ಕೊಡಗಿನ ಫಾರೆಸ್ಟ್ರಿ ಕಾಲೇಜಿನಿಂದ ಅರಣ್ಯೀಕರಣ ಅಭಿಯಾನ, ಸ್ಥಳೀಯ ಮರಗಳಿಗೆ ಉತ್ತೇಜನ

ಮಡಿಕೇರಿ: ಪೊನ್ನಂಪೇಟೆಯಲ್ಲಿರುವ ಅರಣ್ಯ ಕಾಲೇಜು, ಸಕ್ಡೆನ್ ಇಂಡಿಯಾ ಪ್ರೈವೇಟ್ ಲಿಮಿಟೆಡ್ ಸಹಯೋಗದೊಂದಿಗೆ ಕೊಡಗಿನಾದ್ಯಂತ ಅರಣ್ಯೀಕರಣ ಅಭಿಯಾನದಲ್ಲಿ ತೊಡಗಿದೆ. ‘ಸಸ್ಟೈನ್ ಲ್ಯಾಂಡ್‌ಸ್ಕೇಪ್ ಪ್ರಾಜೆಕ್ಟ್’ ಎಂಬ ಉಪಕ್ರಮದ ಅಡಿಯಲ್ಲಿ, ರೈತರಿಗೆ ಸ್ಥಳೀಯ ತಳಿಗಳ ಮರಗಳ ಸಸಿಗಳನ್ನು ವಿತರಿಸಲಾಗುತ್ತಿದೆ ಮತ್ತು ಅವುಗಳನ್ನು ಜಿಲ್ಲೆಯ ಪವಿತ್ರ ತೋಪುಗಳಲ್ಲಿ ನೆಡಲು ಯೋಜನೆ ರೂಪಿಸಲಾಗಿದೆ.

'ಕರಿ ಮರ'(ಡಯೋಸ್ಪೈರೋಸ್ ಎಬೆನಮ್), 'ಕರಡಿಮರ'(ಚುಕ್ರಾಸಿಯಾ ಟ್ಯಾಬ್ಯುಲಾರಿಸ್), 'ಧೂಪ ಮರ' (ವಟೇರಿಯಾ ಇಂಡಿಕಾ), 'ಕರಿ ಧೂಪ'(ಕೆನರಿಯಂ ಸ್ಟ್ರಿಕ್ಟಮ್)... ಇವು ಒಂದು ಕಾಲದಲ್ಲಿ ಕೊಡಗಿನ ಭೂದೃಶ್ಯವನ್ನು ಆವರಿಸಿದ್ದ ಸ್ಥಳೀಯ ಮರಗಳು. 

ಈ ಸ್ಥಳೀಯ ಮರ ಪ್ರಭೇದಗಳು ಜಿಲ್ಲೆಯ ಹಳೆಯ ತಲೆಮಾರಿನ ನಿವಾಸಿಗಳಿಗೆ ಪರಿಚಿತವಾಗಿದ್ದರೂ, ಈಗಿನ ಪೀಳಿಗೆಗೆ ಅವು ವಿದೇಶಿಯಾಗಿ ಕಾಣುತ್ತಿವೆ. ನಗರೀಕರಣದ ಜೊತೆಗೆ ಮರ, ಔಷಧಿಗಳಿಗೆ ಹೆಚ್ಚಿದ ಬೇಡಿಕೆಯು ಈ ಸ್ಥಳೀಯ ಮರಗಳ ಸಂಖ್ಯೆಯನ್ನು ತೀವ್ರವಾಗಿ ಕಡಿಮೆ ಮಾಡಿದೆ. ಸ್ಥಳೀಯ ಮರಗಳ ವೈಭವ ಮರಳಿ ತರುವ ಗುರಿಯೊಂದಿಗೆ, ಸಕ್ಡೆನ್ ಇಂಡಿಯಾ ಪ್ರೈವೇಟ್ ಲಿಮಿಟೆಡ್‌ನ ಬೆಂಬಲದೊಂದಿಗೆ ಪೊನ್ನಂಪೇಟೆ ಅರಣ್ಯ ಕಾಲೇಜ್ ಈ ಯೋಜನೆಯನ್ನು ರೂಪಿಸಿದೆ.

ಇದನ್ನು ಓದಿ: ಕೊಡಗು ಅರಣ್ಯಾಧಿಕಾರಿಗಳಿಂದ ಅಕ್ರಮವಾಗಿ ಮರ ಕಡಿದ ಆಂಧ್ರದ ರಿಯಲ್ಟರ್ ಗಳ ವಿರುದ್ಧ ಕೇಸ್​

ಜಿಲ್ಲೆಯ ರೈತರಿಗೆ ಸ್ಥಳೀಯ ಮರಗಳ ಸಸಿಗಳನ್ನು ವಿತರಿಸಲಾಗುತ್ತಿದೆ. ನಾವು ಈ ಉಪಕ್ರಮವನ್ನು ಕಳೆದ ಮೂರು ವರ್ಷಗಳಿಂದ ನಡೆಸುತ್ತಿದ್ದೇವೆ. ಕಾಲೇಜಿನ ಅಂತಿಮ ವರ್ಷದ ವಿದ್ಯಾರ್ಥಿಗಳು ಸ್ಥಳೀಯ ಮರಗಳು ಮತ್ತು ಕೆಲವು ಆರ್ಥಿಕ ಬೆಳೆಗಳ ಮೊಳಕೆಗಳನ್ನು ಬೆಳೆಸುತ್ತಾರೆ. ವಿದ್ಯಾರ್ಥಿಗಳಿಗೆ ಸಕ್ಡೆನ್‌ನಿಂದ ವಿದ್ಯಾರ್ಥಿ ವೇತನ ಪಾವತಿಸಲಾಗುತ್ತಿದೆ ಮತ್ತು ನಂತರ ಕಾಲೇಜಿನ ನರ್ಸರಿಯಲ್ಲಿ ಬೆಳೆದ ಸಸಿಗಳನ್ನು ರೈತರಿಗೆ ವಿತರಿಸಲಾಗುತ್ತದೆ ಎಂದು ಕಾಲೇಜಿನ ಸಹಾಯಕ ಪ್ರಾಧ್ಯಾಪಕ ಕೆ ನಾಣಯ್ಯ ವಿವರಿಸಿದ್ದಾರೆ.

ವಿದ್ಯಾರ್ಥಿಗಳು ಬೆಳೆದ ಸಸಿಗಳನ್ನು ರೈತರಿಗೆ ಉಚಿತವಾಗಿ ವಿತರಿಸಲಾಗುತ್ತದೆ. ಶೇ. 70 ರಷ್ಟು ಸಸಿಗಳು ಸ್ಥಳೀಯ ಮರಗಳಾಗಿದ್ದರೆ, ಶೇ. 30 ರಷ್ಟು ಸಸಿಗಳು ರೈತರಿಗೆ ಸ್ವಲ್ಪ ಆರ್ಥಿಕ ಲಾಭ ತರುವ ಬೆಳೆಗಳಾಗಿವೆ" ಎಂದು ಅವರು ಹೇಳಿದ್ದಾರೆ.