ಟ್ರಿಬ್ಯೂಟ್ ಜರ್ಸಿ ಧರಿಸಿ ಕೋವಿಡ್ ಹಿರೋಗಳನ್ನು ಗೌರವಿಸಲಿರುವ ಆರ್ ಸಿಬಿ

ದುಬೈ: ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಕೋವಿಡ್-19 ಹಿರೋಗಳನ್ನು ಗೌರವಿಸಲು ಟೂರ್ನಿಯಾದ್ಯಂತ My COVID Heroes ಎಂಬ ಸಂದೇಶವಿರುವ ಜರ್ಸಿ ಧರಿಸಲಿದ್ದಾರೆ. 

ಜೆರ್ಸಿ ಹಿಂಬದಿಯಲ್ಲಿ ಈ ಸಂದೇಶ ಮುದ್ರಿತವಾಗಿರಲಿದ್ದು, ತರಬೇತಿಯ ವೇಳೆ ಬಳಸುವ ಜೆರ್ಸಿಗಳಲ್ಲೂ ಇದನ್ನು ಕಾಣಬಹುದಾಗಿದೆ. ಐಪಿಎಲ್ ಸೆಷನ್ ನ ಆರ್ ಸಿಬಿಯ ಮೊದಲ ಪಂದ್ಯದಲ್ಲಿ ಆಟಗಾರರು ಧರಿಸಿದ್ದ ಜೆರ್ಸಿಯನ್ನು ಹರಾಜು ಹಾಕಿ ಅದರಿಂದ ಬರುವ ಹಣವನ್ನು ಗೀವ್ ಇಂಡಿಯಾ ಫೌಂಡೇಶನ್ ಗೆ ನೀಡಲಾಗುತ್ತದೆ. 

ಈ ಘೋಷಣಾ ಕಾರ್ಯಕ್ರಮದ ವರ್ಚ್ಯುಯಲ್ ಉದ್ಘಾಟನೆಯಲ್ಲಿ ಆರ್ ಸಿಬಿ ಅಧ್ಯಕ್ಷ ಸಂಜೀವ್ ಚುರಿವಾಲ, ನಾಯಕ ವಿರಾಟ್ ಕೊಹ್ಲಿ, ಪಾರ್ಥಿವ್ ಪಟೇಲ್ ಹಾಗೂ ಪ್ರಾರಂಭಿಕ ಆಟಗಾರ ದೇವ್ ದತ್ ಪಡ್ಡಿಕಲ್ ಇದ್ದರು. 

ಕೋವಿಡ್ ಸಾಂಕ್ರಾಮಿಕದ ವೇಳೆ ಕೋವಿಡ್-19 ಹಿರೋಗಳು ಸಲ್ಲಿಸಿರುವ ಸೇವೆಗೆ ಮನುಕುಲ ಕೃತಜ್ಞರಾಗಿರಲಿದೆ. ಈ ಅಭಿಯಾನದ ಮೂಲಕ ಅವರ ಶ್ರಮವನ್ನು ಗೌರವಿಸುತ್ತಿದ್ದೇವೆ ಎಂದು ಚುರಿವಾಲ ತಿಳಿಸಿದ್ದಾರೆ.