T20 World Cup 2026: ಟೀಂ ಇಂಡಿಯಾದ ಫಿನಿಷರ್ ಪಾತ್ರಕ್ಕೆ ಹೊಂದಿಕೊಳ್ಳಲು IPL ಸಹಾಯ ಮಾಡಿದೆ ಎಂದ ತಿಲಕ್ ವರ್ಮಾ

ಭಾರತ ಕ್ರಿಕೆಟ್ ತಂಡದ ಬ್ಯಾಟ್ಸ್‌ಮನ್ ತಿಲಕ್ ವರ್ಮಾ ಬ್ಯಾಟಿಂಗ್ ಕ್ರಮಾಂಕದಲ್ಲಿ ಯಾವುದೇ ಸಮಸ್ಯೆ ಎದುರಿಸುತ್ತಿಲ್ಲ ಮತ್ತು ಐಪಿಎಲ್‌ನಲ್ಲೂ ಅಂತಹ ಪಾತ್ರಕ್ಕೆ ಒಗ್ಗಿಕೊಂಡಿದ್ದೇನೆ ಎಂದು ಹೇಳಿದ್ದಾರೆ. 2026ರ ಟಿ20 ವಿಶ್ವಕಪ್‌ನಲ್ಲಿ 3ನೇ ಸ್ಥಾನದಲ್ಲಿ ಬ್ಯಾಟಿಂಗ್ ಮಾಡುವಾಗ ಕಳಪೆ ಪ್ರದರ್ಶನ ನೀಡಿದ ನಂತರ, ಜಿಂಬಾವ್ವೆ ವಿರುದ್ಧದ ಸೂಪರ್ 8 ಪಂದ್ಯದಲ್ಲಿ 16 ಎಸೆತಗಳಲ್ಲಿ ಅಜೇಯ 44 ರನ್ ಗಳಿಸುವ ಮೂಲಕ ಭಾರತ ತಂಡ 256/4 ತಲುಪಲು ಸಹಾಯ ಮಾಡಿದರು. 6ನೇ ಸ್ಥಾನದಲ್ಲಿ ಬ್ಯಾಟಿಂಗ್ ಮಾಡುವುದು ತನಗೆ ಹೊಸದೇನಲ್ಲ. ಯಾವುದೇ ಹೋರಾಟವಿಲ್ಲದೆ ಆಡಿದೆ ಮತ್ತು ಆ ಕ್ರಮಾಂಕದಲ್ಲಿ ಬ್ಯಾಟಿಂಗ್ ಮಾಡಲು ಕೇಳಿದಾಗ ತನಗೆ ಯಾವುದೇ ತೊಂದರೆಯಾಗಲಿಲ್ಲ ಎಂದು ತಿಲಕ್ ಹೇಳಿದ್ದಾರೆ.

IND vs ZIM ಸೂಪರ್ 8 ಪಂದ್ಯದ ನಂತರ ಮಾತನಾಡಿದ ತಿಲಕ್ ವರ್ಮಾ, ಕಳೆದ ನಾಲ್ಕು ವರ್ಷಗಳಿಂದ ಐಪಿಎಲ್‌ನಲ್ಲಿ ಮುಂಬೈ ಇಂಡಿಯನ್ಸ್ (MI) ಪರ ಟಾಪ್ 3 ರಲ್ಲಿ ಬ್ಯಾಟಿಂಗ್ ಮಾಡುವುದರಿಂದ ಹಿಡಿದು ಫಿನಿಷರ್ ಸ್ಥಾನಕ್ಕೆ ಬದಲಾಗಿದ್ದೇನೆ. ಟೀಂ ಇಂಡಿಯಾದ ಇತರ ಎಲ್ಲ ಸದಸ್ಯರಂತೆ, ಮ್ಯಾನೇಜ್‌ಮೆಂಟ್ ತನಗೆ ನೀಡುವ ಯಾವುದೇ ಪಾತ್ರವನ್ನು ನಿಭಾಯಿಸಲು ತಾನು ಸಂತೋಷಪಡುತ್ತೇನೆ. ಒಂದು ಉತ್ತಮ ಇನಿಂಗ್ಸ್‌ಗಾಗಿ ತಾನು ಕಾಯುತ್ತಿದ್ದೆ. ಅದು ತನ್ನ ಆತ್ಮವಿಶ್ವಾಸವನ್ನು ಹೆಚ್ಚಿಸಿದೆ ಎಂದು ಹೇಳಿದರು.

'ತಂಡಕ್ಕೆ ಏನು ಬೇಕೋ ಅದನ್ನು ನಾನು ಒಪ್ಪುತ್ತೇನೆ ಎಂದು ನಾನು ಯಾವಾಗಲೂ ಹೇಳುತ್ತೇನೆ. ಹಾಗಾಗಿ ಕಳೆದ ನಾಲ್ಕು ವರ್ಷಗಳಿಂದ ಐಪಿಎಲ್‌ನಲ್ಲಿ ಮುಂಬೈ ಇಂಡಿಯನ್ಸ್‌ಗಾಗಿ ನಾನು ಅದೇ ಪಾತ್ರವನ್ನು (ಸ್ಟೆಬಿಲೈಸರ್ ಮತ್ತು ಮಧ್ಯಮ ಕ್ರಮಾಂಕದಲ್ಲಿ ಹಿಟ್ಟರ್ ನಡುವೆ ಬದಲಾಯಿಸುವುದು) ಮಾಡಿದ್ದೇನೆ ಮತ್ತು ಭಾರತೀಯ ತಂಡಕ್ಕಾಗಿ ಕೆಲವು ಪಂದ್ಯಗಳಲ್ಲಿ ಮಾಡಿದ್ದೇನೆ. ಹಾಗಾಗಿ ನಾನು ಅದಕ್ಕೆ ಒಪ್ಪುತ್ತೇನೆ. ತಂಡಕ್ಕೆ ಏನು ಬೇಕೋ ಅದನ್ನು ಒಪ್ಪುತ್ತೇನೆ. ಮತ್ತು ಪರಿಸ್ಥಿತಿಗೆ ಅನುಗುಣವಾಗಿ, ನಾನು ಹೊಂದಿಕೊಳ್ಳಬಲ್ಲೆ. ಆದರೆ ನಾನು ಮೊದಲೇ ಹೇಳಿದಂತೆ, ನಾನು ಕೇವಲ ಒಂದು ಇನಿಂಗ್ಸ್‌ಗಾಗಿ ಕಾಯುತ್ತಿದ್ದೆ. ಆದ್ದರಿಂದ ನಾನು ಅದಕ್ಕಾಗಿ ದೇವರಿಗೆ ನಿಜವಾಗಿಯೂ ಕೃತಜ್ಞನಾಗಿದ್ದೇನೆ. ನಾನು ತಂಡಕ್ಕಾಗಿ ಪಂದ್ಯಗಳನ್ನು ಗೆಲ್ಲಬಲ್ಲೆ ಎಂದು ನನಗೆ ಈಗ ಸಾಕಷ್ಟು ವಿಶ್ವಾಸವಿದೆ' ಎಂದು ತಿಲಕ್ ವರ್ಮಾ ಹೇಳಿದರು.

ತಿಲಕ್ ವರ್ಮಾ ಅವರ 44 ರನ್‌ಗಳ ಇನಿಂಗ್ಸ್‌ನಲ್ಲಿ 3 ಬೌಂಡರಿ ಮತ್ತು 4 ಸಿಕ್ಸರ್‌ಗಳು ಸೇರಿದ್ದವು ಮತ್ತು ಅವರು 275ರ ಸ್ಟ್ರೈಕ್ ರೇಟ್ ಹೊಂದಿದ್ದರು. ಇದು ಪಂದ್ಯದ ಭಾರತೀಯ ಬ್ಯಾಟ್ಸ್‌ಮನ್ ಗಳಲ್ಲಿ ಅತಿ ಹೆಚ್ಚು. ಜಿಂಬಾಬ್ವೆ ವಿರುದ್ಧದ ಪಂದ್ಯಕ್ಕೂ ಮುನ್ನ, ಬ್ಯಾಟ್ಸ್‌ಮನ್ ನಾಲ್ಕು ಪಂದ್ಯಗಳಲ್ಲಿ 25, 25, 31 ಮತ್ತು 1 ರನ್ ಗಳಿಸಿದ್ದರು. 3 ಅಥವಾ 4 ನೇ ಸ್ಥಾನದಲ್ಲಿ ಬ್ಯಾಟಿಂಗ್ ಮಾಡುವಾಗ ತೊಂದರೆ ಅನುಭವಿಸುತ್ತಿದ್ದರು.