ರಾಜ್ಯದ 8 ಜಿಲ್ಲೆಗಳಲ್ಲಿ "ಲೋಕಾ" ದಾಳಿ

ಬೆಂಗಳೂರು: ರಾಜ್ಯದ 8 ಜಿಲ್ಲೆಗಳ 14 ಕಡೆಗಳಲ್ಲಿ ಲೋಕಾಯುಕ್ತ ಅಧಿಕಾರಿಗಳು ದಾಳಿ ನಡೆಸಿದ್ದು, ವಿವಿಧ ಇಲಾಖೆಗಳ ಅಧಿಕಾರಿಗಳ ಮನೆ ಮತ್ತು ಕಚೇರಿಗಳಲ್ಲಿ ಶೋಧ ಕಾರ್ಯ ನಡೆಸಿದ್ದಾರೆ.

ಬಾಗಲಕೋಟೆ, ಬೀದರ್, ವಿಜಯಪುರ, ರಾಮನಗರ, ಕೋಲಾರ, ರಾಯಚೂರು, ಮೈಸೂರು, ಗುಲ್ಬರ್ಗಾ  ಜಿಲ್ಲೆಗಳಲ್ಲಿ ಲೋಕೋಪಯೋಗಿ ಇಲಾಖೆ, ಜಲಮಂಡಳಿ, ಅಬಕಾರಿ ಇಲಾಖೆ ಅಧಿಕಾರಿಗಳ ಮನೆ ಮೇಲೆ ಅಧಿಕಾರಿಗಳು ದಾಳಿನಡೆಸಿ, ದಾಖಲೆಗಳ ಪರಿಶೀಲನೆ ನಡೆಸಿದ್ದಾರೆ. ಬಾಗಲಕೋಟೆಯ ಎಇ ಮಲ್ಲಪ್ಪ ಜಮಖಂಡಿಯ ರಾಘವೇಂದ್ರ ಕಾಲೋನಿಯ ನಿವಾಸದ ಮೇಲೆ ಲೋಕಾಯುಕ್ತ ಅಧಿಕಾರಿಗಳು ದಾಳಿ ನಡೆಸಿದ್ದು. ಮನೆಯಲ್ಲಿರುವ ಮಹತ್ವದ ದಾಖಲೆಗಳ ಪರಿಶೀಲನೆ ನಡೆಸಿದ್ದಾರೆ. ಲೋಕಾ ಇನ್ಸ್​​ಪೆಕ್ಟರ್​ ಮುಜಾವರ ಅವರ ನೇತೃತ್ವದಲ್ಲಿ ಈ ದಾಳಿ ನಡೆದಿದೆ. ಇನ್ನು ಬೀದರ್ ಜಿಲ್ಲೆಯ 5 ಕಡೆ ಲೋಕಾಯುಕ್ತ ದಾಳಿ ನಡೆದಿದ್ದು, ಪಿಡಬ್ಲ್ಯುಡಿ ಎಇಇ ಅಶೋಕ್​ ಹೊನ್ನಂಪಲ್ಲಿ ಮನೆ ಮೇಲೆ ದಾಳಿ ನಡೆಸಿ ಮಹತ್ವದ ದಾಖಲೆಗಳನ್ನು ವಶಪಡಿಸಿಕೊಂಡಿದ್ದಾರೆ.

ಶಿವನಗರ, ನೌಬಾದ್​​, ಗುರುನಗರ್, ಶಹಾಗಂಜ್​​​ ಸೇರಿ ಇತರೆ 5 ಕಡೆ ಲೋಕಾ ಇನ್ಸ್​​​ಪೆಕ್ಟರ್​ ಜಾಗೀರ್​ದಾರ್​ ನೇತೃತ್ವದಲ್ಲಿ ದಾಳಿ ನಡೆದಿದೆ. ವಿಜಯಪುರದಲ್ಲಿ ಜಲಮಂಡಳಿ ಎಇಇ ಐ.ಜಿ. ದೇವರ್ ಮನೆ ಮೇಲೆ ಲೋಕಾಯುಕ್ತ ದಾಳಿ ನಡೆದಿದೆ. ಜಲನಗರದ ನಿವಾಸದಲ್ಲಿ ಲೋಕಾಯುಕ್ತ ಎಸ್​ಪಿ ಟಿ.ಬಿ. ಪ್ರಭಾಕರ್ ನೇತೃತ್ವದಲ್ಲಿ ದಾಖಲೆಗಳ ಪರಿಶೀಲನೆ ನಡೆದಿದೆ. ಚನ್ನಪಟ್ಟಣದ ನಗರಸಭೆ ಎಫ್​​ಡಿಎ ನಾಗರಾಜ್ ಮನೆ ಮೇಲೆ ಮತ್ತು ಹಾಸನ ಜಿಲ್ಲೆಯ ನಗರಸಭೆ ಎಫ್​​ಡಿಎ ರಂಗೇಗೌಡ​ ಮನೆ ಮೇಲೆ ಲೋಕಾಯುಕ್ತ ದಾಳಿ ನಡೆದಿದೆ. ಚನ್ನಪಟ್ಟಣದ ಹೌಸಿಂಗ್​ ಬೋರ್ಡ್​ನ ಮನೆಯಲ್ಲಿ ಮೇಲೂ ಕೂಡ ದಾಳಿ ನಡೆದಿದೆ.

ಇನ್ನುಳಿದಂತೆ ರಾಯಚೂರು ನಗರದ ಅಬಕಾರಿ ಎಸ್​ಐ ಹನುಮಂತಪ್ಪ ಮನೆ, ಕಚೇರಿ ಮೇಲೆ ಲೋಕಾಯುಕ್ತ ಅಧಿಕಾರಿಗಳು ದಾಳಿ ನಡೆಸಿದ್ದು, ರಾಯಚೂರಿನ ಆಶಾಪುರ ರಸ್ತೆಯಲ್ಲಿರುವ ಮನೆ, ಡಿಸಿ ಕಚೇರಿ ಬಳಿಯ ಅಬಕಾರಿ ಕಚೇರಿ ಮೇಲೂ ದಾಳಿ ನಡೆದಿದೆ. ಅಧಿಕಾರಿಗಳು ಮಹತ್ವದ ದಾಖಲೆಗಳನ್ನು ಪರಿಶೀಲನೆ ಮಾಡುತ್ತಿದ್ದಾರೆ. ಕೋಲಾರದಲ್ಲಿ ಕೆಜಿಎಫ್​ ಅಬಕಾರಿ ಇಲಾಖೆ ಡಿವೈಎಸ್​​ಪಿ ಚಂದ್ರಪ್ಪ ಅವರ ಮನೆ ಮೇಲೆ ಲೋಕಾಯುಕ್ತ ದಾಳಿ ನಡೆಸಿದ್ದು,  ಕೋಲಾರದ ಬೈರೇಗೌಡ ಬಡಾವಣೆಯಲ್ಲಿರುವ ಮನೆಯಲ್ಲಿ ದಾಖಲೆಗಳ ಪರಿಶೀಲನೆ ನಡೆದಿದೆ.