ಎ.ಜಿ. ಕಚೇರಿಯಲ್ಲಿ ಇಫ್ತಾರ್ ಕೂಟ

ಬೆಂಗಳೂರು: ರಾಜ್ಯ ಹೈಕೋರ್ಟ್‍ ಅಡ್ವೋಕೇಟ್ ಜನರಲ್ ಕಚೇರಿ ವತಿಯಿಂದ ಇಂದು ಇಫ್ತಾರ್ ಕೂಟ ಏರ್ಪಡಿಸಲಾಗಿದೆ.

ಎ.ಜಿ.ಕಚೇರಿಯ ಇತಿಹಾಸದಲ್ಲೇ ಮೊದಲು ಎನ್ನಲಾದ ಈ ಕೂಟದಲ್ಲಿ ಹೈಕೋರ್ಟ್ ಮುಖ್ಯ ನ್ಯಾಯಮೂರ್ತಿಗಳು, ಇತರೆ ನ್ಯಾಯಮೂರ್ತಿಗಳು ಹಾಗೂ ನ್ಯಾಯಾಂಗ ಅಧಿಕಾರಿಗಳು ಸೇರಿದಂತೆ ಸುಮಾರು 75 ಜನರು ಭಾಗವಹಿಸುವ ನಿರೀಕ್ಷೆ ಇದೆ ಎಂದು ಅಡ್ವೋಕೇಟ್ ಜನರಲ್ ಪ್ರೊ.ರವಿವರ್ಮ ಕುಮಾರ್ ಮಾಹಿತಿ ನೀಡಿದ್ದಾರೆ.

ಈ ಇಫ್ತಾರ್ ಕೂಟ ಏರ್ಪಡಿಸಿರುವುದನ್ನು ವಿರೋಧಿಸಿ ಬಿಜೆಪಿ ನಾಯಕ ಗೋ.ಮಧುಸೂಧನ್ ಮುಖ್ಯ ನ್ಯಾಯಮೂರ್ತಿಗಳಿಗೆ ಪತ್ರ ಬರೆದಿರುವ ಕ್ರಮವನ್ನು ಅವರು ಖಂಡಿಸಿದರು. ಈ ಕುರಿತು ಮಾತನಾಡಿದ ರವಿವರ್ಮ ಕುಮಾರ್, ಇದೇ ಹೈಕೋರ್ಟ್ ಆವರಣದಲ್ಲಿ ವಕೀಲರು ವಿಶ್ರಮಿಸಿಕೊಳ್ಳಲು ಸಹ ಸಾಧ್ಯವಾಗದಂತೆ ವಾರಗಟ್ಟಲೆ ಗಣೇಶನ ಮೂರ್ತಿ ಪ್ರತಿಷ್ಠಾಪನಾ ಕಾರ್ಯಕ್ರಮ ನಡೆದಾಗ ಗೋ. ಮಧುಸೂಧನ್ ಏಕೆ ಚಕಾರ ಎತ್ತಲಿಲ್ಲ ಎಂದು ತಿರುಗೇಟು ನೀಡಿದ್ದಾರೆ. ಇಂದು ಸಾಯಂಕಾಲ 6.45ರ ವೇಳೆಗೆ ಹೈಕೋರ್ಟ್ ಆವರಣದಲ್ಲಿರುವ ಶಾಂತಿ ಸಾಗರ್ ಹೊಟೇಲ್ ಬಳಿ ಈ ಇಫ್ತಾರ್ ಕೂಟ ಏರ್ಪಾಡಾಗಿದೆ.