ಲಂಚ ಪಡೆದ ಎಎಸ್ಸೈ ಸಸ್ಪೆಂಡ್

ಬೆಂಗಳೂರು: ಸಂಚಾರ ನಿಯಮ ಉಲ್ಲಂಘಿಸುವ ವಾಹನ ಸವಾರರಿಂದ ಲಂಚ ಪಡೆದ ಆರೋಪದ ಮೇಲೆ ಚಿಕ್ಕಪೇಟೆ ಸಂಚಾರ ಪೊಲೀಸ್ ಠಾಣೆ ಸಹಾಯಕ ಸಬ್ ಇನ್ಸ್ ಪೆಕ್ಟರ್(ಎಎಸ್ಸೈ) ಶ್ರೀನಿವಾಸ ಎಂಬುವರನ್ನು ಅಮಾನತುಗೊಳಿಸಲಾಗಿದೆ.

ನೋ ಪಾರ್ಕಿಂಗ್ ಸ್ಥಳದಿಂದ ಸಾಗಿಸಿರುವ ವಾಹನವನ್ನು ಬಿಡುಗಡೆ ಮಾಡಲು ಹಣ ಪಡೆಯುತ್ತಿದ್ದ ವೇಳೆ ರೆಡ್ ಹ್ಯಾಂಡ್ ಆಗಿ ಸಿಕ್ಕಿ ಬಿದ್ದಿದ್ದಾರೆಂದು ಹಿರಿಯ ಪೊಲೀಸ್ ಅಧಿಕಾರಿ ಹೇಳಿದರು. ಶ್ರೀನಿವಾಸ ಅವರಿಗೆ ಟೈಗರ್ ವಾಹನದ ಉಸ್ತುವಾರಿ ನೀಡಲಾಗಿತ್ತು. ವಾಹನದ ಜತೆಗೆ ನೇಮಿಸಿರುವ ವ್ಯಕ್ತಿಗೆ ವಾಹನವನ್ನು ಟೋ ಮಾಡುವ ಪ್ರಕ್ರಿಯೆಯನ್ನು ಚಿತ್ರಿಕರಿಸುವಂತೆ ಹೇಳಲಾಗಿತ್ತು.

ಅದರಲ್ಲಿ ಶ್ರೀನಿವಾಸ ಅವರು ಲಂಚ ಪಡೆಯುತ್ತಿರುವುದು ದಾಖಲಾಗಿತ್ತು. ವಿಡಿಯೋ ಪರಿಶೀಲಿಸಿ ಹಿರಿಯ ಅಧಿಕಾರಿಗಳಿಗೆ ಮಾಹಿತಿ ನೀಡಿದ ಬಳಿಕ ಅವರನ್ನು ಅಮಾನತು ಮಾಡಲಾಗಿದೆ ಎಂದು ಅಧಿಕಾರಿ ಹೇಳಿದರು.
 
ನೋ ಪಾರ್ಕಿಂಗ್ ಜಾಗದಲ್ಲಿ ನಿಲ್ಲಿಸಿರುವ ವಾಹನಗಳನ್ನು ಶ್ರೀನಿವಾಸ್ ಟೋ ಮಾಡುತ್ತಿದ್ದರು. ಬಳಿಕ ವಾಹನ  ಮಾಲೀಕರಿಂದ ದಂಡ ಪಡೆದು ರಸೀದಿ ನೀಡುವ ಬದಲು ಸ್ವಲ್ಪ ಹಣ ಪಡೆದು ವಾಹನ ಬಿಡುತ್ತಿದ್ದರು. ಈ ಹಣದಲ್ಲಿ ಸ್ವಲ್ಪ ಮೊತ್ತವನ್ನು ಟೈಗರ್ ವಾಹನದ ಜತೆ ಕೆಲಸ ಮಾಡುವವರಿಗೂ ಹಂಚುತ್ತಿದ್ದರು. ಈ ಬಗ್ಗೆ ಹಲವಾರು ದೂರುಗಳು ಬಂದಿದ್ದವು. ಈ ಹಿನ್ನೆಲೆಯಲ್ಲಿ ಶ್ರೀನಿವಾಸ ಅವರನ್ನು ಲಂಚ ಪಡೆಯುವಾಗ ಹಿಡಿದು ಅಮಾನತುಗೊಳಿಸಲಾಗಿದೆ ಎಂದು ಅಧಿಕಾರಿ ತಿಳಿಸಿದರು.