'ಎರಡನೇ ಹಂತಕ್ಕಾದರೂ ತಲುಪುತ್ತೇವೆ': ಏಕದಿನ ವಿಶ್ವಕಪ್ 2027ರ ವೇಳಾಪಟ್ಟಿ ಪ್ರಕಟ ಬೆನ್ನಲ್ಲೇ ಪಾಕಿಸ್ತಾನ ಕುರಿತು ಪಾರ್ಥಿವ್ ಪಟೇಲ್ ಲೇವಡಿ

ಗುರುವಾರ ಅಂತರರಾಷ್ಟ್ರೀಯ ಕ್ರಿಕೆಟ್ ಮಂಡಳಿ (ICC)ಯು 2027ರ ಏಕದಿನ ವಿಶ್ವಕಪ್‌ ವೇಳಾಪಟ್ಟಿಯನ್ನು ಪ್ರಕಟಿಸಿದ ನಂತರ, ಭಾರತದ ಮಾಜಿ ವಿಕೆಟ್-ಕೀಪರ್ ಬ್ಯಾಟರ್ ಪಾರ್ಥಿವ್ ಪಟೇಲ್ ಪಾಕಿಸ್ತಾನ ಕ್ರಿಕೆಟ್ ತಂಡವನ್ನು ಲೇವಡಿ ಮಾಡಿದರು. ಈ ಪ್ರಮುಖ ಟೂರ್ನಿಯಲ್ಲಿ ಒಟ್ಟು 12 ತಂಡಗಳು ಭಾಗವಹಿಸಲಿದ್ದು, ಅವುಗಳನ್ನು 'ಎ' ಮತ್ತು 'ಬಿ' ಗುಂಪುಗಳಾಗಿ ವಿಂಗಡಿಸಲಾಗಿದೆ; ಪ್ರತಿ ಗುಂಪಿನಲ್ಲಿಯೂ ತಲಾ ಆರು ತಂಡಗಳಿವೆ. ಭಾರತ, ಆಸ್ಟ್ರೇಲಿಯಾ, ಜಿಂಬಾಬ್ವೆ ಮತ್ತು ಅಫ್ಘಾನಿಸ್ತಾನದೊಂದಿಗೆ ಪಾಕಿಸ್ತಾನವನ್ನು 'ಎ' ಗುಂಪಿನಲ್ಲಿ ಸೇರಿಸಲಾಗಿದೆ. ಈ ಗುಂಪಿನ ಐದು ತಂಡಗಳೊಂದಿಗೆ 'ಕ್ವಾಲಿಫೈಯರ್ ಎ' (Qualifier A) ತಂಡವು ಸೇರಿಕೊಳ್ಳಲಿದೆ. ಪ್ರತಿ ಗುಂಪಿನ ಅಗ್ರ ಮೂರು ತಂಡಗಳು 'ಸೂಪರ್ 7' ಹಂತಕ್ಕೆ ಪ್ರವೇಶಿಸಲಿವೆ. ಎರಡೂ ಗುಂಪುಗಳಲ್ಲಿ ನಾಲ್ಕನೇ ಸ್ಥಾನ ಪಡೆದ ತಂಡಗಳ ಪೈಕಿ ಅತ್ಯುತ್ತಮ ಪ್ರದರ್ಶನ ನೀಡಿದ ತಂಡವು ಏಳನೇ ಹಾಗೂ ಅಂತಿಮ ಸ್ಥಾನವನ್ನು ಪಡೆಯಲಿದೆ.

ಗುಂಪು ಹಂತದ ಯಾವುದೇ ಅಂಕಗಳನ್ನು 'ಸೂಪರ್ 7' ಹಂತಕ್ಕೆ ಕೊಂಡೊಯ್ಯಲಾಗುವುದಿಲ್ಲ; ಅಂದರೆ, ತಂಡಗಳು 'ರೌಂಡ್-ರಾಬಿನ್' ಮಾದರಿಯಲ್ಲಿ ಆಡಲಿವೆ. ಅಕ್ಟೋಬರ್ 25 ರಿಂದ ನವೆಂಬರ್ 14 ರವರೆಗೆ ಪ್ರತಿ ತಂಡವು ಇನ್ನೂ ಆರು ಪಂದ್ಯಗಳನ್ನು ಆಡಲಿದೆ. 'ಸೂಪರ್ 7' ಹಂತದ ಅಗ್ರ ನಾಲ್ಕು ತಂಡಗಳು ಸೆಮಿಫೈನಲ್‌ಗೆ ಪ್ರವೇಶಿಸಲಿವೆ.

ಸ್ಟಾರ್ ಸ್ಪೋರ್ಟ್ಸ್‌ನಲ್ಲಿ ವೇಳಾಪಟ್ಟಿಯ ಕುರಿತು ಚರ್ಚಿಸುವಾಗ, ಪಾರ್ಥಿವ್ ಪಟೇಲ್ ಅವರು ಪಾಕಿಸ್ತಾನ ಕ್ರಿಕೆಟ್ ತಂಡದ ಬಗ್ಗೆ ತಮಾಷೆ ಮಾಡಿದರು.

'ತಂಡಗಳು ತಮ್ಮ ಮನಸ್ಥಿತಿಗೆ ಅನುಗುಣವಾಗಿ ವಿಭಿನ್ನವಾಗಿ ಯೋಚಿಸುತ್ತವೆ. ಭಾರತವು ಕನಿಷ್ಠ ಸೆಮಿಫೈಲ್‌ನಾದ್ರೂ ತಲುಪುತ್ತೇವೆ ಎಂದು ಭಾವಿಸುತ್ತಿರಬಹುದು. ಅದೇ ಸಮಯದಲ್ಲಿ, ಈ ವೇಳಾಪಟ್ಟಿಯನ್ನು ನೋಡಿದ ನಂತರ ಪಾಕಿಸ್ತಾನವು, 'ನಾವು ಖಂಡಿತವಾಗಿಯೂ ಸೂಪರ್-7 ಹಂತವನ್ನು ತಲುಪುತ್ತೇವೆ, ಆ ನಂತರ ಏನಾಗುತ್ತದೆ ಎಂಬುದನ್ನು ನೋಡೋಣ' ಎಂದು ಯೋಚಿಸುತ್ತಿರಬಹುದು ಎಂದಿದ್ದಾರೆ.

'ಈ ವೇಳಾಪಟ್ಟಿಯನ್ನು ನೋಡಿ ಪಾಕಿಸ್ತಾನ ಖುಷಿಯಾಗಿರಬೇಕು. ತಾವು ಎರಡನೇ ಹಂತಕ್ಕೆ ಪ್ರವೇಶಿಸುತ್ತೇವೆ ಎಂದು ಅವರು ಭಾವಿಸುತ್ತಿರಬಹುದು' ಎಂದು ಪಾರ್ಥಿವ್ ಹೇಳಿದರು.

ಅಹಮದಾಬಾದ್‌ನಲ್ಲಿ ನಡೆದ 2023ರ ವಿಶ್ವಕಪ್ ಫೈನಲ್‌ನಲ್ಲಿ ಭಾರತದ ವಿರುದ್ಧ ಆರು ವಿಕೆಟ್‌ಗಳ ಜಯ ಸಾಧಿಸುವ ಮೂಲಕ ಆಸ್ಟ್ರೇಲಿಯಾ ಸದ್ಯ ಹಾಲಿ ಚಾಂಪಿಯನ್ ಆಗಿ ಮುಂದುವರಿದಿದೆ. ಮತ್ತೊಂದೆಡೆ, ಪಾಕಿಸ್ತಾನವು ಒಂಬತ್ತು ಪಂದ್ಯಗಳಲ್ಲಿ ನಾಲ್ಕು ಗೆಲುವು ಮತ್ತು ಐದು ಸೋಲುಗಳೊಂದಿಗೆ ಐದನೇ ಸ್ಥಾನವನ್ನು ಪಡೆದಿತ್ತು.

2027ರ ವಿಶ್ವಕಪ್‌ನ ಗುಂಪು ಹಂತವು ಅಕ್ಟೋಬರ್ 7 ರಂದು ಪ್ರಾರಂಭವಾಗಲಿದ್ದು, ಕೇಪ್ ಟೌನ್‌ನಲ್ಲಿ ನಡೆಯಲಿರುವ ಪಂದ್ಯದಲ್ಲಿ ಭಾರತ ಮತ್ತು ಆಸ್ಟ್ರೇಲಿಯಾ ಮುಖಾಮುಖಿಯಾಗಲಿವೆ. ದಕ್ಷಿಣ ಆಫ್ರಿಕಾವು ಅಕ್ಟೋಬರ್ 9 ರಂದು ಕೇಪ್ ಟೌನ್‌ನಲ್ಲಿ ನ್ಯೂಜಿಲೆಂಡ್ ವಿರುದ್ಧ ತನ್ನ ಅಭಿಯಾನ ಆರಂಭಿಸಲಿದೆ; ಅದೇ ದಿನ ಬುಲವಾಯೊದಲ್ಲಿ ಸಹ-ಆತಿಥೇಯ ಜಿಂಬಾಬ್ವೆ ತಂಡವು 'ಕ್ವಾಲಿಫೈಯರ್ ಎ' (Qualifier A) ತಂಡವನ್ನು ಎದುರಿಸಲಿದೆ.

ಅತ್ಯಂತ ನಿರೀಕ್ಷಿತ ಭಾರತ-ಪಾಕಿಸ್ತಾನ ಮುಖಾಮುಖಿಯು ಅಕ್ಟೋಬರ್ 10 ರಂದು ಜೋಹಾನ್ಸ್‌ಬರ್ಗ್‌ನಲ್ಲಿ ನಡೆಯಲಿದೆ.