ಮಡಿಕೇರಿ: ಚೇಲಾವರ ಜಲಪಾತದಲ್ಲಿ ಮುಳುಗಿ ಬೆಂಗಳೂರು ಮೂಲದ ವಿದ್ಯಾರ್ಥಿ ಸಾವು!

ಮಡಿಕೇರಿ: ಪ್ರವಾಸಿ ತಾಣ ಮಡಿಕೇರಿಯ ಚೇಲಾವರ ಜಲಪಾತದ ನೀರಿನಲ್ಲಿ ಮುಳುಗಿ ಬೆಂಗಳೂರು ಮೂಲದ ವಿದ್ಯಾರ್ಥಿಯೋರ್ವ ಸಾವನ್ನಪ್ಪಿರುವ ಘಟನೆ ಭಾನುವಾರ ನಡೆದಿದೆ.

ಸ್ನೇಹಿತರೊಂದಿಗೆ ಚೇಲಾವರ ಜಲಪಾತ ವೀಕ್ಷಣೆಗೆ ತೆರಳಿದ್ದ ಇಂಜಿನಿಯರಿಂಗ್ ವಿದ್ಯಾರ್ಥಿ ದರ್ಶನ್ (22 ವರ್ಷ) ಎಂಬಾತ ನೀರಿನಲ್ಲಿ ಮುಳುಗಿ ಮೃತಪಟ್ಟಿದ್ದು, ನೀರಿನಲ್ಲಿ ಮುಳುಗಿದ ದರ್ಶನ್ ಗಾಗಿ ಶೋಧ ಕಾರ್ಯ  ಆರಂಭಿಸಲಾಗಿದೆ. ಇನ್ನು ಮೂಲತಃ ದರ್ಶನ್ ಕೊಡಗಿನವರಾಗಿದ್ದು, ಇವರ ತಂದೆ ಕಾವೇರಪ್ಪ ಬೆಂಗಳೂರಿನ ಜೆಪಿ ನಗರದ ನಿವಾಸಿಯಾಗಿದ್ದಾರೆ ಎಂದು ತಿಳಿದುಬಂದಿದೆ.

ದರ್ಶನ್ ಸ್ನೇಹಿತರು ಹೇಳಿರುವಂತೆ ದಸರಾ ವೀಕ್ಷಣೆಗೆಂದು ತನ್ನ ಇತರ ನಾಲ್ವರು ಸ್ನೇಹಿತರೊಂದಿಗೆ ದರ್ಶನ್ ಶನಿವಾರ ಮಡಿಕೇರಿ ನಗರಕ್ಕೆ ತೆರಳಿದ್ದರಂತೆ. ಭಾನುವಾರ ಬೆಳಗ್ಗೆ ಚೇಲಾವರ ಜಲಪಾತಕ್ಕೆ ತೆರಳಿ ಸ್ನಾನಕ್ಕೆಂದು  ನೀರಿಗಿಳಿದಿದ್ದು, ಈ ವೇಳೆ ನೀರಿನ ರಭಸ ಹೆಚ್ಚಾಗಿ ದರ್ಶನ್ ನೀರು ಪಾಲಾಗಿದ್ದಾರೆ ಎನ್ನಲಾಗಿದೆ. ಪ್ರಸ್ತುತ ಈ ಸಂಬಂಧ ನಾಪೋಕ್ಲು ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಸಿಬ್ಬಂದಿಗಳು ಶೋಧ ನಡೆಸಿದ್ದಾರೆ.