'ಆ್ಯಕ್ಷನ್ ಜೊತೆಗೆ ಆಳವಾದ ಭಾವನೆಗಳೂ ಇವೆ': Toxic ಬಗ್ಗೆ ಯಶ್ ಹೇಳಿದ್ದಿಷ್ಟು...

ಬೆಂಗಳೂರು: ಟಾಕ್ಸಿಕ್: ಎ ಫೇರಿ ಟೇಲ್ ಫಾರ್ ಗ್ರೋನ್-ಅಪ್ಸ್ ಚಿತ್ರವು ಕೇವಲ ಭರ್ಜರಿ ಆ್ಯಕ್ಷನ್‌ಗಷ್ಟೇ ಸೀಮಿತವಾಗಿರುವುದಿಲ್ಲ, ಅದರಲ್ಲಿ ಭಾವನಾತ್ಮಕ ಅಂಶವೂ ಪ್ರಮುಖ ಪಾತ್ರ ವಹಿಸಲಿದೆ ಎಂದು ನಟ ಯಶ್ ಅಭಿಮಾನಿಗಳಿಗೆ ಭರವಸೆ ನೀಡಿದ್ದಾರೆ.

ಅಮೆರಿಕದ ಸ್ಯಾನ್ ಡಿಯಾಗೋ ಕಾಮಿಕ್-ಕಾನ್ ಕಾರ್ಯಕ್ರಮದಲ್ಲಿ ಮಾತನಾಡಿದ ಯಶ್, ಗೀತು ಮೋಹನ್‌ದಾಸ್ ನಿರ್ದೇಶನದ ಈ ಚಿತ್ರದಲ್ಲಿ ಆ್ಯಕ್ಷನ್ ಜೊತೆಗೆ ಆಳವಾದ ಭಾವನೆಗಳೂ ಇವೆ ಎಂದು ಹೇಳಿದರು.

ಇದು ಒಂದು ರೋಲರ್-ಕೋಸ್ಟರ್ ಅನುಭವ. ಕಥೆ ತುಂಬಾ ಆಳವಾಗಿದೆ. ಜೀವನಕ್ಕಿಂತಲೂ ದೊಡ್ಡದಾಗಿ ಮೂಡಿಬಂದಿದೆ. ಚಿತ್ರದ ಒಟ್ಟಾರೆ ಸ್ವರೂಪವೇ ಅದಾಗಿದೆ. ಆದರೆ ಇದರಲ್ಲಿ ಭಾವನೆಗಳೂ ಇವೆ. ಈ ಸಂಯೋಜನೆ ಖಂಡಿತವಾಗಿಯೂ ಕೆಲಸ ಮಾಡುತ್ತದೆ ಎಂದು ನನಗೆ ನಂಬಿಕೆ ಇದೆ. ಸಿನಿಮಾ ನೋಡಿ ಹೊರಬರುವವರು 'ಎಂಥಾ ಸಿನಿಮಾ!' ಎಂದು ಆಶ್ಚರ್ಯಪಡುವರು ಎಂದು ಯಶ್ ಹೇಳಿದರು.

ಚಿತ್ರದ ಟೀಸರ್‌ನಲ್ಲಿ ಕತ್ತಲೆಯ ಹಿನ್ನೆಲೆ ಮತ್ತು ಸ್ಟೈಲಿಶ್ ಆ್ಯಕ್ಷನ್‌ಗೆ ಹೆಚ್ಚಿನ ಒತ್ತು ನೀಡಲಾಗಿದ್ದರೂ, ಟಾಕ್ಸಿಕ್ ಚಿತ್ರದ ಕಥೆಯನ್ನು ಮುನ್ನಡೆಸುವ ಪ್ರಮುಖ ಶಕ್ತಿಯೇ ಭಾವನೆ ಎಂದು ಯಶ್ ಸ್ಪಷ್ಟಪಡಿಸಿದರು.

ಇದೇ ವೇಳೆ, ಜಾನ್ ವಿಕ್ ಸರಣಿಯ ಚಿತ್ರಗಳಿಗೆ ಆ್ಯಕ್ಷನ್ ಸಂಯೋಜನೆ ಮಾಡಿರುವ ಸ್ಟಂಟ್ ನಿರ್ದೇಶಕ ಜೆ.ಜೆ. ಪೆರಿ ಅವರ ಬಗ್ಗೆ ತಮ್ಮ ಮೆಚ್ಚುಗೆಯನ್ನು ವ್ಯಕ್ತಪಡಿಸಿದರು.

ನನಗೆ ಆ್ಯಕ್ಷನ್ ತುಂಬಾ ಇಷ್ಟ. ನಾನು ಆ್ಯಕ್ಷನ್ ಸಿನಿಮಾಗಳ ದೊಡ್ಡ ಅಭಿಮಾನಿ. ಆ್ಯಕ್ಷನ್ ದೃಶ್ಯಗಳಲ್ಲಿ ಅಭಿನಯಿಸುವ ಅವಕಾಶ ಸಿಕ್ಕಾಗಲೆಲ್ಲಾ ತುಂಬಾ ಉತ್ಸಾಹವಾಗುತ್ತದೆ. ಜೆ.ಜೆ. ಅದ್ಭುತ ಕೆಲಸ ಮಾಡಿದ್ದಾರೆ. ಅವರು ಸಂಯೋಜಿಸಿರುವ ಆ್ಯಕ್ಷನ್ ದೃಶ್ಯಗಳು ನನಗೆ ಯಾವಾಗಲೂ ಸ್ಫೂರ್ತಿಯಾಗಿವೆ ಎಂದು ಹೇಳಿದರು.

ಆದರೆ ಕೇವಲ ಆ್ಯಕ್ಷನ್‌ಗಷ್ಟೇ ತಂಡ ಒತ್ತು ನೀಡಿಲ್ಲ, ನನ್ನ ದೃಷ್ಟಿಯಲ್ಲಿ ಆ್ಯಕ್ಷನ್ ಜೊತೆಗೆ ಭಾವನೆ ಇರಬೇಕು. ಟಾಕ್ಸಿಕ್ ಚಿತ್ರದ ಸಾರವೂ ಅದೇ. ಪ್ರತಿಯೊಂದು ಆ್ಯಕ್ಷನ್ ದೃಶ್ಯದ ಹಿಂದೆ ಭಾವನಾತ್ಮಕ ಕಾರಣ ಇರಬೇಕು ಎಂದು ಹೇಳಿದರು.

ಇದೇ ರೀತಿಯ ವಿಧಾನವನ್ನು ರಾಮಾಯಣ ಚಿತ್ರದಲ್ಲಿಯೂ ಅನುಸರಿಸಲಾಗಿದೆ ಎಂದು ಯಶ್ ತಿಳಿಸಿದರು.

ರಾಮಾಯಣ ಚಿತ್ರದಲ್ಲಿಯೂ ಅದ್ಭುತ ಆ್ಯಕ್ಷನ್ ಇರುತ್ತದೆ. ಆದರೆ ಅದಕ್ಕಿಂತಲೂ ಭಾವನೆಗಳಿಗೆ ಸಮಾನ ಮಹತ್ವ ನೀಡಲಾಗಿದೆ ಎಂದರು.

ಗೀತು ಮೋಹನ್‌ದಾಸ್ ನಿರ್ದೇಶಿಸಿರುವ ಟಾಕ್ಸಿಕ್ ಚಿತ್ರವನ್ನು ಕೆವಿಎನ್ ಪ್ರೊಡಕ್ಷನ್ಸ್ ಮತ್ತು ಮಾನ್‌ಸ್ಟರ್ ಮೈಂಡ್ ಕ್ರಿಯೇಷನ್ಸ್ ನಿರ್ಮಿಸಿವೆ. ಚಿತ್ರದಲ್ಲಿ ಕಿಯಾರಾ ಅಡ್ವಾಣಿ, ನಯನತಾರಾ, ಹುಮಾ ಖುರೇಷಿ, ತಾರಾ ಸುತಾರಿಯಾ ಹಾಗೂ ರುಕ್ಮಿಣಿ ವಸಂತ್ ಸೇರಿದಂತೆ ಹಲವರು ನಟಿಸಿದ್ದಾರೆ.

ಕನ್ನಡ ಮತ್ತು ಇಂಗ್ಲಿಷ್ ಭಾಷೆಗಳಲ್ಲಿ ಏಕಕಾಲದಲ್ಲಿ ಚಿತ್ರೀಕರಿಸಲಾದ ಟಾಕ್ಸಿಕ್ ಚಿತ್ರವು ಆಗಸ್ಟ್ 26ರಂದು ವಿಶ್ವದಾದ್ಯಂತ ಹಲವು ಭಾಷೆಗಳಲ್ಲಿ ಬಿಡುಗಡೆಯಾಗಲಿದೆ.