ಮದ್ಯದ ಅಮಲಿನಲ್ಲಿ ಕೊಲೆ

ಬೆಂಗಳೂರು: ಮದ್ಯದ ಅಮಲಿನಲ್ಲಿದ್ದ ಸ್ನೇಹಿತರ ನಡುವೆ ನಡೆದ ಜಗಳ ಓರ್ವನ ಕೊಲೆಯಲ್ಲಿ ಅಂತ್ಯವಾಗಿದೆ.

ಪುಲಕೇಶಿನಗರದ ಡಿಕೋಸ್ಟಾ ಲೇಔಟ್ ನಲ್ಲಿರುವ ನಿರ್ಮಾಣ ಹಂತದಲ್ಲಿರುವ ಕಟ್ಟಡದಲ್ಲಿ ಘಟನೆ ನಡೆದಿದ್ದು, ವಸಂತನಗರ ನಿವಾಸಿ ಗೌತಮ್ (21) ಹತ್ಯೆಗೀಡಾದ ಯುವಕ.

ಪಿಯುಸಿ ಮುಗಿಸಿ ಉದ್ಯೋಗ ಹುಡುಕುತ್ತಿದ್ದ ಗೌತಮ್ ಹಾಗೂ ಸ್ನೇಹಿತ ಅಜಿತ್ ಸೇರಿ ಐದಾರು ಸ್ನೇಹಿತರು ತಡ ರಾತ್ರಿ 1 ಗಂಟೆವರೆಗೆ ಡಿಕೋಸ್ಟಾ ಲೇಔಟ್ ನಲ್ಲಿರುವ ನಿರ್ಮಾಣ ಹಂತದಲ್ಲಿದ್ದ ಕಟ್ಟಡದಲ್ಲಿ ಪಾರ್ಟಿ ಮಾಡಿದ್ದಾರೆ.

ಕಂಠಪೂರ್ತಿ ಕುಡಿದು ಇಸ್ಪೀಟ್ ಆಡಿದ್ದಾರೆ. ಮದ್ಯದ ಅಮಲಿನಲ್ಲಿದ್ದ ಗೌತಮ್ ಎದುರುಗಡೆ ಕುಳಿತಿದ್ದ ಇಬ್ಬರ ಮುಖಕ್ಕೆ ಸಿಗರೇಟ್ ಹೊಗೆಯನ್ನು ಬಿಟ್ಟಿದ್ದಾನೆ. ಈ ವೇಳೆ ಮಾತಿನ ಚಕಮಕಿ ನಡೆದಿದೆ.

ಕೋಪಗೊಂಡ ಇಬ್ಬರು ಯುವಕರು ಗೌತಮ್ ಗೆ ಚಾಕುವಿನಿಂದ ಇರಿದು ಹತ್ಯೆ ಮಾಡಿದ್ದಾರೆ. ರಕ್ತದ ಮಡುವಿನಲ್ಲಿ ಬಿದ್ದಿದ್ದ ಆತನನ್ನು ಅಲ್ಲಿಯೇ ಬಿಟ್ಟು ಪರಾರಿಯಾಗಿದ್ದಾರೆ. ಬೆಳಗ್ಗೆ ಕೂಲಿ ಕಾರ್ಮಿಕರು ಕಟ್ಟಡದ ಕೆಲಸಕ್ಕೆ ಬಂದಾಗ ಪ್ರಕರಣ ಬೆಳಕಿಗೆ ಬಂದಿದೆ.

ಗೌತಮ್ ಗೆ ಅಜಿತ್ ಹೊರತು ಪಡಿಸಿ ಇತರೆ ಯಾರೂ ಗೊತ್ತಿರಲಿಲ್ಲ. ಅವರೇ ಈತನನ್ನು ಕೊಲೆ ಮಾಡಿ ಪರಾರಿಯಾಗಿದ್ದಾರೆ ಎನ್ನಲಾಗಿದೆ. ಆರೋಪಿಗಳ ಪತ್ತೆ ಕಾರ್ಯ ನಡೆದಿದ್ದು, ಅನುಮಾನದ ಮೇಲೆ ನಾಲ್ವರನ್ನು ವಶಕ್ಕೆ ಪಡೆಯಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. ಪುಲಕೇಶಿನಗರ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ.