ಬ್ಯಾಟರಾಯನಪುರ ವೃದ್ಧ ದಂಪತಿ ಕೊಲೆ ಪ್ರಕರಣ: ಪೊಲೀಸರಿಂದ ಓರ್ವನ ಬಂಧನ

ಬೆಂಗಳೂರು: ಕೊಡಿಗೆಹಳ್ಳಿ ಸಮೀಪದ ಬ್ಯಾಟರಾಯನಪುರದಲ್ಲಿ ನಡೆದಿದ್ದ ವೃದ್ಧ ದಂಪತಿ ಕೊಲೆ ಪ್ರಕರಣ ಸಂಬಂಧ ಪೊಲೀಸರು ಓರ್ವನನ್ನು ಬಂಧಿಸಿದ್ದಾರೆ.

ಬ್ಯಾಟರಾಯನಪುರದ ವಿನಾಯಕ ಶಾಲೆಯ ಸಮೀಪದ ಮನೆಯಲ್ಲಿ ನಡೆದಿದ್ದ ಜಿಕೆವಿಕೆ ನಿವೃತ್ತ ಉದ್ಯೋಗಿ ಮುನಿಯಪ್ಪ -ವರಲಕ್ಷ್ಮಮ್ಮ ದಂಪತಿ ಕೊಲೆಯಾಗಿತ್ತು. ಈ ಸಂಬಂಧ ದೇವನಹಳ್ಳಿ ತಾಲೂಕಿನ ಮೀಸಗಾನಹಳ್ಳಿ ನಿವಾಸಿ ವೆಂಕಟೇಶ್ ಅಲಿಯಾಸ್ ಪಿಳ್ಳಿ (22) ಬಂಧಿತ ಆರೋಪಿ.

ದಂಪತಿಯ ಮೂರನೇ ಪುತ್ರ ಪೃಥ್ವಿರಾಜ್ ಸ್ನೇಹಿತ ನಿಶಾಂತ್ ಅವರ ಮನೆಯಲ್ಲಿ ಕಾರು ಚಾಲಕನಾಗಿದ್ದ ಹಂತಕ ವೆಂಕಟೇಶ್ ಇವರ ಮನೆಗೆ ಬಂದು ಹೋಗುತ್ತಿದ್ದ. ಚೀಟಿ ಹಾಕಿದ್ದ ವೆಂಕಟೇಶ್ ಪರಿಚಿತರಿಗೆ ಜಾಮೀನು ಹಾಕಿದ್ದ. ಚೀಟಿ ಹಣ ಪಡೆದಿದ್ದ ಅವರು ಹಣ ಕಟ್ಟಿರಲಿಲ್ಲ. ದಂಪತಿಯ ಚೀಟಿ ವ್ಯವಹಾರ ನಡೆಸುತ್ತಿದ್ದರಿಂದ ಸಹಾಯ ಮಾಡುವಂತೆ ವೆಂಕಟೇಶ್ ಕೇಳಿದ್ದ, ಆದರೆ ಹಣ ನೀಡಲು ದಂಪತಿ ನಿರಾಕರಿಸಿದ್ದರು.

ನಂತರ ಕೊಲೆ ಮಾಡಲು ನಿರ್ಧರಿಸಿದ್ದ ವೆಂಕಟೇಶ್ ವರಲಕ್ಷ್ಮಮ್ಮ ಕತ್ತು ಕೊಯ್ದು ಮಾಂಗಲ್ಯ ಸರ ತೆಗೆದುಕೊಂಡು ಅಲ್ಲಿಯೇ ಬಕೆಟ್​ನಲ್ಲಿ ತೊಳೆದು ಬಾಗಿಲು ಹಾಕಿಕೊಂಡು ಹೊರಟಿದ್ದ. ಮೂರು ದಿನದವರೆಗೂ ಕೊಲೆ ಪ್ರಕರಣ ಬೆಳಕಿಗೆ ಬಂದಿರಲಿಲ್ಲ. ಚಿನ್ನದ ಸರವನ್ನು ಮಾರಾಟ ಮಾಡಿದ್ದ ವೆಂಕಟೇಶ್ ಆದ್ರೆ ಮಾಂಗಲ್ಯವನ್ನು ಮಾತ್ರ ತೆಗೆದು ಜೇಬಿನಲ್ಲಿಯೇ ಇಟ್ಟುಕೊಂಡಿದ್ದ.