ಹನಿಮೂನ್ ಗಾಗಿ ರೋಮ್ ಗೆ ತೆರಳಿದ ವಿರಾಟ್ ಕೊಹ್ಲಿ-ಅನುಷ್ಕಾ ಶರ್ಮಾ

ಕಳೆದ ಸೋಮವಾರ ಇಟಲಿಯ ಮಿಲನ್ ನಗರದಲ್ಲಿ ದಾಂಪತ್ಯ ಜೀವನಕ್ಕೆ ಕಾಲಿಟ್ಟ ಟೀಂ ಇಂಡಿಯಾದ ನಾಯಕ ವಿರಾಟ್ ಕೊಹ್ಲಿ ಹಾಗೂ ಬಾಲಿವುಡ್ ನಟಿ ಅನುಷ್ಕಾ ಶರ್ಮಾ ಅವರು ಈಗ ಹನಿಮೂನ್ ಮೂಡ್ ನಲ್ಲಿದ್ದು, ರೋಮ್ಯಾನ್ಸ್ ಗಾಗಿ ರೋಮ್ ಗೆ ಪ್ರಯಾಣ ಬೆಳೆಸಿದ್ದಾರೆ ಎಂದು ಮಾಧ್ಯಮಗಳು ವರದಿ ಮಾಡಿವೆ.

ತಾರಾ ದಂಪತಿ ವಿರಾಟ್ ಕೊಹ್ಲಿ ಹಾಗೂ ಅನುಷ್ಕಾ ಒಂದು ವಾರಗಳ ಕಾಲ ರೋಮ್ ಸುತ್ತಲಿದ್ದು, ಬಳಿಕ ಭಾರತಕ್ಕೆ ಆಗಮಿಸಿದ್ದು ಮುಂಬೈ ಮತ್ತು ದೆಹಲಿಯಲ್ಲಿ ನಡೆಯುವ ಎರಡು ಅದ್ಧೂರಿ ಆರತಕ್ಷತೆಯಲ್ಲಿ ಭಾಗವಹಿಸಲಿದ್ದಾರೆ.

ವಿರಾಟ್-ಅನುಷ್ಕಾ ಅವರು ಅತ್ತ ರೋಮ್ ಗೆ ಪ್ರಯಾಣ ಬೆಳಸಿದ್ದು, ಅವರ ಇಬ್ಬರ ಕುಟುಂಬ ಸದಸ್ಯರು ಇಟಲಿಯಿಂದ ಭಾರತಕ್ಕೆ ವಾಪಸ್ ಬರುತ್ತಿದ್ದಾರೆ. ಕೊಹ್ಲಿ ದಂಪತಿ ಮಧುಚಂದ್ರ ಮುಗಿಸಿ ಬರ್ತಿದ್ದಂತೆ ಭಾರತದಲ್ಲಿ ಎರಡು ಅದ್ಧೂರಿ ಆರತಕ್ಷತೆ ನಡೆಯಲಿದೆ. ಡಿಸೆಂಬರ್ 21ರಂದು ಕುಟುಂಬಸ್ಥರ ಪರವಾಗಿ ದೆಹಲಿಯಲ್ಲಿ ಹಾಗೂ ಡಿಸೆಂಬರ್ 26ರಂದು ಮುಂಬೈನಲ್ಲಿ ಕೊಹ್ಲಿ-ಅನುಷ್ಕಾ ಗ್ರ್ಯಾಂಡ್ ಪಾರ್ಟಿ ನೀಡಲಿದ್ದಾರೆ ಎನ್ನಲಾಗಿದೆ. ಈ ಪಾರ್ಟಿಯಲ್ಲಿ ಬಾಲಿವುಡ್ ಹಾಗೂ ಕ್ರಿಕೆಟ್ ಆಟಗಾರರು ನವ ಜೋಡಿಗೆ ಶುಭಕೋರಲಿದ್ದಾರೆ.