ಫೆಬ್ರವರಿಯಲ್ಲಿ ಬೆಂಗಳೂರು ಅಂತರಾಷ್ಟ್ರೀಯ ವಿಮಾನ ನಿಲ್ದಾಣ ಹೊಸ ದಾಖಲೆ: ಪ್ರಯಾಣಿಕರು, Flight ಗಳ ಸಂಖ್ಯೆಯಲ್ಲಿ ಗರಿಷ್ಠ ಏರಿಕೆ

ಬೆಂಗಳೂರು: ಫೆಬ್ರವರಿ ಕೊನೆಯ ವಾರದಲ್ಲಿ ಬೆಂಗಳೂರಿನ ಕೆಂಪೇಗೌಡ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣ ಹೊಸ ದಾಖಲೆಗೆ ಸಾಕ್ಷಿಯಾಗಿತ್ತು. ಮೇ 24, 2008 ರಂದು ಪ್ರಾರಂಭವಾದಾಗಿನಿಂದ ಇದೇ ಮೊದಲು ಪ್ರಯಾಣಿಕರು ಮತ್ತು ವಿಮಾನ ಹಾರಾಟದ ದಾಖಲೆಯನ್ನು ಮುರಿದಿದೆ.

ಫೆಬ್ರವರಿ 23 ರಂದು ಒಂದೇ ದಿನದಲ್ಲಿ ಅತಿ ಹೆಚ್ಚು ಪ್ರಯಾಣಿಕರು ದಾಖಲಾಗಿದ್ದು1,29,466 ವಿಮಾನಯಾನ ಸಂಸ್ಥೆಗಳು ವಿಮಾನ ನಿಲ್ದಾಣದ ಮೂಲಕ ಹಾದು ಹೋಗಿವೆ. ಸರಾಸರಿ, ವಿಮಾನ ನಿಲ್ದಾಣವು ಪ್ರತಿದಿನ ಸುಮಾರು 1,18,000 ಪ್ರಯಾಣಿಕರನ್ನು ನಿರ್ವಹಿಸುತ್ತದೆ ಎಂದು KIA ನಿರ್ವಹಿಸುವ ಬೆಂಗಳೂರು ಅಂತರಾಷ್ಟ್ರೀಯ ವಿಮಾನ ನಿಲ್ದಾಣ ಲಿಮಿಟೆಡ್‌ನ ಮುಖ್ಯ ಕಾರ್ಯಾಚರಣಾ ಅಧಿಕಾರಿ (COO) ಸತ್ಯಕಿ ರಘುನಾಥ್ ದಿ ನ್ಯೂ ಇಂಡಿಯನ್ ಎಕ್ಸ್ ಪ್ರೆಸ್ ಗೆ ತಿಳಿಸಿದ್ದಾರೆ.

ಅದಾದ ನಂತರದ ನಾಲ್ಕು ದಿನಗಳಲ್ಲಿ ವಿಮಾನಗಳ ಟೇಕ್‌ಆಫ್ ಮತ್ತು ಲ್ಯಾಂಡಿಂಗ್‌ನಲ್ಲಿ ಅದು ತನ್ನ ಸಾರ್ವಕಾಲಿಕ ದಾಖಲೆಯನ್ನು ಮುರಿದಿದೆ. "ಫೆಬ್ರವರಿ 27 ರಂದು, ನಾವು 795 ವಿಮಾನ ಯಾನ ಸಂಚಾರ ದಾಖಲಿಸಿದ್ದೇವೆ, ಇದು ನಮಗೆ ಮತ್ತೊಂದು ಪ್ರಮುಖ ಮೈಲಿಗಲ್ಲು ಎಂದು ಹೇಳಿದ್ದಾರೆ.

ವಿಮಾನ ನಿಲ್ದಾಣದ ಅಸ್ತಿತ್ವದಲ್ಲಿರುವ ರನ್‌ವೇಗಳನ್ನು ಸಂಪರ್ಕಿಸುವ ವೆಸ್ಟರ್ನ್ ಕ್ರಾಸ್‌ಫೀಲ್ಡ್ ಟ್ಯಾಕ್ಸಿವೇ (WCT) ಒಂದು ಪ್ರಮುಖ ಮೂಲಸೌಕರ್ಯ ಕಾರ್ಯದಲ್ಲಿ ಪ್ರಗತಿಯಲ್ಲಿದೆ ಎಂದು ತಿಳಿಸಿದ್ದಾರೆ.

WCT ಎರಡು ಹೊಸ ಸಮಾನಾಂತರ ಟ್ಯಾಕ್ಸಿವೇಗಳನ್ನು ನಿರ್ಮಿಸಲು ಮುಂದಾಗಿದೆ, ಇದು ವಿಮಾನ ನಿಲ್ದಾಣದ ಪಶ್ಚಿಮ ಭಾಗದಲ್ಲಿ ಅಸ್ತಿತ್ವದಲ್ಲಿರುವ ಉತ್ತರ ಮತ್ತು ದಕ್ಷಿಣ ರನ್‌ವೇಗಳನ್ನು ಸಂಪರ್ಕಿಸುತ್ತದೆ. ನಿರ್ಮಾಣ ಕಾರ್ಯ ಪ್ರಾರಂಭವಾಗಿದೆ ಮತ್ತು ಯೋಜನೆಯನ್ನು 2027 ರ ಆರಂಭದ ವೇಳೆಗೆ ಕಾರ್ಯರೂಪಕ್ಕೆ ತರಲು ನಿರ್ಧರಿಸಲಾಗಿದೆ ಎಂದು ಸತ್ಯಕಿ ರಘುನಾಥ್ ವಿವರಿಸಿದ್ದಾರೆ.

ಹೊಸ ಟ್ಯಾಕ್ಸಿವೇಗಳು ಟ್ಯಾಕ್ಸಿ ಸಮಯವನ್ನು (ವಿಮಾನವು ಇಳಿಯುವ ಮೊದಲು ಅಥವಾ ಅದು ಟೇಕ್ ಆಫ್ ಆದ ನಂತರ ನೆಲದ ಮೇಲೆ ಕಳೆಯುವ ಸಮಯ) ಗಮನಾರ್ಹವಾಗಿ ಸುಧಾರಿಸುತ್ತದೆ, ವಿಶೇಷವಾಗಿ ದಕ್ಷಿಣ ರನ್‌ವೇಯಿಂದ ನಿರ್ಗಮಿಸುವ ಅಥವಾ ಆಗಮಿಸುವ ವಿಮಾನಗಳಿಗೆ ಇದರಿಂದ ಹೆಚ್ಚು ಪ್ರಯೋಜನವಾಗಲಿದೆ. ಇದು ಸಮಯ ಉಳಿತಾಯ ಮತ್ತು ಹೆಚ್ಚು ಪರಿಣಾಮಕಾರಿ ಕಾರ್ಯಾಚರಣೆಗಳಿಗೆ ಕಾರಣವಾಗುತ್ತದೆ ಎಂದು ಅವರು ವಿವರಿಸಿದರು.

T2 ಗಾಗಿ ಘೋಷಿಸಲಾದ ಪೂರ್ಣ-ದೇಹ ಸ್ಕ್ಯಾನರ್‌ಗಳನ್ನು ಕಾರ್ಯಗತಗೊಳಿಸುವಲ್ಲಿನ ವಿಳಂಬದ ಕುರಿತು ಮಾತನಾಡಿದ ಅವರು, ಈಗ, ಟರ್ಮಿನಲ್ 2 ರಲ್ಲಿ ಅಂತಹ ಮೂರು ಸ್ಕ್ಯಾನರ್‌ಗಳನ್ನು ಸ್ಥಾಪಿಸಲಾಗಿದೆ ಮತ್ತು ಪ್ರಯೋಗಗಳು ಪೂರ್ಣಗೊಂಡಿವೆ. ಆದಾಗ್ಯೂ, ಅಗತ್ಯ ನಿಯಂತ್ರಕ ಅನುಮೋದನೆಗಳು ಪ್ರಗತಿಯಲ್ಲಿರುವ ಕಾರಣ ಸ್ಕ್ಯಾನರ್‌ಗಳನ್ನು ಇನ್ನೂ ಕಾರ್ಯಗತಗೊಳಿಸಬೇಕಾಗಿದೆ ಎಂದು ತಿಳಿಸಿದ್ದಾರೆ.

ವೈಯಕ್ತಿಕಗೊಳಿಸಿದ ಡಿಜಿಟಲ್ ಪ್ರಯಾಣ ಸಂಗಾತಿಯಾದ 'BLR ಪಲ್ಸ್' ಅಪ್ಲಿಕೇಶನ್ ಫ್ಲೈಯರ್‌ಗಳಿಗೆ ತಮ್ಮ ಪ್ರಯಾಣವನ್ನು ಉತ್ತಮವಾಗಿ ಯೋಜಿಸಲು ಮತ್ತು ದೀರ್ಘ ಸರತಿ ಸಾಲುಗಳನ್ನು ತಪ್ಪಿಸಲು ನೆರವಾಗುತ್ತದೆ. ಇದು ಪ್ರವೇಶ ದ್ವಾರಗಳಿಗೆ ನ್ಯಾವಿಗೇಷನ್ ಸಮಯದ ಅಂದಾಜುಗಳು, ಚೆಕ್-ಇನ್ ಕೌಂಟರ್‌ಗಳು ಮತ್ತು ಭದ್ರತಾ ತಪಾಸಣೆಗಳಂತಹ ವಿವಿಧ ಅಂಶಗಳ ಕುರಿತು ನೈಜ-ಸಮಯದ ನವೀಕರಣಗಳನ್ನು ನೀಡುತ್ತದೆ ಎಂದು ಸರತಿ ಸಾಲುಗಳನ್ನು ಕಡಿಮೆ ಮಾಡಲು ತೆಗೆದುಕೊಂಡ ಕ್ರಮಗಳ ಕುರಿತು ಸತ್ಯಕಿ ರಘುನಾಥ್ ಮಾಹಿತಿ ನೀಡಿದ್ದಾರೆ.