Godzilla vs Kong ಖ್ಯಾತಿಯ ನಟಿ Kaylee Hottle ಕಾರು ಅಪಘಾತದಲ್ಲಿ ಸಾವು

ಲಾಸ್ ಏಂಜಲೀಸ್: ಅಮೆರಿಕದ ಮೇರಿಲ್ಯಾಂಡ್ ರಾಜ್ಯದಲ್ಲಿ ಸಂಭವಿಸಿದ ಕಾರು ಅಪಘಾತದಲ್ಲಿ ಹಾಲಿವುಡ್ ನ ಖ್ಯಾತ ನಟಿ ಕೇಲಿ ಹಾಟಲ್ ಸಾವನ್ನಪ್ಪಿದ್ದಾರೆ.

18 ವರ್ಷದ ಕೇಲಿ ಹಾಟಲ್ ಹಾಲಿವುಡ್‌ನ ಜನಪ್ರಿಯ 'ಗಾಡ್ಜಿಲ್ಲಾ ವರ್ಸಸ್ ಕಾಂಗ್' ಹಾಗೂ 'ಗಾಡ್ಜಿಲ್ಲಾ x ಕಾಂಗ್: ದಿ ನ್ಯೂ ಎಂಪೈರ್' ಚಿತ್ರಗಳಲ್ಲಿ ಜಿಯಾ (Jia) ಪಾತ್ರದ ಮೂಲಕ ವಿಶ್ವದಾದ್ಯಂತ ಜನಪ್ರಿಯತೆ ಗಳಿಸಿದ್ದರು. ಆ ಚಿತ್ರದಲ್ಲಿ ಕಿವುಡ ಮತ್ತು ಮೂಕ ಬಾಲಕಿಯಾಗಿ ಕಾಣಿಸಿಕೊಂಡಿದ್ದ ನಟಿ ಕೇಲಿ ಹಾಟಲ್ (Kaylee Hottle) ಅವರು 18ನೇ ವಯಸ್ಸಿನಲ್ಲಿ ಕಾರು ಅಪಘಾತದಲ್ಲಿ ಮೃತಪಟ್ಟಿದ್ದಾರೆ.

ಕೇಲಿ ಹಾಟಲ್ ಪ್ರಯಾಣಿಸುತ್ತಿದ್ದ ಕಾರು ಮಂಗಳವಾರ ಮುಂಜಾನೆ ಮೇರಿಲ್ಯಾಂಡ್‌ನ ಫ್ರೆಡರಿಕ್ ಕೌಂಟಿಯಲ್ಲಿ ರಸ್ತೆಯಿಂದ ನಿಯಂತ್ರಣ ತಪ್ಪಿ ಕಲ್ವರ್ಟ್‌ಗೆ ಡಿಕ್ಕಿ ಹೊಡೆದಿದೆ.

ಗಂಭೀರವಾಗಿ ಗಾಯಗೊಂಡಿದ್ದ ಕೇಲಿಯನ್ನು ತಕ್ಷಣ ಟ್ರಾಮಾ ಕೇಂದ್ರಕ್ಕೆ ಏರ್‌ಲಿಫ್ಟ್ ಮಾಡಲಾಗಿದ್ದರೂ, ಆಸ್ಪತ್ರೆಗೆ ಸಾಗಿಸುವ ಮಾರ್ಗಮಧ್ಯೆಯೇ ಅವರು ಮೃತಪಟ್ಟಿದ್ದಾರೆ.

ಕಾರಿನ ಅತಿವೇಗವೇ ಅಪಘಾತಕ್ಕೆ ಪ್ರಮುಖ ಕಾರಣವಾಗಿರಬಹುದು ಎಂದು ಅಧಿಕಾರಿಗಳು ಶಂಕಿಸಿದ್ದು, ಪ್ರಕರಣದ ತನಿಖೆ ಮುಂದುವರಿದಿದೆ.

ಕೇಲಿ ಅವರ ತಂದೆ ಜೋಶುವಾ ಹಾಟಲ್, ಅಮೆರಿಕನ್ ಸೈನ್ ಲ್ಯಾಂಗ್ವೇಜ್ (ASL) ಮೂಲಕ ಫೇಸ್‌ಬುಕ್‌ನಲ್ಲಿ ಈ ದುಃಖದ ಸುದ್ದಿಯನ್ನು ದೃಢಪಡಿಸಿದ್ದಾರೆ. ಟೆಕ್ಸಾಸ್ ಸ್ಕೂಲ್ ಫಾರ್ ದ ಡೆಫ್ ಕೂಡ ಅವರ ನಿಧನವನ್ನು ಅಧಿಕೃತವಾಗಿ ಪ್ರಕಟಿಸಿದೆ.

2021ರಲ್ಲಿ ಬಿಡುಗಡೆಯಾದ 'ಗಾಡ್ಜಿಲ್ಲಾ ವರ್ಸಸ್ ಕಾಂಗ್' ಚಿತ್ರದ ಮೂಲಕ ಕೇಲಿ ಹಾಟಲ್ ಚಿತ್ರರಂಗಕ್ಕೆ ಪದಾರ್ಪಣೆ ಮಾಡಿದ್ದರು. ಕಿವುಡ ಅನಾಥ ಬಾಲಕಿ ಜಿಯಾ ಪಾತ್ರದಲ್ಲಿ ಅವರ ಅಭಿನಯ ಅಪಾರ ಮೆಚ್ಚುಗೆ ಪಡೆದಿತ್ತು.

ಬಳಿಕ 2024ರ 'ಗಾಡ್ಜಿಲ್ಲಾ x ಕಾಂಗ್: ದಿ ನ್ಯೂ ಎಂಪೈರ್' ಚಿತ್ರದಲ್ಲೂ ಇದೇ ಪಾತ್ರವನ್ನು ಪುನರಾವರ್ತಿಸಿ ಗಮನ ಸೆಳೆದಿದ್ದರು. ಕೇಲಿ ಹಾಟಲ್ ಅವರು ಕಿವುಡರ ಕುಟುಂಬದಲ್ಲಿ ಜನಿಸಿದ್ದು, ಹಾಲಿವುಡ್‌ನಲ್ಲಿ ಕಿವುಡ ಕಲಾವಿದರ ಪ್ರತಿನಿಧಿತ್ವಕ್ಕೆ ಪ್ರಬಲ ಧ್ವನಿಯಾಗಿದ್ದರು.

ಅವರ ಸಾವಿನ ಸುದ್ದಿ ಹೊರಬಿದ್ದ ಬೆನ್ನಲ್ಲೇ ಸಹನಟರಾದ ಮಿಲ್ಲಿ ಬಾಬಿ ಬ್ರೌನ್, ರೆಬೆಕ್ಕಾ ಹಾಲ್ ಸೇರಿದಂತೆ ಹಲವು ಹಾಲಿವುಡ್ ತಾರೆಯರು ಮತ್ತು ಅಭಿಮಾನಿಗಳು ಸಾಮಾಜಿಕ ಜಾಲತಾಣಗಳಲ್ಲಿ ಭಾವಪೂರ್ಣ ಶ್ರದ್ಧಾಂಜಲಿ ಸಲ್ಲಿಸಿದ್ದಾರೆ.