PCB ಬೇಡಿಕೆಗೆ ಸೊಪ್ಪು ಹಾಕದ ICC, ಪಾಕಿಸ್ತಾನಕ್ಕೆ ಮತ್ತೆ ಮುಖಭಂಗ: UAE ವಿರುದ್ಧದ ಪಾಕ್ ಪಂದ್ಯ ಬಹಿಷ್ಕಾರ?

ಏಷ್ಯಾ ಕಪ್‌ 2025ರ ಪಂದ್ಯಾವಳಿಯಿಂದ ಆ್ಯಂಡಿ ಪೈಕ್ರಾಫ್ಟ್ ಅವರನ್ನು ಮ್ಯಾಚ್ ರೆಫರಿಗಳ ಸಮಿತಿಯಿಂದ ತೆಗೆದುಹಾಕುವಂತೆ ಪಾಕಿಸ್ತಾನ ಕ್ರಿಕೆಟ್ ಮಂಡಳಿ (ಪಿಸಿಬಿ) ಮಾಡಿದ ಮನವಿಯನ್ನು ಅಂತರರಾಷ್ಟ್ರೀಯ ಕ್ರಿಕೆಟ್ ಮಂಡಳಿ (ಐಸಿಸಿ) ಮಂಗಳವಾರ ತಿರಸ್ಕರಿಸಿದೆ.

ಭಾನುವಾರ ನಡೆದ ಏಷ್ಯಾ ಕಪ್ 2025ರ ಪಂದ್ಯದ ಟಾಸ್ ಸಮಯದಲ್ಲಿ ಪಾಕಿಸ್ತಾನ ನಾಯಕ ಸಲ್ಮಾನ್ ಅಲಿ ಅಘಾ ಅವರನ್ನು ಭಾರತ ತಂಡದ ಸೂರ್ಯಕುಮಾರ್ ಯಾದವ್ ಅವರ ಕೈಕುಲುಕದಂತೆ ಪೈಕ್ರಾಫ್ಟ್ ಕೇಳಿದ್ದಾರೆ ಎಂದು ಆರೋಪಿಸಿ ಪಿಸಿಬಿ ಐಸಿಸಿಗೆ ದೂರು ನೀಡಿತ್ತು. ಹ್ಯಾಂಡ್‌ಶೇಕ್ ವಿವಾದ ವಿಚಾರದಲ್ಲಿ ಪೈಕ್ರಾಫ್ಟ್ ಪ್ರಮುಖ ಪಾತ್ರ ವಹಿಸಿದ್ದಾರೆ. ಅವರು ಪಾಕಿಸ್ತಾನಕ್ಕಿಂತ ಭಾರತಕ್ಕೆ ಒಲವು ತೋರಿದ್ದಾರೆ ಎಂದು ಪಿಸಿಬಿ ಆರೋಪಿಸಿತ್ತು.

'ನಿನ್ನೆ ರಾತ್ರಿ ತಡವಾಗಿ, ಐಸಿಸಿ ಪಿಸಿಬಿಗೆ ಪ್ರತಿಕ್ರಿಯೆ ನೀಡಿದ್ದು, ಪೈಕ್ರಾಫ್ಟ್ ಅವರನ್ನು ತೆಗೆದುಹಾಕಲು ಆಗುವುದಿಲ್ಲ ಮತ್ತು ಅವರ (PCB) ಅರ್ಜಿಯನ್ನು ತಿರಸ್ಕರಿಸಲಾಗಿದೆ' ಎಂದು ಐಸಿಸಿ ಮೂಲವೊಂದು ಸುದ್ದಿಸಂಸ್ಥೆ ಪಿಟಿಐಗೆ ತಿಳಿಸಿದೆ.

69 ವರ್ಷದ ಜಿಂಬಾಬ್ವೆ ಆಟಗಾರ ಆ್ಯಂಡಿ ಪೈಕ್ರಾಫ್ಟ್ ಬುಧವಾರ ಯುಎಇ ವಿರುದ್ಧದ ಪಾಕಿಸ್ತಾನದ ಅಂತಿಮ ಗುಂಪು ಹಂತದ ಪಂದ್ಯಕ್ಕೆ ಅಂಪೈರ್ ಆಗಿ ಕಾರ್ಯನಿರ್ವಹಿಸಲಿದ್ದಾರೆ.

ಪಾಕಿಸ್ತಾನ ತಂಡದ ವ್ಯವಸ್ಥಾಪಕ ನವೇದ್ ಚೀಮಾ ಕೂಡ ಏಷ್ಯನ್ ಕ್ರಿಕೆಟ್ ಕೌನ್ಸಿಲ್‌ಗೆ (ACC) ದೂರು ಸಲ್ಲಿಸಿದ್ದು, ಪೈಕ್ರಾಫ್ಟ್ ಅವರ ಒತ್ತಾಯದ ಮೇರೆಗೆ ಭಾನುವಾರ ಇಬ್ಬರು ನಾಯಕರು ತಮ್ಮ ತಮ್ಮ ತಂಡಗಳ ಶೀಟ್ಸ್‌ಗಳನ್ನು ವಿನಿಮಯ ಮಾಡಿಕೊಂಡಿಲ್ಲ ಎಂದು ಆರೋಪಿಸಿದ್ದಾರೆ.

ಪೈಕ್ರಾಫ್ಟ್ ಐಸಿಸಿ ಎಲೈಟ್ ಪ್ಯಾನೆಲ್‌ನಲ್ಲಿ ಅತ್ಯಂತ ಹಿರಿಯ ಮ್ಯಾಚ್ ರೆಫರಿಗಳಲ್ಲಿ ಒಬ್ಬರಾಗಿದ್ದು, ಅವರು 695 ಅಂತರರಾಷ್ಟ್ರೀಯ ಪಂದ್ಯಗಳನ್ನು (ಮೂರು ಸ್ವರೂಪಗಳಲ್ಲಿ ಪುರುಷ ಮತ್ತು ಮಹಿಳಾ) ಹೊಂದಿದ್ದಾರೆ.

ಟಾಸ್ ಸಮಯದಲ್ಲಿ ಸಲ್ಮಾನ್ ಅಸಮಾಧಾನಗೊಂಡಂತೆ ಕಾಣಲಿಲ್ಲ. ಆದರೆ, ಸೂರ್ಯಕುಮಾರ್ ಯಾದವ್ ಮತ್ತು ತಂಡ ಪಂದ್ಯದ ನಂತರ ಕೈಕುಲುಕಲು ನಿರಾಕರಿಸಿದ ನಂತರ, ಅವರು ಪಂದ್ಯದ ನಂತರದ ಪತ್ರಿಕಾಗೋಷ್ಠಿಗೆ ಬರಲು ನಿರಾಕರಿಸಿದರು.

'ಐಸಿಸಿ ನೀತಿ ಸಂಹಿತೆ ಮತ್ತು ಕ್ರಿಕೆಟ್ ಸ್ಫೂರ್ತಿಗೆ ಸಂಬಂಧಿಸಿದ ಎಂಸಿಸಿ ಕಾನೂನುಗಳನ್ನು ಮ್ಯಾಚ್ ರೆಫರಿ ಉಲ್ಲಂಘಿಸಿದ್ದಾರೆ ಎಂದು ಪಿಸಿಬಿ ಐಸಿಸಿಗೆ ದೂರು ನೀಡಿದೆ. ಏಷ್ಯಾ ಕಪ್‌ನಿಂದ ಮ್ಯಾಚ್ ರೆಫರಿಯನ್ನು ತಕ್ಷಣ ತೆಗೆದುಹಾಕಬೇಕೆಂದು ಒತ್ತಾಯಿಸಿದೆ' ಎಂದು ನಖ್ವಿ ಐಸಿಸಿಗೆ ಪತ್ರ ಬರೆದಿದ್ದರು.

ಯುಎಇ ವಿರುದ್ಧದ ಪಂದ್ಯ ಬಹಿಷ್ಕಾರ?

ಪಿಸಿಬಿ ಬೇಡಿಕೆ ಈಡೇರದಿದ್ದರೆ ಪಾಕಿಸ್ತಾನವು ಯುಎಇ ವಿರುದ್ಧದ ಪಂದ್ಯದಿಂದ ಹಿಂದೆ ಸರಿಯಬಹುದು ಎಂದು ವರದಿಯಾಗಿದೆ. ಸದ್ಯದ ಪರಿಸ್ಥಿತಿಯ ಪ್ರಕಾರ, ಪಾಕಿಸ್ತಾನ ಮತ್ತು ಯುಎಇ ಗ್ರೂಪ್ ಎ ನಿಂದ ಎರಡನೇ ಸೂಪರ್ ಫೋರ್ ಸ್ಥಾನಕ್ಕಾಗಿ ಹೋರಾಡಲಿವೆ. ಯುಎಇ ಮತ್ತು ಪಾಕಿಸ್ತಾನದ ವಿರುದ್ಧ ಪಂದ್ಯ ಗೆದ್ದ ನಂತರ ಭಾರತ ಈಗಾಗಲೇ ಅರ್ಹತೆ ಪಡೆದಿದೆ.

ಪಿಸಿಬಿ ಮತ್ತು ನಖ್ವಿ ಈ ವರ್ಚುವಲ್ ನಾಕೌಟ್ ಪಂದ್ಯದಿಂದ ಹೊರಬರುತ್ತಾರೆಯೇ ಎಂಬುದನ್ನು ಕಾದು ನೋಡಬೇಕಾಗಿದೆ. ಇದರರ್ಥ ಪಾಕಿಸ್ತಾನವು ಗ್ರೂಪ್ ಹಂತದಲ್ಲೇ ಏಷ್ಯಾ ಕಪ್‌ನಿಂದ ಹೊರಗುಳಿಯಬೇಕಾಗುತ್ತದೆ.