ಗ್ಯಾಂಬ್ಲಿಂಗ್ ಅಪ್ಲಿಕೇಶನ್‌ ಮೂಲಕ ವಂಚನೆ ಹಣ ವರ್ಗಾವಣೆ: ಸೈಬರ್ ಅಪರಾಧಿಗಳ ಅಕ್ರಮ

ಬೆಂಗಳೂರು: ಹೂಡಿಕೆ ವಂಚನೆ ಪ್ರಕರಣಗಳಲ್ಲಿ ತೊಡಗಿಸಿಕೊಂಡಿರುವ ವಂಚಕರು ಪೊಲೀಸರ ತನಿಖೆಯಿಂದ ತಪ್ಪಿಸಿಕೊಳ್ಳಲು ಆನ್‌ಲೈನ್ ಜೂಜಾಟ ವೇದಿಕೆಗಳ ಮೂಲಕ ಅಕ್ರಮ ಹಣವನ್ನು ಅಕ್ರಮವಾಗಿ ವರ್ಗಾಯಿಸುತ್ತಿದ್ದಾರೆ. ವಂಚಕರು ಮತ್ತು ಆನ್‌ಲೈನ್ ಗ್ಯಾಂಬ್ಲಿಂಗ್ ನಿರ್ವಾಹಕರ ನಡುವೆ ಸಂಪರ್ಕ ಹೆಚ್ಚಿ ಅಕ್ರಮ ವ್ಯವಹಾರಗಳು ನಡೆಯುತ್ತದೆ ಎಂದು ತನಿಖಾಧಿಕಾರಿಗಳು ಹೇಳುತ್ತಾರೆ,

ವಂಚಕರು ಹಗರಣದ ಹಣವನ್ನು ಜೂಜಾಟದ ಅಪ್ಲಿಕೇಶನ್‌ಗಳಲ್ಲಿ ಗೆದ್ದವರಿಗೆ ವರ್ಗಾಯಿಸುತ್ತಾರೆ ಎಂದು ಹಿರಿಯ ಸೈಬರ್ ಅಪರಾಧ ಅಧಿಕಾರಿಯೊಬ್ಬರು ನ್ಯೂ ಇಂಡಿಯನ್ ಎಕ್ಸ್ ಪ್ರೆಸ್ ಪತ್ರಿಕೆಯ ಪ್ರತಿನಿಧಿಗೆ ಹೇಳುತ್ತಾರೆ. ಪ್ರತಿಯಾಗಿ, ಮುಖ್ಯವಾಗಿ USDT ಮೂಲಕ ಅವರು ಕ್ರಿಪ್ಟೋಕರೆನ್ಸಿಯನ್ನು ಪಡೆಯುತ್ತಾರೆ, ನಗರದಲ್ಲಿ ಇತ್ತೀಚಿನ ಪ್ರಕರಣವೊಂದರಲ್ಲಿ 600-800 ವೈಯಕ್ತಿಕ ಬ್ಯಾಂಕ್ ಖಾತೆಗಳಿಗೆ ಸುಮಾರು 20 ಲಕ್ಷ ರೂಪಾಯಿಗಳನ್ನು ಅಕ್ರಮವಾಗಿ ವರ್ಗಾಯಿಸಲಾಗಿದೆ.

ಇಲ್ಲಿ ಪ್ರತಿ ವರ್ಗಾವಣೆ 2 ಸಾವಿರ ರೂಪಾಯಿಗಳಿಂದ 2,500 ರವರೆಗಿನ ಪ್ರತಿಯೊಂದು ವಹಿವಾಟನ್ನು ಒಂದೇ ಡೆಬಿಟ್, ಮಲ್ಟಿಪಲ್ ಕ್ರೆಡಿಟ್‌ಗಳು (SDMC) ಕಾರ್ಯವಿಧಾನವನ್ನು ಬಳಸಿಕೊಂಡು ನಡೆಸಲಾಯಿತು. ಈ ವಹಿವಾಟುಗಳು ನಿಧಿಯ ಮೂಲವನ್ನು ಪತ್ತೆಹಚ್ಚಲು ಕಷ್ಟವಾಗುತ್ತದೆ ಎನ್ನುತ್ತಾರೆ ಅಧಿಕಾರಿಗಳು.

ಯಾವ ರೀತಿ ವಂಚನೆ

ಸೈಬರ್ ವಂಚಕರು ಮೊದಲು ನಕಲಿ ಹೂಡಿಕೆ ಯೋಜನೆಗಳೊಂದಿಗೆ ಮುಗ್ಧ ಜನರನ್ನು ವಂಚಿಸುತ್ತಾರೆ. ಈ ಅಪರಾಧಗಳ ಆದಾಯವನ್ನು ಆನ್‌ಲೈನ್ ಜೂಜಾಟದ ಅಪ್ಲಿಕೇಶನ್‌ಗಳು ನಿರ್ವಹಿಸುವ ಪೂಲಿಂಗ್ ಖಾತೆಗಳಿಗೆ ವರ್ಗಾಯಿಸಲಾಗುತ್ತದೆ, ಅಲ್ಲಿಂದ ಅವರನ್ನು ಲಾಂಡರಿಂಗ್‌ನ ಒಂದು ರೂಪವಾಗಿ ಜೂಜುಕೋರರ ಬ್ಯಾಂಕ್ ಖಾತೆಗಳಿಗೆ ವರ್ಗಾಯಿಸಲಾಗುತ್ತದೆ.

ಗ್ಯಾಂಬ್ಲಿಂಗ್ ಅಪ್ಲಿಕೇಶನ್ ನಿರ್ವಾಹಕರು ಸಾಮಾನ್ಯವಾಗಿ QR ಕೋಡ್‌ಗಳ ಮೂಲಕ ಹಣವನ್ನು ಸ್ವೀಕರಿಸುತ್ತಾರೆ. ಬೆಟ್ಟಿಂಗ್ ವಹಿವಾಟುಗಳಿಗಾಗಿ ಬಳಕೆದಾರರಿಗೆ ವರ್ಚುವಲ್ ಖಾತೆಗಳನ್ನು ನೀಡುತ್ತಾರೆ. ಅನೇಕ ಅಕ್ರಮ ಬೆಟ್ಟಿಂಗ್ ಪ್ಲಾಟ್‌ಫಾರ್ಮ್‌ಗಳು ತಮ್ಮ ಕಾರ್ಯಾಚರಣೆಗಳಿಗಾಗಿ ಮ್ಯೂಲ್ ಖಾತೆಗಳನ್ನು ಅವಲಂಬಿಸಿವೆ. ಇವುಗಳನ್ನು ಈಗ ಬ್ಲಾಕ್ ಮನಿ ಲಾಂಡರಿಂಗ್ ಮಾಡಲು ಬಳಸಲಾಗುತ್ತಿದೆ ಎಂದು ಶಂಕಿಸಲಾಗಿದೆ.

ತನಿಖಾಧಿಕಾರಿಗಳ ಪ್ರಕಾರ, ವಂಚಕರು ಆದಾಯದ ಶೇಕಡಾ 10 ಕ್ಕಿಂತ ಕಡಿಮೆ ಬಹುಮಾನ ಪಾವತಿಗಳಿಗೆ ಖರ್ಚು ಮಾಡುತ್ತಾರೆ. ಸುಮಾರು ಶೇಕಡಾ 20-25 ರಷ್ಟು ಬ್ಯಾಕೆಂಡ್ ಕಾರ್ಯಾಚರಣೆಗಳು ಮತ್ತು ಮ್ಯೂಲ್ ಖಾತೆಗಳನ್ನು ನಿರ್ವಹಿಸುವ ಕಡೆಗೆ ಹೋಗುತ್ತದೆ. ಉಳಿದ 55-60 ಪ್ರತಿಶತವು ಲಾಭವಾಗಿ ಪರಿಗಣಿಸುತ್ತಾರೆ.