ಪ್ಲೇ ಆಫ್ ಗೇರಲು ಆರ್ ಸಿಬಿಗೆ ಇನ್ನೂ ಇದೆ ಅವಕಾಶ!

ಬೆಂಗಳೂರು: ಸತತ ಸೋಲುಗಳ ಮೂಲಕ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ಐಪಿಎಲ್ 10 ಟೂರ್ನಿಯಿಂದಲೇ ಹೊರ ಬೀಳಲಿದೆ ಎಂಬ ವಾದದ ನಡುವೆಯೇ ಆರ್ ಸಿಬಿ ಗೂ ಪ್ಲೇ ಆಫ್ ಗೇರುವ ಅವಕಾಶವಿದೆ ಎಂಬ  ವಾದ ಕೇಳಿಬರುತ್ತಿದೆ.

ಐಪಿಎಲ್ 2017 ಟೂರ್ನಿಯ ಅಂಕಿ-ಅಂಶಗಳನ್ನು ಅವಲೋಕಿಸಿದಾಗ ಆರ್‌ಸಿಬಿಗೆ ಪ್ಲೇ-ಆಫ್ ಹಂತಕ್ಕೆ ಸ್ಪರ್ಧೆಯೊಡ್ಡುವ ಅವಕಾಶ ಈಗಲೂ ಇದ್ದು, ಆರ್‌ಸಿಬಿ ತಂಡ ಉಳಿದ ಎಲ್ಲ 5 ಪಂದ್ಯಗಳನ್ನು ಜಯಿಸಲೇ ಬೇಕಾದ  ಅನಿವಾರ್ಯತೆ ಇದೆ. ಅದೂ ಕೂಡ ಭಾರಿ ರನ್ ರೇಟ್ ಅಂತರದಲ್ಲಿ. ರಾಯಲ್ ಚಾಲೆಂಜರ್ಸ್‌ ಬೆಂಗಳೂರು ತಂಡ ಪ್ರಸ್ತುತ 9 ಪಂದ್ಯಗಳಲ್ಲಿ 5 ಅಂಕಗಳನ್ನು ಗಳಿಸಿದ್ದು, ಆರ್‌ಸಿಬಿ ತಂಡ ಉಳಿದ ಎಲ್ಲ 5 ಪಂದ್ಯಗಳನ್ನು ಜಯಿಸಿದರೆ  15 ಅಂಕ ಗಳಿಸುತ್ತದೆ. ಆಗ ಆರ್ ಸಿಬಿ ಅಗ್ರ-4ರಲ್ಲಿ ಸ್ಥಾನ ಪಡೆಯ ಬಹುದಾಗಿದೆ.  

ಆರ್‌ಸಿಬಿ ಮತ್ತೊಂದು ಸೋಲು ಅನುಭವಿಸಿದರೆ 13 ಅಂಕ ಗಳಿಸುತ್ತದೆ. ಆಗಲೂ ಪ್ಲೇ-ಆಫ್‌ಗೆ ತಲುಪುವ ಅವಕಾಶ ಮುಕ್ತವಾಗಿರುತ್ತದೆ.  ಈ ವರ್ಷದ ಐಪಿಎಲ್‌ನಲ್ಲಿ ಕೋಲ್ಕತಾ ನೈಟ್ ರೈಡರ್ಸ್ ಹಾಗೂ ಮುಂಬೈ ಇಂಡಿಯನ್ಸ್  ತಂಡಗಳು ಅಂಕಪಟ್ಟಿಯಲ್ಲಿ ಈಗಾಗಲೇ ಮೊದಲ 2 ಸ್ಥಾನಗಳಲ್ಲಿ ಸ್ಥಾನ ಪಡೆದಿದ್ದು, ಸನ್‌ ರೈಸರ್ಸ್ ಹೈದರಾಬಾದ್ 3ನೆ ಸ್ಥಾನದಲ್ಲಿದೆ. ಒಂದು ವೇಳೆ ಈ ಮೂರು ತಂಡಗಳು ಗೆಲುವಿನ ಓಟ ಮುಂದುವರಿಸಿದರೆ, ಉಳಿದ ತಂಡಗಳು  ಸೋಲು ಕಂಡರೆ, ಆರ್‌ಸಿಬಿ 13 ಅಂಕ ಗಳಿಸಿದರೆ ಮುಂದಿನ ಸುತ್ತಿಗೆ ತಲುಪಲು ಅವಕಾಶವಿರುತ್ತದೆ.