ಸರಾಸರಿಗಿಂತ ಹೆಚ್ಚು ಮತ್ತು ಕಡಿಮೆ ಅವಧಿ ನಿದ್ದೆ ಮಧುಮೇಹಕ್ಕೆ ರಹದಾರಿ

ವಾಷಿಂಗ್ಟನ್: ಸರಾಸರಿ ಅವಧಿಗಿಂತ ಹೆಚ್ಚು ಅಥವಾ ಕಡಿಮೆ ಹೊತ್ತು ನಿದ್ದೆ ಮಾಡುವುದರಿಂದ ಸಕ್ಕರೆ ಕಾಯಿಲೆ ಬರುವ ಸಾಧ್ಯತೆಯಿದೆ ಎಂದು ಅಧ್ಯಯನವೊಂದರಿಂದ ತಿಳಿದುಬಂದಿದೆ.

ಇಂದು ವಿಶ್ವದಾದ್ಯಂತ ಸುಮಾರು 29 ದಶಲಕ್ಷ ಜನ ಮಧುಮೇಹದಿಂದ ಬಳಲುತ್ತಿದ್ದಾರೆ ಎಂದು ಎಂಡೋಕ್ರೈನ್ ಸೊಸೈಟಿಯ ಎಂಡೋಕ್ರೈನ್ ಅಂಕಿಅಂಶ ತಿಳಿಸುತ್ತದೆ. ಕಳೆದ 50 ವರ್ಷಗಳಲ್ಲಿ ವ್ಯಕ್ತಿಗಳ ಸರಾಸರಿ ನಿದ್ದೆಯ ಅವಧಿ ಸುಮಾರು 2 ಗಂಟೆಯವರೆಗೆ ಕಡಿಮೆಯಾಗಿದೆ ಎನ್ನುತ್ತಾರೆ ಹಿರಿಯ ಲೇಖಕ ಫೆಮ್ಕೆ ರುಟ್ಟರ್ಸ್. ಇದರೊಟ್ಟಿಗೆ ಮಧುಮೇಹಿಗಳ ಸಂಖ್ಯೆ ಜಾಸ್ತಿಯಾಗಿದೆಯಂತೆ.

ಅಧ್ಯಯನಕ್ಕಾಗಿ ಸುಮಾರು 800 ಆರೋಗ್ಯ ವ್ಯಕ್ತಿಗಳನ್ನು ಒಳಪಡಿಸಲಾಯಿತಂತೆ. ಪುರುಷರಲ್ಲಿ ಅಧಿಕ ಮತ್ತು ಕಡಿಮೆ ನಿದ್ದೆ ಇನ್ಸುಲಿನ್ ಗೆ ದೇಹದ ಕೋಶಗಳು ಪ್ರತಿಕ್ರಿಯಿಸುವುದರ ಮೇಲೆ ಪರಿಣಾಮ ಬೀರುತ್ತಿದ್ದು, ಡಯಾಬಿಟಿಸ್ ಹೆಚ್ಚಲು ಕಾರಣವಾಗುತ್ತದೆ. ಮಹಿಳೆಯರಲ್ಲಿ ಇಂತಹ ಯಾವುದೇ ಲಕ್ಷಣ ಕಂಡುಬರುವುದಿಲ್ಲ ಎಂದು ಅಧ್ಯಯನದಿಂದ ತಿಳಿದುಬಂದಿದೆ. ಸರಾಸರಿಗಿಂತ ಹೆಚ್ಚು-ಕಡಿಮೆ ಅವಧಿ ನಿದ್ದೆ ಮಾಡುವವರಲ್ಲಿ ರಕ್ತದೊತ್ತಡ ಪ್ರಮಾಣ ಹೆಚ್ಚಿರುತ್ತದೆ ಎಂದು ಗೊತ್ತಾಗಿದೆ.

ಇನ್ನು ನಿಗದಿತ ಸಮಯಕ್ಕಿಂತ ಹೆಚ್ಚು ಅಥವಾ ಕಡಿಮೆ ಅವಧಿ ನಿದ್ದೆ ಮಾಡುವ ಮಹಿಳೆಯರಲ್ಲಿ ಇನ್ಸುಲಿನ್ ಹಾರ್ಮೋನ್ ಪ್ರತಿಕ್ರಿಯೆ ಹೆಚ್ಚು. ಪುರುಷರಿಗೆ ಹೋಲಿಸಿದರೆ ಮಹಿಳೆಯರಲ್ಲಿ ನಿದ್ದೆಯ ಏರಿಳಿತದಿಂದ ಡಯಾಬಿಟಿಸ್ ಗೆ ಒಳಗಾಗುವವರ ಸಂಖ್ಯೆ ಕಡಿಮೆ.

ಮನುಷ್ಯ ಆರೋಗ್ಯವಾಗಿದ್ದಾಗಲೂ ನಿಗದಿಗಿಂತ ಹೆಚ್ಚು ಅಥವಾ ಕಡಿಮೆ ಅವಧಿ ನಿದ್ದೆ ಮಾಡುವುದು ಆರೋಗ್ಯಕ್ಕೆ ಹಾನಿಕರ ಎಂದು ರುಟ್ಟರ್ಸ್ ಹೇಳುತ್ತಾರೆ. ನಮ್ಮ ದೇಹದ ಆರೋಗ್ಯ ಕಾಪಾಡಲು, ದೇಹಕ್ಕೆ ಶಕ್ತಿ ನೀಡಲು ನಿದ್ದೆ ಹೇಗೆ ಪ್ರಮುಖವಾಗಿದೆ ಎಂಬುದನ್ನು ಈ ಅಧ್ಯಯನ ಸಾರುತ್ತದೆ.

ಈ ಅಧ್ಯಯನ ಕ್ಲಿನಿಕಲ್ ಎಂಡೋಕ್ರಿನಾಲಜಿ ಅಂಡ್ ಮೆಟಬಾಲಿಸಮ್ ಪತ್ರಿಕೆಯಲ್ಲಿ ಪ್ರಕಟಗೊಂಡಿದೆ.