ಐಸಿಸಿ ಚಾಂಪಿಯನ್ಸ್​ ಟ್ರೋಫಿ: ಭಾರತದ ವಿರುದ್ಧ ಶ್ರೀಲಂಕಾಗೆ 7 ವಿಕೆಟ್​ ಜಯ

ಓವಲ್: ಚಾಂಪಿಯನ್ಸ್​ ಟ್ರೋಫಿ ಟೂರ್ನಿಯ ಬಿ ಗುಂಪಿನ ಪಂದ್ಯದಲ್ಲಿ ತಂಡದ ಬ್ಯಾಟ್ಸಮನ್ ಗಳು ತೋರಿದ ಸಾಂಘಿಕ ಹೋರಾಟದ ಪರಿಣಾಮ ಶ್ರೀಲಂಕಾ ತಂಡ ಭಾರತದ ವಿರುದ್ಧ 7 ವಿಕೆಟ್ ಗಳ ಭರ್ಜರಿ ಜಯ ಸಾಧಿಸಿದೆ.

ಲಂಡನ್ ಓವಲ್ ಮೈದಾನದಲ್ಲಿ ನಡೆದ ಪಂದ್ಯದಲ್ಲಿ ಭಾರತ ನೀಡಿದ 322 ರನ್ ಗಳ ಗುರಿಯನ್ನು ಬೆನ್ನು ಹತ್ತಿದ ಮ್ಯಾಥ್ಯೂಸ್ ಪಡೆ 48.4 ಓವರ್​ಗಳಲ್ಲಿ 3 ವಿಕೆಟ್​ ನಷ್ಟಕ್ಕೆ 322 ರನ್​ ಗಳಿಸಿ ಜಯಭೇರಿ ಭಾರಿಸಿದೆ. ಆ ಮೂಲಕ ಚಾಂಪಿಯನ್ಸ್ ಟ್ರೋಫಿಯಲ್ಲಿ ಶ್ರೀಲಂಕಾ ಪಡೆ  ಜೀವಂತವಾಗಿದ್ದು, ಮುಂದಿನ ಪಂದ್ಯವನ್ನೂ ಗೆದ್ದರೆ ಲಂಕಾ ತಂಡದ ಸೆಮೀಸ್ ಹಾದಿ ಸುಗಮವಾಗಲಿದೆ. ಶ್ರೀಲಂಕಾ ಪರ ಮೆಂಡಿಸ್​ (89 ರನ್) ಮತ್ತು ಗುಣತಿಲಕ (76 ರನ್) ಆಕರ್ಷಕ ಅರ್ಧ ಶತಕ ಗಳಿಸಿದರು. ಇವರಿಗೆ ಉತ್ತಮ ಸಾಥ್​ ನೀಡಿದ ಪೆರೇರಾ (47 ರನ್) (ಗಾಯಗೊಂಡು  ನಿವೃತ್ತಿ) ರನ್​ ಗಳಿಸಿದರು. ಇನಿಂಗ್ಸ್​ ಕೊನೆಯಲ್ಲಿ ನಾಯಕ ಏಂಜಲೋ ಮ್ಯಾಥ್ಯೂಸ್​ (ಅಜೇಯ 52 ರನ್) ಮತ್ತು ಗುಣರತ್ನೆ (ಅಜೇಯ 34 ರನ್) ಶ್ರೀಲಂಕಾಗೆ ಜಯ ತಂದಿತ್ತರು.

ಭಾರತದ ಪರ ಭವನೇಶ್ವರ್​ ಕುಮಾರ್​ ಮಾತ್ರ ವಿಕೆಟ್​ ಪಡೆಯುವಲ್ಲಿ ಸಫಲರಾದರು. ಪ್ರಮುಖವಾಗಿ ಧೋನಿ ಮತ್ತು ಭುವನೇಶ್ವರ್ ಕುಮಾರ್ ಮಾಡಿದ ಎರಡು ರನೌಟ್ ಗಳು ಗಮನ ಸೆಳೆಯಿತು. ಲಂಕಾ ಬ್ಯಾಟ್ಸಮನ್ ಗಳ ದಿಟ್ಟ ಹೋರಾಟದ ಎದುರು ಭಾರತೀಯ ಬೌಲರ್ ಗಳ  ಯಾವುದೇ ಯೋಜನೆ ಫಲ ನೀಡಲಿಲ್ಲ. ಅಂತಿಮವಾಗಿ ಭಾರತ ಲಂಕಾ ಎದುರು 7 ವಿಕೆಟ್ ಅಂತರದಿಂದ ಸೋಲು ಕಂಡಿತು.

ಇನ್ನು ಭಾರತದ ಸೆಮೀಸ್ ಹಾದಿ ಸುಗಮವಾಗಲು ಕೊಹ್ಲಿ ಪಡೆ ಭಾನುವಾರ ನಡೆಯಲಿರುವ ದಕ್ಷಿಣ ಆಫ್ರಿಕಾ ವಿರುದ್ಧದ ಪಂದ್ಯವನ್ನು ಗೆಲ್ಲಬೇಕಿದೆ. ಲಂಕಾಪರ ಅತ್ಯುತ್ತಮ ಬ್ಯಾಟಿಂಗ್ ಪ್ರದರ್ಶನ ನೀಡಿದ ಮೆಂಡಿಸ್ ಪಂದ್ಯಶ್ರೇಷ್ಠ ಪ್ರಶಸ್ತಿಗೆ ಭಾಜನರಾದರು.