ಶಿವರಾಜ್‌ಕುಮಾರ್, ಉಪೇಂದ್ರ, ರಾಜ್ ಬಿ ಶೆಟ್ಟಿ ನಟನೆಯ ಬಹುನಿರೀಕ್ಷಿತ '45' ಬಿಡುಗಡೆ ದಿನಾಂಕ ಘೋಷಣೆ

ಬಹು ನಿರೀಕ್ಷಿತ ಚಿತ್ರ 45, ಡಿಸೆಂಬರ್ 25 ರಂದು ಬಹುಭಾಷೆಗಳಲ್ಲಿ ಅದ್ದೂರಿಯಾಗಿ ಬಿಡುಗಡೆಯಾಗಲಿದೆ. ಆರಂಭದಲ್ಲಿ ಆಗಸ್ಟ್ 15 ರಂದು ತೆರೆಗೆ ಬರಲು ನಿರ್ಧರಿಸಲಾಗಿತ್ತು. ಆದರೆ, ವ್ಯಾಪಕವಾದ ಪೋಸ್ಟ್-ಪ್ರೊಡಕ್ಷನ್ ಮತ್ತು ದೃಶ್ಯ ಪರಿಣಾಮಗಳ ಕೆಲಸದಿಂದಾಗಿ ಚಿತ್ರದ ಬಿಡುಗಡೆಯನ್ನು ಮುಂದೂಡಲಾಗಿತ್ತು.

ಶಿವರಾಜ್‌ಕುಮಾರ್, ಉಪೇಂದ್ರ ಮತ್ತು ರಾಜ್ ಬಿ ಶೆಟ್ಟಿ ಸೇರಿದಂತೆ ಬಹು ತಾರಾಗಣವನ್ನು ಹೊಂದಿರುವ '45' ಚಿತ್ರವು ಅರ್ಜುನ್ ಜನ್ಯ ಅವರ ನಿರ್ದೇಶನದ ಮೊದಲ ಚಿತ್ರವಾಗಿದೆ. ಸೂರಜ್ ಪ್ರೊಡಕ್ಷನ್ಸ್ ಬ್ಯಾನರ್ ಅಡಿಯಲ್ಲಿ ರಮೇಶ್ ರೆಡ್ಡಿ ಈ ಚಿತ್ರವನ್ನು ನಿರ್ಮಿಸಿದ್ದಾರೆ.

ಚಿತ್ರ ಬಿಡುಗಡೆ ವಿಳಂಬಕ್ಕೆ ಅಪೂರ್ಣವಾದ ಸಿಜಿ ಕೆಲಸವೇ ಕಾರಣ. ಇದು ಚಿತ್ರದಲ್ಲಿ ಮಹತ್ವದ ಪಾತ್ರವನ್ನು ವಹಿಸುತ್ತದೆ. ಚಿತ್ರದ ಶೇ 40 ಕ್ಕಿಂತ ಹೆಚ್ಚು ಭಾಗವು VFX ಅನ್ನು ಅವಲಂಬಿಸಿದೆ. ಇದನ್ನು ಹಾಲಿವುಡ್ ದರ್ಜೆಯ ದೃಶ್ಯ ಪರಿಣಾಮಗಳಿಗೆ ಹೆಸರುವಾಸಿಯಾದ ಕೆನಡಾದ MARZ ಸ್ಟುಡಿಯೋ (ಮಾನ್ಸ್ಟರ್ಸ್ ಏಲಿಯೆನ್ಸ್ ರೋಬೋಟ್ಸ್ ಜೋಂಬಿಸ್) ನಿರ್ವಹಿಸಿದೆ. ಇದು MARZ ನ ಮೊದಲ ಕನ್ನಡ ಯೋಜನೆಯಾಗಿದ್ದು, ಸ್ಟುಡಿಯೋ ಮತ್ತು ಪ್ರಾದೇಶಿಕ ಉದ್ಯಮ ಎರಡಕ್ಕೂ ಗಮನಾರ್ಹ ಮೈಲಿಗಲ್ಲಾಗಿದೆ.

'ನಮ್ಮ ಚಿತ್ರದ VFX ಅನ್ನು ಕೆನಡಾದಲ್ಲಿ ಮಾಡಲಾಗುತ್ತಿದೆ. ಅನುಭವಿ ಹಾಲಿವುಡ್ ತಂತ್ರಜ್ಞರು ಇದರಲ್ಲಿ ಸೇರಿಕೊಂಡಿದ್ದಾರೆ. ವಿಳಂಬವು ದುರದೃಷ್ಟಕರವಾದರೂ, ನಾವು ವಿಶ್ವ ದರ್ಜೆಯ ಅನುಭವವನ್ನು ನೀಡಲು ಮುಂದಾಗಿದ್ದೇವೆ. ಸಿಜಿ ಕೆಲಸವು ಪೂರ್ಣಗೊಳ್ಳುವ ಹಂತದಲ್ಲಿದೆ ಮತ್ತು ಕ್ರಿಸ್‌ಮಸ್ ವೇಳೆಗೆ ಚಿತ್ರ ಬಿಡುಗಡೆಯಾಗುವ ವಿಶ್ವಾಸ ನಮಗಿದೆ' ಎಂದು ನಿರ್ದೇಶಕ ಅರ್ಜುನ್ ಜನ್ಯ ಹೇಳಿದರು.

ಕ್ರಿಸ್‌ಮಸ್ ದಿನದಂದು ಚಿತ್ರ ಬಿಡುಗಡೆಗೆ ಆಯ್ಕೆ ಮಾಡುವುದು ಒಂದು ಲೆಕ್ಕಾಚಾರದ ಕ್ರಮವಾಗಿದ್ದು, ಇದು ಹಬ್ಬದ ಮನಸ್ಥಿತಿ ಮತ್ತು ಸಾರ್ವಜನಿಕ ರಜಾದಿನ ಮಾತ್ರವಲ್ಲದೆ ಸಕಾರಾತ್ಮಕ ಜ್ಯೋತಿಷ್ಯ ಸಮಯಕ್ಕೂ ಹೊಂದಿಕೆಯಾಗುತ್ತದೆ. ಕುಟುಂಬಗಳು ಒಟ್ಟಿಗೆ ಸೇರಿ ಸಿನಿಮಾವನ್ನು ಆನಂದಿಸಲು ಇದು ಸೂಕ್ತ ದಿನ' ಎಂದು ನಿರ್ದೇಶಕ ಅರ್ಜುನ್ ವಿವರಿಸಿದರು.

ಪ್ರಮುಖ ತಾರೆಯರಿಗೆ, ವಿಶೇಷವಾಗಿ ಶಿವರಾಜ್‌ಕುಮಾರ್‌ಗೆ ಕೃತಜ್ಞತೆಗಳನ್ನು ವ್ಯಕ್ತಪಡಿಸಿದ ಅವರು, 'ಈ ಪ್ರಯಾಣವು ಶಿವಣ್ಣ ಅವರ ಬೆಂಬಲದಿಂದ ಪ್ರಾರಂಭವಾಯಿತು. ಈ ದೃಷ್ಟಿಕೋನವನ್ನು ಪೂರ್ಣ ಹೃದಯದಿಂದ ಬೆಂಬಲಿಸಿದ್ದಕ್ಕಾಗಿ ನಾನು ಅವರಿಗೆ, ಉಪೇಂದ್ರ, ರಾಜ್ ಬಿ ಶೆಟ್ಟಿ ಮತ್ತು ವಿಶೇಷವಾಗಿ ನಮ್ಮ ನಿರ್ಮಾಪಕ ರಮೇಶ್ ರೆಡ್ಡಿಗೆ ಕೃತಜ್ಞನಾಗಿದ್ದೇನೆ' ಎಂದರು.

ನಿರ್ಮಾಪಕ ರಮೇಶ್ ಕೂಡ ಚಿತ್ರದ ಪ್ರಮಾಣ ಮತ್ತು ತಾಂತ್ರಿಕ ಸಾಧನೆಗಳ ಬಗ್ಗೆ ಉತ್ಸಾಹದಿಂದ ಮಾತನಾಡಿದರು. 'ನನಗೆ ತಿಳಿದ ಮಟ್ಟಿಗೆ, ಯಾವುದೇ ಕನ್ನಡ ಚಿತ್ರವು ಈ ಮಟ್ಟದ ದೃಶ್ಯ ಪರಿಣಾಮಗಳನ್ನು ಅಳವಡಿಸಿಕೊಂಡಿಲ್ಲ. ನಾವು ಕೇವಲ ಪ್ರಭಾವ ಬೀರಲು CG ಅನ್ನು ಸೇರಿಸುತ್ತಿಲ್ಲ. ಇದು ಕಥೆಯ ಅವಿಭಾಜ್ಯ ಅಂಗವಾಗಿದೆ. ನಾವು ಯಾವುದೇ ರಾಜಿ ಮಾಡಿಕೊಳ್ಳುತ್ತಿಲ್ಲ' ಎಂದು ತಿಳಿಸಿದರು.

ಚಿತ್ರ ತಾಂತ್ರಿಕವಾಗಿ ಸರಿಯಾದ ಹಾದಿಯಲ್ಲಿ ಸಾಗುವಂತೆ ಮಾಡಿದ್ದಕ್ಕಾಗಿ ವಿದೇಶಗಳಲ್ಲಿ ವಿಎಫ್‌ಎಕ್ಸ್ ಪ್ರಕ್ರಿಯೆಯನ್ನು ಸಂಯೋಜಿಸುತ್ತಿರುವ ಯಶ್ ಗೌಡ ಅವರಿಗೆ ಅವರು ಕೃತಜ್ಞತೆ ಸಲ್ಲಿಸಿದರು. ತೆಲುಗು ಚಿತ್ರರಂಗದ ಪ್ರಮುಖ ನಿರ್ಮಾಣ ಸಂಸ್ಥೆ ಮೈತ್ರಿ ಮೂವಿ ಮೇಕರ್ಸ್ 45 ಚಿತ್ರ ವಿತರಿಸಲು ಆಸಕ್ತಿ ವ್ಯಕ್ತಪಡಿಸಿದ್ದು, ಇದು ಭಾರತದಾದ್ಯಂತ ಜನಪ್ರಿಯತೆಯನ್ನು ಹೆಚ್ಚಿಸಿದೆ ಎಂದು ಅವರು ಹೇಳಿದರು. ಸತ್ಯ ಹೆಗ್ಡೆ ಈ ಚಿತ್ರದ ಛಾಯಾಗ್ರಹಣವನ್ನು ನಿರ್ವಹಿಸಿದ್ದಾರೆ.