ಅಮೆರಿಕ-ಇರಾನ್ ಕದನ ವಿರಾಮ; ವಿಶ್ವಶಾಂತಿಗೆ ಪಾಕಿಸ್ತಾನದಿಂದ ಕೊಡುಗೆ ಎಂದ ಶಾಹೀನ್ ಅಫ್ರಿದಿ ವಿರುದ್ಧ ಟೀಕೆ

ಅಮೆರಿಕ-ಇರಾನ್ ಕದನ ವಿರಾಮದ ಮಧ್ಯಸ್ಥಿಕೆ ವಹಿಸಿದ್ದಕ್ಕಾಗಿ ಪ್ರಧಾನಿ ಶೆಹಬಾಜ್ ಷರೀಫ್ ಮತ್ತು ಫೀಲ್ಡ್ ಮಾರ್ಷಲ್ ಅಸಿಮ್ ಮುನೀರ್ ಅವರ ಪಾತ್ರವನ್ನು ಶ್ಲಾಘಿಸಿದ ನಂತರ ಪಾಕಿಸ್ತಾನ ಕ್ರಿಕೆಟ್ ತಾರೆ ಶಾಹೀನ್ ಅಫ್ರಿದಿ ಸಾಮಾಜಿಕ ಮಾಧ್ಯಮದಲ್ಲಿ ಭಾರಿ ಟೀಕೆಗಳಿಗೆ ಗುರಿಯಾಗಿದ್ದಾರೆ. ರಾಜಕೀಯ ಹೇಳಿಕೆ ನೀಡಿದ್ದಕ್ಕಾಗಿ ಪಾಕಿಸ್ತಾನ ಕ್ರಿಕೆಟ್ ಮಂಡಳಿ (ಪಿಸಿಬಿ) ಶಾಹೀನ್‌ಗೆ ದಂಡ ವಿಧಿಸುತ್ತದೆಯೇ ಎಂದು ಪ್ರಶ್ನಿಸಿ, ಸಹ ಆಟಗಾರ ನಸೀಮ್ ಶಾ ಅವರೊಂದಿಗೆ ಸಾಮಾಜಿಕ ಮಾಧ್ಯಮ ಬಳಕೆದಾರರು ಹೋಲಿಕೆ ಮಾಡಿದ್ದಾರೆ.

ಪಂಜಾಬ್ ಮುಖ್ಯಮಂತ್ರಿ ಮರ್ಯಮ್ ನವಾಜ್ ಅವರನ್ನು ಟೀಕಿಸಿದ ನಂತರ ಪಿಸಿಬಿಯ ಸಾಮಾಜಿಕ ಮಾಧ್ಯಮ ಮಾರ್ಗಸೂಚಿಗಳ ವಿವಿಧ ಷರತ್ತುಗಳನ್ನು ಉಲ್ಲಂಘಿಸಿದ್ದಕ್ಕಾಗಿ ನಸೀಮ್ ಅವರಿಗೆ ಇತ್ತೀಚೆಗೆ ಪಿಕೆಆರ್ 2 ಕೋಟಿ ದಂಡವನ್ನು ವಿಧಿಸಲಾಗಿತ್ತು. ಆದಾಗ್ಯೂ, ಶಾಹೀನ್ ಅವರ ಪೋಸ್ಟ್‌ಗೆ ಸಂಬಂಧಿಸಿದಂತೆ ಪಿಸಿಬಿಯಿಂದ ಯಾವುದೇ ಅಧಿಕೃತ ಪ್ರತಿಕ್ರಿಯೆ ಬಂದಿಲ್ಲ.

'ವಿಶ್ವ ಶಾಂತಿಯ ಹಿತದೃಷ್ಟಿಯಿಂದ ಪಾಕಿಸ್ತಾನ ಮುನ್ನಡೆಸುತ್ತಿರುವುದನ್ನು ನೋಡಿ ಹೆಮ್ಮೆಯಾಗುತ್ತದೆ. ನಮ್ಮ ಪ್ರಧಾನಿ ಶೆಹಬಾಜ್ ಷರೀಫ್ ಮತ್ತು ಫೀಲ್ಡ್ ಮಾರ್ಷಲ್ ಅಸಿಮ್ ಮುನೀರ್ ಅವರು ಸಂವಾದ ಮತ್ತು ಸ್ಥಿರತೆಗೆ ಒತ್ತಾಯಿಸುತ್ತಿರುವುದು ನಿಜಕ್ಕೂ ಉತ್ತೇಜನಕಾರಿಯಾಗಿದೆ. ಕದನ ವಿರಾಮವು ಯಾವಾಗಲೂ ಮಾನವೀಯತೆಯ ಗೆಲುವಾಗಿದೆ, ಪಾಕಿಸ್ತಾನವು ಭರವಸೆ, ಏಕತೆ ಮತ್ತು ಶಾಶ್ವತ ಶಾಂತಿಯತ್ತ ದಾರಿ ಮಾಡಿಕೊಡುತ್ತದೆ. ನಾನು ಹೆಮ್ಮೆಯ ಪಾಕಿಸ್ತಾನಿ. ಪಾಕಿಸ್ತಾನ ಯಾವಾಗಲೂ ಜಿಂದಾಬಾದ್' ಎಂದು ಶಾಹೀನ್ ಪೋಸ್ಟ್ ಮಾಡಿದ್ದಾರೆ.

ನಸೀಮ್ ಶಾ ಅವರಿಗೆ ಮಾಡಿದಂತೆ ರಾಜಕೀಯ ಟ್ವೀಟ್ ಮಾಡಿದ್ದಕ್ಕಾಗಿ ಶಾಹೀನ್ ಅಫ್ರಿದಿಗೆ ದಂಡ ವಿಧಿಸಲಾಗುತ್ತದೆಯೇ ಮತ್ತು ಅವರನ್ನು ತಂಡದಿಂದ ಕೈಬಿಡಲಾಗುತ್ತದೆಯೇ? ಎಂದು ಸಾಮಾಜಿಕ ಮಾಧ್ಯಮ ಬಳಕೆದಾರರೊಬ್ಬರು ಪ್ರಶ್ನಿಸಿದ್ದಾರೆ.

ಇದಕ್ಕೂ ಮೊದಲು, ಪಂಜಾಬ್ ಪೊಲೀಸರು ತಂಡ ತಂಗಿದ್ದ ಹೋಟೆಲ್‌ನಲ್ಲಿ ಭದ್ರತಾ ಶಿಷ್ಟಾಚಾರಗಳನ್ನು ಉಲ್ಲಂಘಿಸಿದ್ದಾರೆ ಎಂದು ಆರೋಪಿಸಿದ್ದ ಘಟನೆಯ ನಂತರ, ಲಾಹೋರ್ ಖಲಂದರ್ಸ್‌ ತಂಡದ ನಾಯಕ ಶಾಹೀನ್ ಶಾ ಅಫ್ರಿದಿಗೆ PKR 1 ಮಿಲಿಯನ್ (ಸುಮಾರು USD 3,600) ದಂಡ ವಿಧಿಸಿತು. ESPNcricinfo ಪ್ರಕಾರ, ತಂಡದೊಳಗೆ 'ಶಿಸ್ತನ್ನು ಎತ್ತಿಹಿಡಿಯಲು ಮತ್ತು ಹೊಣೆಗಾರಿಕೆಯನ್ನು ಖಚಿತಪಡಿಸಿಕೊಳ್ಳಲು' ದಂಡ ವಿಧಿಸಲಾಗಿದೆ ಎಂದು ಖಲಂದರ್ಸ್‌ ಹೇಳಿದೆ. ಪೊಲೀಸ್ ವರದಿಯಲ್ಲಿ ಉಲ್ಲೇಖಿಸಲಾದ ಸಿಕಂದರ್ ರಾಜಾ ವಿರುದ್ಧ ಯಾವುದೇ ಕ್ರಮ ಕೈಗೊಳ್ಳಲಾಗಿಲ್ಲ.