15 ಶರಣರ, 211 ಕಲಾವಿದರ 111 ವಚನಗಳ ನೃತ್ಯ

ಧಾರವಾಡ: ಇಲ್ಲಿಯ ವಿದ್ಯಾವರ್ಧಕ ಸಂಘದಲ್ಲಿ ರತಿಕಾ ನೃತ್ಯನಿಕೇತನದ ವತಿಯಿಂದ ಬಸವ ಜಯಂತಿಯ ಅಂಗವಾಗಿ ವಚನ ನೃತ್ಯ ಸಂಗಮ ಕಾರ್ಯಕ್ರಮ ವಿಶೇಷ ರೀತಿಯಲ್ಲಿ ನಡೆಯಿತು.
ಮೊಟ್ಟ ಮೊದಲ ಬಾರಿಗೆ ಶರಣರ ವಚನಗಳ ಸಾರವನ್ನು ಮಕ್ಕಳ ಮೂಲಕ ಸಮಾಜಕ್ಕೆ ತಲುಪಿಸುವ ನಿಟ್ಟಿನಲ್ಲಿ ಬಸವಣ್ಣ, ಚನ್ನಬಸವಣ್ಣ, ಅಲ್ಲಮಪ್ರಭು, ಅಕ್ಕಮಹಾದೇವಿ, ನೀಲಾಂಬಿಕಾ, ಅಂಬಿಗರ ಚೌಡಯ್ಯ, ಡೋಹರ ಕಕ್ಕಯ್ಯ, ಮಡಿವಾಳ ಮಾಚಯ್ಯ ಸೇರಿದಂತೆ ಸುಮಾರು 15 ಶರಣರ 111 ವಚನಗಳು, 211 ಬಾಲ ಕಲಾವಿದರಿಂದ, ಸತತವಾಗಿ 15 ತಾಸುಗಳ ಕಾಲ ಮೂಡಿಬಂದಿತು.
ಭಾರತೀಯ ಸಂಸ್ಕೃತಿಯ ಪ್ರಸಿದ್ಧ ನೃತ್ಯ ಕಲಾ ಪ್ರಕಾರಗಳಾದ ಭರತನಾಟ್ಯ, ಕಥಕ್, ಕುಚಿಪುಡಿ, ಜನಪದ, ಸೆಮಿ ಕ್ಲಾಸಿಕಲ್ ಶೈಲಿಗಳಲ್ಲಿ ನೃತ್ಯಗಳನ್ನು ಸಂಯೋಜಿಸಿ ದೃಶ್ಯ ಕಾವ್ಯದ ಮೂಲಕ ವಿಭಿನ್ನವಾಗಿ ಪುಟಾಣಿ ಕಲಾವಿದರು ಪ್ರಸ್ತುತಪಡಿಸಿದರು. ಮಕ್ಕಳು ಸತತ 15 ಗಂಟೆಗಳ ಕಾಲ ನಾನಾ ವಚನಗಳಿಗೆ ಮರು ಜನ್ಮ ನೀಡಿದರು. ಸಭಿಕರ ಮನಗೆಲ್ಲುವಲ್ಲೂ ಯಶಸ್ವಿಯಾಯಿತು.