ಐಸಿಸಿ ವಿಶ್ವಕಪ್ 2019: ವಿರಾಟ್‌ ಕೊಹ್ಲಿ ವಿಕೆಟ್ ಉರುಳಿಸುವುದೇ ಗುರಿ: ಮೊಯಿನ್‌ ಅಲಿ

ಬರ್ಮಿಂಗ್ ಹ್ಯಾಮ್‌: ಭಾರತದ ವಿರುದ್ಧದ ಪಂದ್ಯದಲ್ಲಿ ಆ ತಂಡದ ನಾಯಕ ವಿರಾಟ್ ಕೊಹ್ಲಿ ವಿಕೆಟ್ ಪಡೆಯುವುದೇ ನನ್ನ ಗುರಿ ಎಂದು ಇಂಗ್ಲೆಂಡ್ ತಂಡದ ಬೌಲರ್ ಮೊಯಿನ್ ಅಲಿ ಹೇಳಿದ್ದಾರೆ.

ನಾಳೆ ಬರ್ಮಿಂಗ್ ಹ್ಯಾಮ್‌ ನಲ್ಲಿ ಭಾರತದ ವಿರುದ್ಧ ಇಂಗ್ಲೆಂಡ್ ತಂಡ ಸೆಣಸಲಿದ್ದು, ಪಂದ್ಯಕ್ಕೂ ಮುನ್ನ ನಡೆದ ಸುದ್ದಿಗೋಷ್ಠಿಯಲ್ಲಿ ಇಂಗ್ಲೆಂಡ್ ಬೌಲರ್ ಮೊಯಿನ್ ಅಲಿ ತಮ್ಮ ಇಂಗಿತ ವ್ಯಕ್ತಪಡಿಸಿದ್ದಾರೆ.  ನಾಳೆ ಇಲ್ಲಿನ ಎಡ್ಜ್ ಬಾಸ್ಟನ್‌ ಕ್ರೀಡಾಂಗಣದಲ್ಲಿ ಭಾರತ ಹಾಗೂ ಇಂಗ್ಲೆಂಡ್‌ ತಂಡಗಳು ಐಸಿಸಿ ವಿಶ್ವಕಪ್‌ ಟೂರ್ನಿಯ 38ನೇ ಪಂದ್ಯದಲ್ಲಿ ಮುಖಾಮುಖಿಯಾಗುತ್ತಿವೆ. ಇಂಗ್ಲೆಂಡ್‌ ಪಾಲಿಗೆ ಈ ಪಂದ್ಯ ಅತ್ಯಂತ ಪ್ರಮುಖವಾಗಿದೆ. ಏಕೆಂದರೆ ಮೂರು ಪಂದ್ಯಗಳಲ್ಲಿ ಸೋಲು ಅನುಭವಿಸಿರುವ ಇಂಗ್ಲೆಂಡ್‌ ಸೆಮಿಫೈನಲ್‌ಗೆ ಅರ್ಹತೆ ಪಡೆಯಬೇಕಾದರೆ ಇಂದಿನ ಪಂದ್ಯದಲ್ಲಿ ಗೆಲುವು ಅನಿವಾರ್ಯ.

ಈ ಹಿನ್ನೆಲೆಯಲ್ಲಿ ಮಾತನಾಡಿರುವ ಮೊಯಿನ್‌ ಅಲಿ, ಟೀಮ್‌ ಇಂಡಿಯಾ ನಾಯಕನ ವಿಕೆಟ್‌ ಉರುಳಿಸುವುದು ವಿಶ್ವದ ಎಲ್ಲ ಬೌಲರ್‌ಗಳ ಕನಸು. ಹಾಗಾಗಿ, ನನಗೂ ಅಷ್ಟೆ ನಾಳಿನ ಪಂದ್ಯದಲ್ಲಿ ವಿರಾಟ್‌ ಅವರನ್ನು ನನ್ನ ಬೌಲಿಂಗ್ ನಲ್ಲಿ ಔಟ್‌ ಮಾಡಬೇಕು ಎಂಬ ಕನಸು ಕಂಡಿದ್ದೇನೆ ಎಂದು ಹೇಳಿದ್ದಾರೆ. 

'ಕೊಹ್ಲಿ ಉತ್ತಮ ಫಾರ್ಮ್ ನಲ್ಲಿದ್ದು, ಕಳೆದ ಮೂರು ನಾಲ್ಕು ಪಂದ್ಯಗಳಿಂದ ಉತ್ತಮ ರನ್ ಕಲೆಹಾಕುತ್ತಿದ್ದಾರೆ. ವಿರಾಟ್ ಕೊಹ್ಲಿಯನ್ನು ನಾನು ಅಂಡರ್ 19 ಆಡುತ್ತಿದ್ದಾಗಿನಿಂದಲೂ ಬಲ್ಲೆ. ಸಾಕಷ್ಟು ಪಂದ್ಯಗಳನ್ನು ನಾವು ಎದುರಾಗಿದ್ದೇವೆ. ಅಲ್ಲದೆ ಆರ್ ಸಿಬಿ ಪರ ಆಡುವಾಗ ಇಬ್ಬರೂ ಒಂದೇ ತಂಡದಲ್ಲಿ ಆಡಿದ್ದು, ಉತ್ತಮ ಗೆಳೆತನ ಹೊಂದಿದ್ದೇವೆ. ಆದರೆ ಕ್ರೀಡಾಂಗಣದಲ್ಲಿ ಕೊಹ್ಲಿ ವಿಕೆಟ್ ಪಡೆಯುವುದು ನನ್ನ ಮುಂದಿನ ಗುರಿಯಾಗಿದೆ. ತವರಿನಲ್ಲಿ ಪಂದ್ಯ ನಡೆಯುತ್ತಿದೆ. ಅಲ್ಲದೆ ಇಂಗ್ಲೆಂಡ್ ಪಾಲಿಗೆ ಇದು ಮಹತ್ವದ ಪಂದ್ಯವಾಗಿದೆ. ಹೀಗಾಗಿ ಒತ್ತಡವನ್ನು ನಿಭಾಯಿಸಿಕೊಂಡು ಆಡಬೇಕಾದ ಅನಿವಾರ್ಯತೆ ಇದೆ ಎಂದು ಅಲಿ ಹೇಳಿದ್ದಾರೆ.