ಕಾವೇರಿ ವಿವಾದ ಇತ್ಯರ್ಥಕ್ಕೆ ರಾಷ್ಟ್ರೀಯ ಜಲ ನೀತಿಯೊಂದೇ ಪರಿಹಾರ: ಸಿದ್ದರಾಮಯ್ಯ

ಬೆಂಗಳೂರು: ಎರಡು ರಾಜ್ಯಗಳ ನಡುವಿನ ಪರಿಸ್ಥಿತಿ ಹದಗೆಡಲು ಕಾವೇರಿ ವಿವಾದ ಕಾರಣವಾಗಿದ್ದು, ವಿವಾದ ಇತ್ಯರ್ಥಕ್ಕೆ ರಾಷ್ಟೀಯ ಜಲ ನೀತಿಯೊಂದೇ ಪರಿಹಾರವೆಂದು ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ಹೇಳಿದ್ದಾರೆ.

ವೈಯಾಳಿಕಾವಲ್ ನಲ್ಲಿ ತೆಲುಗು ವಿಜ್ಞಾನ ಸಮಿತಿಯು ನೂತವಾಗಿ ನಿರ್ಮಿಸಿರುವ ಕೃಷ್ಣದೇವರಾಯ ಕಲಾಮಂದಿರ ಲೋಕಾರ್ಪಣೆ ಕಾರ್ಯಕ್ರಮದಲ್ಲಿ ಮಾತನಾಡಿರುವ ಅವರು, ಕಾವೇರಿ ವಿವಾದ ನೆರೆ ರಾಜ್ಯದೊಂದಿಗಿನ ವೈಮನಸ್ಸಿಗೆ ಕಾರಣವಾಗಿದೆ. ಇದರಿಂದ ಸಾಕಷ್ಟು ಸಮಸ್ಯೆಗಳು ಎದುರಾಗುತ್ತಿದೆ. ಎರಡು ರಾಜ್ಯಗಳ ನಡುವಿನ ಪರಿಸ್ಥಿತಿಯನ್ನು ನೋಡಿ. ತಮಿಳುನಾಡಿಗೆ ಸಾಂಬಾ ಕೃಷಿಗೆ ನೀರು ಬೇಕಿದೆ. ಇದಕ್ಕಾಗಿ ನಮ್ಮ ಕುಡಿಯುವ ನೀರನ್ನು ಕಿತ್ತುಕೊಳ್ಳುತ್ತಿದೆ. ನೀರು ಸಮಸ್ಯೆ ಕುರಿತಂತೆ ರಾಜ್ಯದೊಂದಿಗೆ ಮಾತುಕತೆ ಮಾಡುವುದನ್ನು ಬಿಟ್ಟು, ತಮಿಳುನಾಡು ನೇರವಾಗಿ ಸುಪ್ರೀಂ ಮೆಟ್ಟಿಲೇರಿದೆ ಎಂದು ಹೇಳಿದ್ದಾರೆ.

ಮೆಟ್ಟೂರು ಡ್ಯಾಂನಲ್ಲಿ 36 ಟಿಎಂಸಿ ನೀರಿದೆ. ಕರ್ನಾಟಕದ ಜಲಾಶಯಗಳಲ್ಲಿ ಒಟ್ಟಾರಿ 47 ಟಿಎಂಸಿ ನೀರಿದೆ. ಈ ನೀರನ್ನು ಕುಡಿಯಲು ಮತ್ತು ಕೃಷಿಯೇತರ ಕಾರ್ಯಗಳಿಗೆ ಬಳಸಿಕೊಳ್ಳಬೇಕಿದೆ. ತಮಿಳುನಾಡಿನಲ್ಲಿ ಸಾಕಷ್ಟು ನೀರಿದೆ. ಪರಿಸ್ಥಿತಿ ಹೀಗಿದ್ದರೂ ಅವರು ಸುಪ್ರೀಂ ಮೊರೆ ಹೋಗಿದ್ದಾರೆ. ಸರಿಯಾದ ರೀತಿಯ ರಾಷ್ಟ್ರೀಯ ಜಲ ನೀತಿ ಇಲ್ಲದ ಕಾರಣ ಎರಡು ರಾಜ್ಯಗಳ ನಡುವೆ ಸಮಸ್ಯೆಗಳು ಎದುರಾಗುತ್ತಿವೆ.

ಸಮಸ್ಯೆ ಬಗೆಹರಿಕೆಗೆ ಸೂಕ್ತ ರೀತಿಯ ರಾಷ್ಟ್ರೀಯ ಜಲ ನೀತಿಯ ಅಗತ್ಯವಿದೆ. ಸೂಕ್ತ ಜಲ ನೀತಿಯಿಂದ ಸಮಸ್ಯೆ ಬಗೆಹರಿಯಲಿದೆ ಎಂದು ತಿಳಿಸಿದ್ದಾರೆ.