ನಟಿ ಸನ್ನಿಲಿಯೋನ್ ಇದ್ದ ವಿಮಾನ ಸ್ವಲ್ಪದರಲ್ಲೇ ಅಪಘಾತದಿಂದ ಪಾರು

ನವದೆಹಲಿ: ಖಾಸಗಿ ವಿಮಾನವೊಂದರಲ್ಲಿ ಪ್ರಯಾಣ ಮಾಡುತ್ತಿದ್ದ ಬಾಲಿವುಡ್ ನಟಿ ಸನ್ನಿಲಿಯೋನ್ ಮತ್ತು ಆಕೆಯ ಪತಿ ಡೇನಿಯಲ್ ವೆಬರ್ ಅವರು ಸ್ವಲ್ಪದರಲ್ಲಿಯೇ ಅಪಘಾತವೊಂದರಿಂದ ಪಾರಾಗಿದ್ದಾರೆ. 

ಖಾಸಗಿ ವಿಮಾನವೊಂದರಲ್ಲಿ ಮುಂಬೈಗೆ ತೆರಳುತ್ತಿದ್ದ ವೇಳೆ ಪ್ರತಿಕೂಲ ಹವಾಮಾನದಿಂದಾಗಿ ಸನ್ನಿಲಿಯೋನ್ ಅವರಿದ್ದ ವಿಮಾನ ಪತನಗೊಳ್ಳುವ ಭೀತಿ ಎದುರಾಗಿತ್ತು. 

ವಿಮಾನ ಪೈಲಟ್ ಮುಂಜಾಗ್ರತೆವಹಿಸಿ ಸಂಭವನೀಯ ಅವಘಡವನ್ನು ತಪ್ಪಿಸಿದ್ದಾರೆ. ಮಹಾರಾಷ್ಟ್ರದ ದುರ್ಗಮ ಪ್ರದೇಶವೊಂದರಲ್ಲಿ ವಿಮಾನ ತುರ್ತು ಭೂ ಸ್ಪರ್ಶ ಮಾಡಿದೆ. ಇಬ್ಬರೂ ಅಪಾಯದಿಂದ ಪಾರಾಗಿದ್ದು ರಸ್ತೆ ಮಾರ್ಗದ ಮೂಲಕ ಮುಂಬೈಗೆ ಪ್ರಯಾಣ ಬೆಳೆಸಿದ್ದಾರೆ. 

ತಮಗೆ ಎದುರಾದ ಅಪಾಯದ ಕುರಿತಂತೆ ಸಾಮಾಜಿಕ ಜಾಲತಾಣ ಟ್ವಿಟ್ಟರ್ ನಲ್ಲಿ ಹೇಳಿಕೆ ನೀಡಿರುವ ಸನ್ನಿಲಿಯೋನ್ ಅವರು, ಹವಾಮಾನ ವೈಪರೀತ್ಯದಿಂದಾಗಿ ಮಹಾರಾಷ್ಟ್ರದ ಬಳಿ ನಾವು ಪ್ರಯಾಣ ಮಾಡುತ್ತಿದ್ದ ವಿಮಾನ ಅಪಘಾತಕ್ಕೀಡಾಗುತ್ತಿತ್ತು. ಸ್ವಲ್ಪದರಲ್ಲಿಯೇ ಅಪಾಯದಿಂದ ಪಾರಾಗಿದ್ದೇವೆ. ದೇವರ ದಯೆಯಿಂದ ಜೀವಂತವಾಗಿದ್ದೇವೆ. ವಿಮಾನದಲ್ಲಿ ನನ್ನೊಂದಿಗೆ ನನ್ನ ಪತಿ ಡೇನಿಯರ್ ವೆಬರ್ ಕೂಡ ಇದ್ದರು. ವಿಮಾನದಲ್ಲಿದ್ದ ಪ್ರತಿಯೊಬ್ಬರೂ ಸಾಕಷ್ಟು ಭಯಭೀತರಾಗಿದ್ದರು. ಇದೀಗ ಎಲ್ಲರೂ ಸುರಕ್ಷಿತರಾಗಿದ್ದು, ಮನೆಗಳಿಗೆ ತೆರಳುತ್ತಿದ್ದೇವೆ. ಪೈಲಟ್ ಗಳ ಕಾರ್ಯವನ್ನು ಶ್ಲಾಘಿಸಲೇಬೇಕು. ಎಲ್ಲರ ಪ್ರಾಣವನ್ನು ಕಾಪಾಡಿದ್ದಾರೆಂದು ಹೇಳಿದ್ದಾರೆ.