'ಪೊಗರು' ಚಿತ್ರ ಏಕೆ ನಿಲ್ಲುತ್ತದೆ: ಧ್ರುವ ಸರ್ಜಾ ಪ್ರಶ್ನೆ?

ಬೆಂಗಳೂರು: ನಂದ ಕಿಶೋರ್ ನಿರ್ದೇಶಿಸಿ ಧ್ರುವ ಸರ್ಜಾ ಅಭಿನಯದ ಪೊಗರು ಚಿತ್ರ ಆರಂಭದಿಂದ ಹಲವು ವಿಷಯಗಳಿಗೆ ಸುದ್ದಿ ಮಾಡುತ್ತಲೇ ಬಂದಿದೆ.

ಮೊದಲಿಗೆ ನಟ ಧ್ರುವ ಸರ್ಜಾ ಏಪ್ರಿಲ್ ತಿಂಗಳಲ್ಲಿ  ಸುಮಾರು 30 ಕೆಜಿ ತೂಕ ಕಳೆದುಕೊಂಡಿದ್ದಾರೆ, ಸಿನಿಮಾದಲ್ಲಿ 12 ವರ್ಷದ ಬಾಲಕನ ಪಾತ್ರಕ್ಕಾಗಿ ಧ್ರುವ ಸುಮಾರು 30 ಕೆಜಿ  ತೂಕ ಕಳೆದುಕೊಂಡಿಗದ್ದರು. ಮತ್ತೆ ಅಷ್ಟು ತೂಕ ವಾಪಸ್ ಪಡೆದುಕೊಂಡು ಸಹಜ ಸ್ಥಿತಿಗೆ ಬರಲು ಧ್ರುವ ಸರ್ಜಾ ಸ್ವಲ್ಪ ಸಮಯ ತೆಗೆದುಕೊಂಡಿದ್ದಾರೆ, 

ಹೀಗಾಗಿ ಸಿನಿಮಾ ಧೀರ್ಘ ಸಮಯ ಹಿಡಿದಿದೆ. ಈಗ ಇಷ್ಟು ಸುದೀರ್ಘ ವಿಳಂಬದ ನಂತರ ಪೊಗರು ಸಿನಿಮಾ ಚಿತ್ರೀಕರಣ ಸ್ಥಗಿತಗೊಂಡಿದೆ ಎಂಬ ಮಾತುಗಳು ಕೇಳಿ ಬರುತ್ತಿವೆ,  ಇದಕ್ಕೆ ಪ್ರತಿಕ್ರಿಯಿಸಿರುವ  ಧ್ರುವ, ಪೊಗರು ಸಿನಿಮಾ ಏಕೆ ನಿಲ್ಲುತ್ತದೆ, ಪೊಗರು ಏಕೆ ಸ್ಥಗಿತಗೊಳ್ಳುತ್ತದೆ, ಏಕೆ ಇಂಥ ಸುಳ್ಳು ಸುದ್ದಿಗಳನ್ನು ಹಬ್ಬಿಸುತ್ತೀರಾ?  ಇದರಿಂದ ಚಿತ್ರ ತಂಡ ಯಾವ ರೀತಿಯ ಪರಿಸ್ಥಿತಿಗಳನ್ನು ಎದುರಿಸಬೇಕಾಗುತ್ತದೆ ಎಂಬ ಬಗ್ಗೆ ನಿಮಗೆ ಅರಿವಿಲ್ಲವೇ? ಚಿತ್ರ ನಿಲ್ಲುತ್ತದೆ ಎಂದಾದರೇ ಏಕೆ 30 ಕೆಜಿ ನಾನು ತೂಕ ಕಳೆದುಕೊಳ್ಳಬೇಕಿತ್ತು. ನಾನು ಮೌನವಾಗಿರುವುದೇ ಈ ಎಲ್ಲಾ  ಮಾತುಗಳಿಗೆ ಕಾರಣವಾಗಿದೆ ಎಂದು ಹೇಳಿದ್ದಾರೆ.

ಸಮಯ ವಿಳಂಭವಾಗಿದ್ದರ ಅರಿವು ನಮಗೂ ಇದೆ, ಆದರೆ ಅದರ ಹಿಂದಿನ ಕಾರಣ ತಿಳಿದುಕೊಳ್ಳಬೇಕು, ಕಳೆದು ಕೊಂಡಿದ್ದ 30 ಕೆಜಿ ತೂಕವನ್ನು ವಾಪಸ್ ಪಡೆಯಲು ನಾನು ಪ್ರಯತ್ನ ನಡೆಸುತ್ತಿದ್ದೇನೆ. ಅದು ಒಂದೋ ಎರಡೋ ಕೆಜಿಯಲ್ಲ, ಬದಲಿಗೆ 30 ಕೆಜಿ, ಹೀಗಾಗಿ ಸ್ವಲ್ಪ ಸಮಯ ತೆಗೆದುಕೊಳ್ಳುತ್ತದೆ, ಈ ಸಮಯದಲ್ಲಿ ಸಿನಿಮಾ ತಂಡ ಸ್ಕ್ರಿಪ್ಟ್ ಅನ್ನು ಮತ್ತಷ್ಟು ಉತ್ತಮಗೊಳಿಸಬಹುದು. ಪ್ರತಿಯೊಬ್ಬರು ಇಲ್ಲಿ ಅತಿ ಹೆಚ್ಚಿನ ಪ್ರಮಾಣದಲ್ಲಿ ಶ್ರಮ ಹಾಕುತ್ತಿದ್ದಾರೆ, ಆದರೆ ಎಲ್ಲಾ ಮಾಹಿತಿಗಳನ್ನು ನಾವು ಮುಕ್ತವಾಗಿ ಹೊರಗೆ ಚರ್ಚಿಸುತ್ತಿಲ್ಲ, ಅದರ ಅರ್ಥ ಸಿನಿಮಾ ನಿಂತಿದೆ ಎಂದಲ್ಲ ಎಂದು ವಿವರಣೆ ನೀಡಿದ್ದಾರೆ,

ನನ್ನ ಪ್ರತಿಯೊಂದು ಸಿನಿಮಾ ಶೂಟಿಂಗ್ ವೇಳೆ ಇದೇ ರೀತಿಯ ಸುಳ್ಳು ಸುದ್ದಿಗಳು ಕೇಳಿ ಬರುತ್ತಿವೆ.ನನ್ನ ಮೊದಲ ಚಿತ್ರ ಅದ್ದೂರಿ ಶೂಟಿಂಗ್ ವೇಳೆಯೂ ಇದೇ ಮಾತು ಕೇಳಿ ಬಂದಿತ್ತು., ನಂತರ ಬಹದ್ದೂರ್,  ಇಂಥ ಸುಳ್ಳು ಸುದ್ದಿಗಳು ನನ್ನ ಪಾಲಿಗೆ ವರವಾಗುತ್ತಿರುವುದು ನನ್ನ ಅದೃಷ್ಟ ಎಂದು ಹೇಳಿದ್ದಾರೆ.