ಮದನಿ ಪರ ಸಾಕ್ಷ್ಯಕ್ಕೆ ಒತ್ತಡ ಹೇರುತ್ತಿದ್ದಾತ ಸೆರೆ

ಬೆಂಗಳೂರು: ಬೆಂಗಳೂರಿನಲ್ಲಿ 2008ರಲ್ಲಿ ನಡೆದ ಸರಣಿ ಬಾಂಬ್ ಪ್ರಕರಣ ಸಂಬಂಧ ಬಂಧಿತನಾಗಿರುವ ಅಬ್ದುಲ್ ನಾಜೀರ್ ಮದನಿ ಪರವಾಗಿ ನ್ಯಾಯಾಲಯದಲ್ಲಿ ಸಾಕ್ಷಿ ನುಡಿಯುವಂತೆ ಸಾಕ್ಷಿದಾರನ ಮೇಲೆ ಒತ್ತಡ ಹೇರುತ್ತಿರುವುದು ಬೆಳಕಿಗೆ ಬಂದಿದೆ.

ಕೊಚ್ಚಿನ್ ಸಮೀಪ ಇತ್ತೀಚೆಗೆ ನಾಜೀರ್ ಎಂಬಾತನನ್ನು ಕೇರಳ ಪೊಲೀಸರು ಬಂಧಿಸಿದ್ದರು. ವಿಚಾರಣೆ ವೇಳೆ ಕೆಲ ದಾಖಲೆ ಲಭ್ಯವಾಗಿದ್ದವು. ಪರಿಶೀಲನೆ ನಡೆಸಿದಾಗ ಅದರಲ್ಲಿ ಬೆಂಗಳೂರು ಸರಣಿ ಸ್ಪೋಟದ ಸಾಕ್ಷಿಗಳು ಹಾಗೂ ವಿವಿರಗಳು ಇದ್ದವು. ಈ ಬಂಧಿತ ಆರೋಪಿ ಸಾಕ್ಷಿಗಳ ಮೇಲೆ ಒತ್ತಡ ಹೇರಿ ಮದನಿ ಪರವಾಗಿ ಹೇಳಿಕೆಗಳನ್ನು ನ್ಯಾಯಾಲಯದಲ್ಲಿ ನುಡಿಸುವ ಮೂಲಕ ಮದನಿಯನ್ನು ಬಚಾವ್ ಮಾಡಲು ಯೋಜಿಸಿದ್ದ.

ಈ ಬಗ್ಗೆ ಮಾಹಿತಿ ಪಡೆದ ಬೆಂಗಳೂರು ನಗರ ಪೊಲೀಸರ ಒಂದು ತಂಡ ಕೇರಳಕ್ಕೆ ತೆರಳಿದ್ದು ಬಂಧಿತ ಆರೋಪಿ ನಾಜೀರ್ ವಿಚಾರಣೆ ನಡೆಸಿದೆ. ಆರೋಪಿ ಬಳಿ ದಾಖಲೆಗಳ ಪರಿಶೀಲಿಸಿ ಅಗತ್ಯ ಬಿದ್ದರೆ ಆತನನ್ನು ವಶ ತೆಗೆದುಕೊಂಡು ನಗರಕ್ಕೆ ಕರೆತರುವ ಸಾಧ್ಯತೆ ಇದೆ ಎಂದು ಹಿರಿಯ ಪೊಲಿಸ್ ಅಧಿಕಾರಿ ತಿಳಿಸಿದರು.