ಅವ್ಯವಹಾರ-ಅಧಿಕಾರ ದುರ್ಬಳಕೆ ಬಹಿರಂಗ: ಕರ್ನಾಟಕ ರಾಜ್ಯ ಫಾರ್ಮಸಿ ಕೌನ್ಸಿಲ್ ವಿಸರ್ಜನೆ..!

ಬೆಂಗಳೂರು: ಅವ್ಯವಹಾರ, ಅಕ್ರಮ, ಅಧಿಕಾರ ದುರ್ಬಳಕೆ ಹಿನ್ನೆಲೆಯಲ್ಲಿ ಕರ್ನಾಟಕ ರಾಜ್ಯ ಫಾರ್ಮಸಿ ಪರಿಷತ್‌ (ಕೆಎಸ್‌ಪಿಸಿ)ನ್ನು ರಾಜ್ಯ ಸರ್ಕಾರ ರದ್ದುಪಡಿಸಿದ್ದು, ನಿರ್ವಹಣೆಗೆ ಆಡಳಿತಾಧಿಕಾರಿಯನ್ನು ನೇಮಿಸಿದೆ.

ಸಕಾಲಿಕ ಚುನಾವಣೆ, ಅಧಿಕಾರ ದುರುಪಯೋಗ, ಅಕ್ರಮಗಳ ಕುರಿತು ಗಂಭೀರ ಆರೋಪಗಳು ಸರ್ಕಾರಿ ವಿಚಾರಣೆಯಲ್ಲಿ ಸಾಬೀತಾದ ಹಿನ್ನೆಲೆಯಲ್ಲಿ ರಾಜ್ಯ ಸರ್ಕಾರ ಈ ನಿರ್ಧಾರ ತೆಗೆದುಕೊಂಡಿದೆ ಎಂದು ತಿಳಿದಬಂದಿದೆ.

ಆಹಾರ ಸುರಕ್ಷತೆ ಮತ್ತು ಔಷಧ ಆಡಳಿತ ಆಯುಕ್ತರು (FDA) ಸಲ್ಲಿಸಿದ ವರದಿಯ ಪ್ರಕಾರ, ಕೆಎಸ್‌ಪಿಸಿಸುಮಾರು ಎರಡು ದಶಕಗಳಿಂದ ಸರಿಯಾದ ಚುನಾವಣೆಗಳನ್ನು ನಡೆಸಿಲ್ಲ. ಮಂಡಳಿಯು ಸುಮಾರು 16 ವರ್ಷ ಹಳೆಯದಾಗಿದ್ದರೂ, ಮರುಚುನಾವಣೆ ಇಲ್ಲದೆ ಇಬ್ಬರು ಸದಸ್ಯರು ಸುಮಾರು 20 ವರ್ಷಗಳ ಕಾಲ ಅಧಿಕಾರದಲ್ಲಿದ್ದಾರೆ. ಅದೇ ರೀತಿ, ಸರ್ಕಾರದಿಂದ ನಾಮನಿರ್ದೇಶನಗೊಂಡ ಐದು ಸದಸ್ಯರು 2021 ರಲ್ಲಿ ತಮ್ಮ ಅವಧಿ ಮುಗಿದರೂ, ಹೊಸ ಆದೇಶವಿಲ್ಲದೆ ಅಧಿಕಾರದಲ್ಲಿ ಮುಂದುವರೆದಿದ್ದಾರೆಂದು ತಿಳಿಸಿದೆ.

ಜನವರಿ 28, 2022 ರ ಸರ್ಕಾರಿ ಆದೇಶದ ಪ್ರಕಾರ, ಕೆಎಸ್‌ಪಿಸಿ 10 ಫಾರ್ಮಸಿ ಇನ್ಸ್‌ಪೆಕ್ಟರ್‌ಗಳನ್ನು 15 ನಿರ್ದಿಷ್ಟ ಷರತ್ತುಗಳೊಂದಿಗೆ 11 ತಿಂಗಳ ಕಾಲ ಒಪ್ಪಂದದ ಮೇಲೆ ನೇಮಕ ಮಾಡಿಕೊಳ್ಳಲು ಅವಕಾಶ ನೀಡಲಾಗಿತ್ತು. ಆದಾಗ್ಯೂ, ಅಧ್ಯಕ್ಷರು ಮತ್ತು ರಿಜಿಸ್ಟ್ರಾರ್ ಈ ಷರತ್ತುಗಳನ್ನು ನಿರ್ಲಕ್ಷಿಸಿ, ವೇತನ ಅನುಮೋದನೆಗಾಗಿ ಔಷಧ ನಿಯಂತ್ರಕರನ್ನು ಸಂಪರ್ಕಿಸದೆ ನೇಮಕ ಮಾಡಿದೆ. ನೇಮಕಾತಿಯಲ್ಲಿ ಮೀಸಲಾತಿ ನೀತಿಯನ್ನು ಅನುಸರಿಸಿಲ್ಲ. ಹೆಚ್ಚುವರಿಯಾಗಿ, ಕೌನ್ಸಿಲ್‌ನಲ್ಲಿ ಹಿರಿಯ ಹುದ್ದೆಯಲ್ಲಿ ಕಾರ್ಯನಿರ್ವಹಿಸುತ್ತಿರುವ ಡಾ. ಕ್ರಾಂತಿ ಕುಮಾರ್ ಸಿರ್ಸೆ ಅವರನ್ನು ಸರ್ಕಾರ ಅನುಮತಿಯಿಲ್ಲದೇ ನೇಮಕ ಮಾಡಲಾಗಿದೆ.

ಪರವಾನಗಿ ಪಡೆದ ಔಷಧಿಕಾರರ ಪಟ್ಟಿಯನ್ನು ನಿರ್ವಹಿಸುವುದು ಮತ್ತು ಅನರ್ಹ ವ್ಯಕ್ತಿಗಳು ಔಷಧಗಳನ್ನು ನಿರ್ವಹಿಸುವುದನ್ನು ತಡೆಯುವ ಪ್ರಮುಖ ಜವಾಬ್ದಾರಿಗಳ ನಿಭಾಯಿಸುವಲ್ಲಿಯೂ ಕೆಎಸ್‌ಪಿಸಿ ವಿಫಲವಾಗಿದೆ. ಸರ್ಕಾರ 2016, 2017 ಮತ್ತು ಮತ್ತೆ 2022 ರಲ್ಲಿ ಚುನಾವಣಾ ಅಧಿಕಾರಿಗಳನ್ನು ನೇಮಿಸುವ ಮೂಲಕ ಚುನಾವಣೆಗಳನ್ನು ನಡೆಸಲು ಹಲವು ಬಾರಿ ಪ್ರಯತ್ನಿಸಿದೆ. ಆದರೆಸ ಮಂಡಳಿಯ ಅಗತ್ಯ ಮಾಹಿತಿಗಳನ್ನು ಒದಗಿಸದೆ ಸಹಕಾರ ನೀಡದ ಕಾರಣ ಅದು ಸಾಧ್ಯವಾಗಿಲ್ಲ. ಈ ಕಾರಣದಿಂದಾಗಿ ಸರ್ಕಾರವು ಹೊಸ ಆಡಳಿತ ಮಂಡಳಿಯನ್ನು ರಚಿಸಲು ಸಾಧ್ಯವಾಗಿಲ್ಲ, ಇದರಿಂದ ಹಿಂದಿನ ಸದಸ್ಯರೇ ಹಲವು ವರ್ಷಗಳ ಕಾಲ ಉಸ್ತುವಾರಿ ಮುಂದುವರೆಸಿದ್ದಾರೆಂದು ವರದಿಯಲ್ಲಿ ತಿಳಿಸಿದೆ ಎಂದು ತಿಳಿದುಬಂದಿದೆ.