಗಳಲ್ಲಿ ಕೌಟುಂಬಿಕ ಹಿಂಸಾಚಾರ ಪ್ರಕರಣಗಳು ಹೆಚ್ಚಾಗಿ ವರದಿಯಾಗುತ್ತವೆ ಎಂದು ಹೇಳಿದ್ದಾರೆ.

"ಇಂದು, ಮಹಿಳೆಯರು ಹೆಚ್ಚು ವಿದ್ಯಾವಂತರು ಮತ್ತು ಆರ್ಥಿಕವಾಗಿ ಸ್ವತಂತ್ರರಾಗಿದ್ದಾರೆ. ಕಾನೂನು ಹಕ್ಕುಗಳ ಬಗ್ಗೆ ಹೆಚ್ಚಿನ ಅರಿವಿನೊಂದಿಗೆ, ಅವರು ದೂರುಗಳನ್ನು ದಾಖಲಿಸಲು ಹೆಚ್ಚು ಹೆಚ್ಚು ಮುಂದೆ ಬರುತ್ತಿದ್ದಾರೆ" ಎಂದು ಅವರು ತಿಳಿಸಿದ್ದಾರೆ.