ಶೌಚಾಲಯ ವಿಚಾರ ಗಲಾಟೆ: ಎಂಜಿನಿಯರಿಂಗ್ ವಿದ್ಯಾರ್ಥಿ ಬಲಿ

ಬೆಂಗಳೂರು; ಶೌಚಾಲಯದ ಬಾಗಿಲು ಮುಚ್ಚುವ ವಿಚಾರಕ್ಕೆ ನಡೆದ ಜಗಳವೊಂದು ಹಾಸ್ಟೆಲ್ ವಿದ್ಯಾರ್ಥಿಯೊಬ್ಬನ ಕೊಲೆಯಲ್ಲಿ ಅಂತ್ಯವಾಗಿದೆ. 

ನಗರ ಹೊರವಲಯದ ಅಂಜನಾನಗರ ಬಿಇಎಲ್ ಬಡಾವಣೆಯ ಒಂದನೇ ಹಂತದಲ್ಲಿ ಗುರುವಾರ ತಡರಾತ್ರಿ ಘಟನೆ ನಡೆದಿದೆ. ಮಾಗಡಿ ತಾಲೂಕು ಸೊಲೂರಿನ ರೋಹಿತ್ (22) ಮೃತ ಎಂಜಿನಿಯರಿಂಗ್ ವಿದ್ಯಾರ್ಥಿಯಾಗಿದ್ದಾನೆ. 

ಹತ್ಯೆಯಾದ ರೋಹಿತ್, ಈಸ್ಟ್ ವೆಸ್ಟ್ ಕಾಲೇಜಿನಲ್ಲಿ ಮೂರನೇ ವರ್ಷದ ಬಿ.ಇ. ವ್ಯಾಸಾಂಗ ಮಾಡುತ್ತಿದ್ದು, ಬಿಇಎಲ್ ಲೇಔಟ್ ನ ಒಂದನೇ ಹಂತದಲ್ಲಿರುವ ದೇವರಾಜ ಅರಸು ಹಿಂದುಳಿದ ವರ್ಗಗಳ ಹಾಸ್ಟೆಲ್ ನಲ್ಲಿದ್ದರು. 

ಇದೇ ಹಾಸ್ಟೆಲ್ ನಲ್ಲಿ ರವೀಶ್ ಸಹ ಇದ್ದು, ವಿಜಯನಗರ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜಿನಲ್ಲಿ ಆತ ಅಂತಿಮ ವರ್ಷದ ಬಿಎ ವ್ಯಾಸಾಂಗ ಮಾಡುತ್ತಿದ್ದ. ಮೃತ ರೋಹಿತ್ ಮತ್ತು ರವೀಶ್ ಹಾಸ್ಟೆಲ್ ನ ಒಂದೇ ರೂಪ್ ನಲ್ಲಿದ್ದರು.

ಬುಧವಾರ ರಾತ್ರಿ 11 ಗಂಟೆ ಸುಮಾರಿಗೆ ರವೀಶ್ ಕುಡಿದ ಮತ್ತಿನಲ್ಲಿ ಹಾಸ್ಟೆಲ್ ಗೆ ಬಂದಿದ್ದಾನೆ. ಶೌಚಾಲಯಕ್ಕೆ ತೆರಳಿದ್ದ ರವೀಶ್, ಬಾಗಿಲು ಹಾಕಿರಲಿಲ್ಲ. ಈ ವೇಳೆ ರೋಹಿತ್ ಬಾಗಿಲು ಹಾಕುವಂತೆ ತಿಳಿಸಿದ್ದಾನೆ. ಇದಕ್ಕೆ ರವೀಶ್ ನಿರಾಕರಿಸಿದ್ದಾನೆ. ನಂತರ ಇಬ್ಬರ ನಡುವೆ ಮಾತಿನ ಚಕಮಕಿ ನಡೆದಿದೆ. ಅಡುಗೆ ಮನೆ ಹೋದ ರವೀಶ್ ಚಾಕುವನ್ನು ತೆಗೆದುಕೊಂಡು ಬಂದು ರೋಹಿತ್ ಗೆ ಇರಿದಿದ್ದಾರೆ. ಈ ವೇಳೆ ಸ್ಥಳದಲ್ಲಿಯೇ ಇದ್ದ ಅಮರೇಶ್ ಎಂಬ ವಿದ್ಯಾರ್ಥಿ ರೋಹಿತ್ ನನ್ನು ರಕ್ಷಿಸಲು ಮುಂದಾಗಿದ್ದಾನೆ. ಈ ವೇಳೆ ಆತನಿಗೂ ಸಣ್ಣಪುಟ್ಟ ಗಾಯಗಳಾಗಿವೆ. 

ಪಕ್ಕ ರೂಮಿನಲ್ಲಿದ್ದ ವಿದ್ಯಾರ್ಥಿಗಳೂ ಕೂಡ ಸ್ಥಳಕ್ಕೆ ಬಂದಿದ್ದಾರೆ, ನಂತರ ರಕ್ತದ ಮಡುವಿನಲ್ಲಿದ್ದ ರೋಹಿತ್ ನನ್ನು ಖಾಸಗಿ ಆಸ್ಪತ್ರೆಗೆ ದಾಖಲಿಸಿದ್ದಾರೆ. ವೈದ್ಯರು ರೋಹಿತ್ ಸಾವನ್ನಪ್ಪಿರುವುದಾಗಿ ತಿಳಿಸಿದ್ದಾರೆ. 

ಮಾಹಿತಿ ತಿಳಿಯುತ್ತಿದ್ದಂತೆಯೇಂ ಬ್ಯಾಡರಹಳ್ಳಿ ಪೊಲೀಸರು ಸ್ಥಳಕ್ಕೆ ಬಂದಿದ್ದಾರೆ. ನಂತರ ಆರೋಪಿ ರವೀಶ್ ನನ್ನು ಬಂಧನಕ್ಕೊಳಪಡಿಸಿದ್ದಾರೆ. 

ರೋಹಿತ್ ಬಹಳ ಉತ್ತಮ ವಿದ್ಯಾರ್ಥಿಯಾಗಿದ್ದ. ರವೀಶ್ ವಿರುದ್ದ ಹಲವು ಬಾರಿ ದೂರುಗಳು ಬಂದಿದ್ದವು. ಪ್ರತೀನಿತ್ಯ ರವೀಶ್ ಹಾಸ್ಟೆಲ್ ಗೆ ತಡವಾಗಿ ಬರುತ್ತಿದ್ದ ಎಂದು ಹಾಸ್ಟೆಲ್ ವಾರ್ಡೆನ್ ಹೇಳಿದ್ದಾರೆ.