ಒಂದೇ ಪಂದ್ಯದಲ್ಲಿ ಎರಡೆರಡು ದ್ವಿಶತಕ: ಲಂಕಾ ಆಟಗಾರ ಎಂಜೆಲೋ ಪೆರೇರಾ ಅಪರೂಪದ ದಾಖಲೆ!

ಕೊಲಂಬೊ: 200 ವರ್ಷಗಳ ಕ್ರಿಕೆಟ್ ಇತಿಹಾಸದಲ್ಲೇ ಅತೀ ಅಪರೂಪದ ದಾಖಲೆಯೊಂದು 2ನೇ ಬಾರಿಗೆ ದಾಖಲಾಗಿದ್ದು, ಒಂದೇ ಪಂದ್ಯದಲ್ಲಿ ಬ್ಟಾಟ್ಸಮನ್ ಓರ್ವ ಎರಡೆರೆಡು ದ್ವಿಶತಕ ಸಿಡಿಸಿ ದಾಖಲೆ ನಿರ್ಮಿಸಿದ್ದಾನೆ.

ಹೌದು.. ಶ್ರೀಲಂಕಾದ ಪ್ರಥಮ ದರ್ಜೆ ಕ್ರಿಕೆಟ್ ನಲ್ಲಿ ಈ ಅಪರೂಪದ ದಾಖಲೆ ಸೃಷ್ಟಿಯಾಗಿದ್ದು, ಲಂಕಾದ 28 ವರ್ಷದ ಬ್ಯಾಟ್ಸ್​ಮನ್ ಪೆರೇರಾ ತಾವಾಡಿದ ಎರಡೂ ಇನ್ನಿಂಗ್ಸ್ ನಲ್ಲಿ ದ್ವಿಶತಕ ಸಾಧನೆ ಮಾಡಿ ಈ ಅಪರೂಪದ ದಾಖಲೆ ನಿರ್ಮಿಸಿದ್ದಾರೆ.

ನಾಂಡೆಸ್ಟ್ರಿಪ್ಟ್ಸ್ ಕ್ರಿಕೆಟ್ ಕ್ಲಬ್ ತಂಡದ ನಾಯಕರೂ ಆಗಿರುವ ಏಂಜೆಲೊ ಪೆರೇರಾ ದೇಶೀಯ ಪಂದ್ಯದ ಎರಡೂ ಇನಿಂಗ್ಸ್ ಗಳಲ್ಲಿ ದ್ವಿಶತಕ ಸಿಡಿಸುವ ಮೂಲಕ 81 ವರ್ಷ ಹಿಂದಿನ ದಾಖಲೆ ಸರಿಗಟ್ಟಿದ್ದಾರೆ. ಸಿಂಹಳೀಸ್ ಸ್ಪೋರ್ಟ್ಸ್ ಕ್ಲಬ್ ವಿರುದ್ಧದ ಪ್ರೀಮಿಯರ್ ಲೀಗ್ ಟೂರ್ನಿಯ ಪಂದ್ಯದಲ್ಲಿ 28 ವರ್ಷದ ಬ್ಯಾಟ್ಸ​ಮನ್ ಪೆರೇರಾ ಮೊದಲ ಇನಿಂಗ್ಸ್​ನಲ್ಲಿ 203 ಎಸೆತಗಳಲ್ಲಿ 201 ರನ್ ಬಾರಿಸಿದ್ದರೆ, 2ನೇ ಇನಿಂಗ್ಸ್ ನಲ್ಲಿ 268 ಎಸೆತಗಳಲ್ಲಿ 231 ರನ್ ಸಿಡಿಸಿದರು.  ಆ ಮೂಲಕ ಈ ಅತ್ಯಪರೂಪದ ದಾಖಲೆಗೆ ಪೆರೆರಾ ಪಾತ್ರರಾದರು.

ಪಿ ಸಾರಾ ಓವಲ್ ಮೈದಾನದಲ್ಲಿ ನಡೆದ 4 ದಿನಗಳ ಈ ಪಂದ್ಯ ಡ್ರಾದಲ್ಲಿ ಕೊನೆಗೊಂಡಿತು. ಪೆರೇರಾ ಲಂಕಾ ತಂಡದ ಪರ ಇದುವರೆಗೆ 4 ಏಕದಿನ ಮತ್ತು 2 ಟಿ20 ಪಂದ್ಯ ಆಡಿದ್ದರೂ, ಹೆಚ್ಚಿನ ಯಶ ಕಂಡಿಲ್ಲ. ಕ್ರಿಕೆಟ್ ಇತಿಹಾಸದಲ್ಲಿ ಕೇವಲ 2ನೇ ಬಾರಿ ಮಾತ್ರ ಇಂಥಹ ಸಾಧನೆ ದಾಖಲಾಗಿದೆ. 1938ರಲ್ಲಿ ಇಂಗ್ಲೆಂಡ್ ನಲ್ಲಿ ಮೊದಲ ಬಾರಿ ಈ ಸಾಧನೆ ದಾಖಲಾಗಿತ್ತು. ಕೆಂಟ್ ಬ್ಯಾಟ್ಸಮನ್ ಆರ್ಥರ್ ಫಾಗ್, ಎಸೆಕ್ಸ್ ವಿರುದ್ಧದ ಪಂದ್ಯದಲ್ಲಿ ಕ್ರಮವಾಗಿ 244 ಮತ್ತು ಅಜೇಯ 202 ರನ್ ಸಿಡಿಸಿದ್ದರು. ಇದು ಕ್ರೆಕೆಟ್ ಇತಿಹಾಸದಲ್ಲೇ ದಾಖಲಾದ ಮೊದಲ ಎರೆಡರೆಡು ದ್ವಿಶತಕವಾಗಿದೆ.