Women's Asia Cup 2026: ಭಾರತದ ಶೆಫಾಲಿ ವರ್ಮಾರನ್ನು ಕೆಣಕಿದ್ದ ಪಾಕ್ ನಾಯಕಿ ಫಾತಿಮಾ ಸನಾಗೆ ICC ಭಾರಿ ದಂಡ!

ದುಬೈ: ಮಹಿಳಾ ಏಷ್ಯಾ ಕಪ್ 2026ರ ಗುಂಪು ಹಂತದ ಪಂದ್ಯವೊಂದರಲ್ಲಿ ಭಾರತದ ಆರಂಭಿಕ ಆಟಗಾರ್ತಿ ಶೆಫಾಲಿ ವರ್ಮಾ ಅವರನ್ನು ಔಟ್ ಮಾಡಿದ ನಂತರ 'ಅಪಮಾನಕಾರಿ ಸನ್ನೆ' ಮಾಡಿದ ಆರೋಪದ ಮೇಲೆ ಪಾಕಿಸ್ತಾನ ತಂಡದ ನಾಯಕಿ ಫಾತಿಮಾ ಸನಾ ಅವರಿಗೆ ಪಂದ್ಯದ ಸಂಭಾವನೆಯ ಶೇ 10ರಷ್ಟು ದಂಡ ವಿಧಿಸಲಾಗಿದೆ ಎಂದು ಐಸಿಸಿ ಸೋಮವಾರ ತಿಳಿಸಿದೆ.

ಶನಿವಾರ ಭಾರತದ ಇನಿಂಗ್ಸ್‌ನ ಎರಡನೇ ಓವರ್‌ನಲ್ಲಿ ಈ ಘಟನೆ ಸಂಭವಿಸಿತು; ಶಫಾಲಿ ಅವರನ್ನು ಔಟ್ ಮಾಡಿದ ನಂತರ ಫಾತಿಮಾ ಪೆವಿಲಿಯನ್‌ ದಿಕ್ಕಿಗೆ ಸನ್ನೆ ಮಾಡಿದ್ದರು.

'ಐಸಿಸಿ ಆಟಗಾರರು ಮತ್ತು ಆಟಗಾರರ ಸಹಾಯಕ ಸಿಬ್ಬಂದಿಯ ನಡವಳಿಕೆ ಸಂಹಿತೆ'ಯ (ICC Code of Conduct) ಲೆವೆಲ್ 1ರ ವಿಧಿ 2.5 ಅನ್ನು ಉಲ್ಲಂಘಿಸಿರುವುದು ಕಂಡುಬಂದಿದೆ. ಈ ನಿಯಮವು ಅಂತರರಾಷ್ಟ್ರೀಯ ಪಂದ್ಯವೊಂದರಲ್ಲಿ ಬ್ಯಾಟರ್ ಔಟ್ ಆದಾಗ, ಅವರನ್ನು ಅವಹೇಳನ ಮಾಡುವ ಅಥವಾ ಆಕ್ರಮಣಕಾರಿ ಪ್ರತಿಕ್ರಿಯೆಯನ್ನು ಪ್ರಚೋದಿಸಬಲ್ಲಂತಹ ಭಾಷೆ, ಕ್ರಿಯೆಗಳು ಅಥವಾ ಸನ್ನೆಗಳನ್ನು ಬಳಸುವುದಕ್ಕೆ ಸಂಬಂಧಿಸಿದೆ'.

ಕಳೆದ 24 ತಿಂಗಳ ಅವಧಿಯಲ್ಲಿ ಇದು ಫಾತಿಮಾ ಅವರ ಎರಡನೇ ಉಲ್ಲಂಘನೆಯಾಗಿರುವುದರಿಂದ ಅವರ ಶಿಸ್ತು ಕ್ರಮದ ದಾಖಲೆಗೆ ಒಂದು 'ಡಿಮೆರಿಟ್ ಪಾಯಿಂಟ್' ಸಹ ನೀಡಲಾಗಿದೆ; ಇದರೊಂದಿಗೆ ಒಂದು ವರ್ಷದ ಅವಧಿಯಲ್ಲಿ ಅವರ ಒಟ್ಟು ಡಿಮೆರಿಟ್ ಪಾಯಿಂಟ್‌ಗಳ ಸಂಖ್ಯೆ ಎರಡಕ್ಕೇರಿದೆ.

ಫಾತಿಮಾ ಅವರು ಆಗಸ್ಟ್ 6, 2025 ರಂದು ಡಬ್ಲಿನ್‌ನಲ್ಲಿ ಐರ್ಲೆಂಡ್ ವಿರುದ್ಧದ ಟಿ20ಐ ಸರಣಿಯ ಮೊದಲ ಪಂದ್ಯದ ವೇಳೆ ತಮ್ಮ ಹಿಂದಿನ ಡಿಮೆರಿಟ್ ಅಂಕವನ್ನು ಪಡೆದಿದ್ದರು.

ಫಾತಿಮಾ ಅವರು ತಮ್ಮ ತಪ್ಪನ್ನು ಒಪ್ಪಿಕೊಂಡಿದ್ದಾರೆ ಮತ್ತು ಎಮಿರೇಟ್ಸ್ ಐಸಿಸಿ ಅಂತರರಾಷ್ಟ್ರೀಯ ಪಂದ್ಯದ ರೆಫರಿಗಳ ಸಮಿತಿಯ ಸುಪ್ರಿಯಾ ರಾಣಿ ದಾಸ್ ಅವರು ಪ್ರಸ್ತಾಪಿಸಿದ ಶಿಸ್ತುಕ್ರಮವನ್ನು ಅಂಗೀಕರಿಸಿದ್ದಾರೆ; ಹೀಗಾಗಿ, ಈ ವಿಷಯದಲ್ಲಿ ಯಾವುದೇ ಔಪಚಾರಿಕ ವಿಚಾರಣೆಯ ಅಗತ್ಯವಿರಲಿಲ್ಲ ಎಂದು ಐಸಿಸಿ ತಿಳಿಸಿದೆ.

ಮೈದಾನದಲ್ಲಿದ್ದ ಅಂಪೈರ್‌ಗಳಾದ ನಿಮಾಲಿ ಪೆರೇರಾ ಮತ್ತು ಶತಿರಾ ಜಾಕಿರ್ ಜೆಸಿ, ಮೂರನೇ ಅಂಪೈರ್ ರೊಕಿಯಾ ಸುಲ್ತಾನಾ ಹಾಗೂ ನಾಲ್ಕನೇ ಅಂಪೈರ್ ರಬಾಬ್ ಅಹ್ಸಾನ್ ಅವರು ಈ ಆರೋಪವನ್ನು ಹೊರಿಸಿದ್ದಾರೆ.

'ಲೆವೆಲ್ 1' ಉಲ್ಲಂಘನೆಗಳಿಗೆ ಕನಿಷ್ಠ ಶಿಕ್ಷೆಯಾಗಿ ಅಧಿಕೃತ ಎಚ್ಚರಿಕೆ ಹಾಗೂ ಗರಿಷ್ಠ ಶಿಕ್ಷೆಯಾಗಿ ಆಟಗಾರನ ಪಂದ್ಯದ ಸಂಭಾವನೆಯ ಶೇ 50ರಷ್ಟು ದಂಡ ಮತ್ತು ಒಂದು ಅಥವಾ ಎರಡು ಡಿಮೆರಿಟ್ ಅಂಕಗಳನ್ನು ವಿಧಿಸಲಾಗುತ್ತದೆ.