ಪ್ರತ್ಯೇಕ ಅಪಘಾತ ವಿದ್ಯಾರ್ಥಿಗಳಿಬ್ಬರ ಸಾವು

ಬೆಂಗಳೂರು: ನಗರದಲ್ಲಿ ನಡೆದ ಎರಡು ಪ್ರತ್ಯೇಕ ರಸ್ತೆ ಅಪಘಾತಗಳಲ್ಲಿ ಇಬ್ಬರು ವಿದ್ಯಾರ್ಥಿಗಳು ಮೃತಪಟ್ಟಿರುವ ಘಟನೆ ಗುರುವಾರ ನಡೆದಿದೆ.

ವಾಟರ್ ಟ್ಯಾಂಕರ್ ಲಾರಿಯನ್ನು ಓವರ್ ಟೇಕ್ ಮಾಡಲು ಹೋಗಿ ವಿದ್ಯಾರ್ಥಿಯೊಬ್ಬ ಅಪಘಾತಕ್ಕೀಡಾಗಿ ಮೃತ ಪಟ್ಟಿರುವ ಘಟನೆ ಗುರುವಾರ ಸಂಜೆ ಜೆ.ಪಿ.ನಗರದ ಆರ್‍ಬಿಐ ಲೇಔಟ್ ಬಳಿ ನಡೆದಿದೆ.

ಸಂತೃಪ್ತಿ ನಗರದ ನಿವಾಸಿ ಸುರನಾ ಕಾಲೇಜಿನ ಪಿಯುಸಿ ವಿದ್ಯಾರ್ಥಿ ನಯನ್ ನಾಯ್ಡು (18) ಸಾವು. ಜೆ.ಪಿ. ನಗರದ 7ನೇ ಹಂತದ ರಸ್ತೆಯಲ್ಲಿ ಬರುತ್ತಿದ್ದ ವಾಟರ್ ಟ್ಯಾಂಕರ್ ಲಾರಿಯನ್ನು ಓವರ್  ಟೇಕ್ ಮಾಡಲು ನಯನ ನಾಯ್ಡು ವೇಗವಾಗಿ ಬಂದಿದ್ದಾನೆ. ಟ್ಯಾಂಕರ್ ಅನ್ನು ಎಡಗಡೆಯಿಂದ ಓವರ್ ಟೇಕ್ ಮಾಡಲು ಮುಂದಾಗಿದ್ದಾನೆ. ಈ ವೇಳೆ ಎದುರುಗಡೆ ಕಾರು ಬಂದಿದ್ದರಿಂದ ತಕ್ಷಣ ಬ್ರೇಕ್ ಹಾಕಿದ್ದರಿಂದ ಬೈಕ್‍ನ ನಿಯಂತ್ರಣ ಕಳೆದುಕೊಂಡು ಟ್ಯಾಂಕರ್ ಚಕ್ರಕ್ಕೆ ಸಿಲುಕಿ ಗಂಭೀರವಾಗಿ ಗಾಯಗೊಂಡಿದ್ದ. ತಕ್ಷಣ ಸ್ಥಳೀಯ ಆಸ್ಪತ್ರೆಗೆ ದಾಖಲಿಸಲಾಯಿತಾದರೂ ಚಿಕಿತ್ಸೆ ಫಲಕಾರಿಯಾಗಿ  ಮೃತಪಟ್ಟಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಕುಮಾರಸ್ವಾಮಿ ಲೇಔಟ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಮತ್ತೊಂದು ಪ್ರಕರಣದಲ್ಲಿ ಮಗನಿಗೆ ಅಯ್ಯಪ್ಪಸ್ವಾಮಿಯ ಇರುಮುಡಿ ಕಟ್ಟಿ ಯಾತ್ರೆಗೆ ಕಳುಹಿಸಿ ಮನೆಗೆ ವಾಪಸ್ ಬರುತ್ತಿದ್ದ ತಾಯಿ,  ಮಗಳ ಮೇಲೆ ಮಿನಿ ಖಾಸಗಿ ಬಸ್ ಹರಿದಿದ್ದು, 18 ವರ್ಷದ ವಿದ್ಯಾರ್ಥಿನಿ ಸ್ಥಳದಲ್ಲೇ ಮೃತಪಟ್ಟಿರುವ ಘಟನೆ ಗುರುವಾರ ಸಂಜೆ ಪೀಣ್ಯ ಬಳಿ ನಡೆದಿದೆ.

ವಿವೇಕಾನಂದ ಕಾಲೇಜಿನ ಬಿಕಾಂ ವಿದ್ಯಾರ್ಥಿನಿ ಪ್ರಿಯದರ್ಶಿನಿ(18) ಸ್ಥಳದಲ್ಲೇ ಸಾವು. ತಾಯಿ ಶಾಂತಮ್ಮ ಅವರಿಗೆ ಗಂಭೀರ ಗಾಯವಾಗಿದೆ. ಬೆಳಗ್ಗೆ 10.30ರ ವೇಳೆಯಲ್ಲಿ ಮಗನಿಗೆ ಸ್ಥಳೀಯ  ದೇವಾಲಯದಲ್ಲಿ ಇರುಮುಡಿ ಕಟ್ಟಿಸಿ ಶಬರೀಮಲೆ ಯಾತ್ರೆಗೆ ಕಳುಹಿಸಿ ವಾಪಸ್ ಬಸ್‍ನಲ್ಲಿ ಬಂದಿದ್ದಾರೆ. ನಂತರ ಬಸ್ ನಿಲ್ದಾಣದಿಂದ ರಾಮಯ್ಯ ಲೇಔಟ್‍ನಲ್ಲಿರುವ ಮನೆಗೆ ನಡೆದುಕೊಂಡು  ಹೋಗುವಾಗ ಮಿನಿ ಖಾಸಗಿ ಬಸ್ ಸ್ಟಾರ್ಟ್ ಆಗಿಲ್ಲವೆಂದು ತಳ್ಳಿ ಸ್ಟಾರ್ಟ್ ಮಾಡುತ್ತಿದ್ದರು. ತೀರ ಇಳಿಜಾರು ರಸ್ತೆಯಾದ್ದರಿಂದ ಚಾಲಕನ ನಿರ್ಲಕ್ಷ್ಯದಿಂದ ತಾಯಿ ಮಗಳ ಮೇಲೆ ಬಸ್ ಹರಿದಿದೆ. ಆರೋಪಿ  ಪತ್ತೆಗಾಗಿ ಶೋಧ ಕಾರ್ಯ ನಡೆಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.