'ಪುಷ್ಪಕ ವಿಮಾನ'ದ ಮೂಲಕ ಕನ್ನಡ ಚಿತ್ರೋದ್ಯಮಕ್ಕೆ ಮರಳಿದ ಜೂಹಿ ಚಾವ್ಲಾ

ಬೆಂಗಳೂರು: ರವಿಚಂದ್ರನ್ ಅವರ 'ಪ್ರೇಮಲೋಕ' ಕನ್ನಡ ಸಿನೆಮಾ ಮೂಲಕ ಚಿತ್ರರಂಗಕ್ಕೆ ಕಾಲಿಟ್ಟಿದ್ದ ಬಾಲಿವುಡ್ ನಟಿ ಜೂಹಿ ಚಾವ್ಲಾ ಈಗ 'ಪುಷ್ಪಕ ವಿಮಾನ' ಸಿನೆಮಾದ ಮೂಲಕ ಮತ್ತೆ ಕನ್ನಡ ಚಿತ್ರೋದ್ಯಮಕ್ಕೆ ಮರಳಿದ್ದಾರೆ.

ಏಪ್ರಿಲ್ ೪ ರಿಂದ ೬ ರವರೆಗೆ ಜೂಹಿ ಬೆಂಗಳೂರಿನಲ್ಲಿ ಚಿತ್ರೀಕರಣದಲ್ಲಿ ಪಾಲ್ಗೊಳ್ಳಲಿದ್ದು, ಅದರಲ್ಲಿ ಒಂದು ವಿಶೇಷ ಹಾಡಿನ ಚಿತ್ರೀಕರಣವೂ ಸೇರಿದೆಯಂತೆ. 'ಪುಷ್ಪಕ ವಿಮಾನ'ದ ನಿರ್ಮಾಪಕರಲ್ಲಿ ಒಬ್ಬರಾದ ವಿಖ್ಯಾತ್ ಈ ವಿಷಯ ಧೃಢೀಕರಿಸಿದ್ದು, "ಸೆಟ್ ಏರಿಸಲು ವಿಶಾಲವಾದ ಪ್ರದೇಶವನ್ನು ಹುಡುಕುತ್ತಿದ್ದೇವೆ. ಬಾಲಿವುಡ್ ನಟಿಯ ಜೊತೆಗೆ ಈ ವಿಶೇಷ ಹಾಡಿನ ಚಿತ್ರೀಕರಣ ನಡೆಯಲಿದೆ. ಅವರ ಜೊತೆ ೮೦ ಜನ ಕಿರಿಯ ನೃತ್ಯಗಾರ್ತಿಯರು ಪಾಲ್ಗೊಳ್ಳಲಿದ್ದಾರೆ" ಎಂದು ವಿವರಿಸುತ್ತಾರೆ.

ಎಸ್ ರವಿಂದ್ರನಾಥ್ ಚೊಚ್ಚಲ ಬಾರಿಗೆ ಆಕ್ಷನ್ ಕಟ್ ಹೇಳುತ್ತಿರುವ ಈ ಸಿನೆಮಾದಲ್ಲಿ ರಮೇಶ್ ಅರವಿಂದ್, ರಚಿತಾ ರಾಮ್ ಮತ್ತು ಬಾಲನಟಿ ಯುವಿನಾ ಪಾರ್ಥಿವ ನಟಿಸುತ್ತಿದ್ದಾರೆ. ಗುರುಪ್ರಸಾದ್ ಸಿನೆಮಾಗೆ ಸಂಭಾಷಣೆ ಬರೆದಿದ್ದು, ಭುವನ್ ಗೌಡ ಅವರದ್ದು ಸಿನೆಮ್ಯಾಟೋಗ್ರಫಿ ಮತ್ತು ಚರಣ್ ರಾಜ್ ಸಂಗೀತ ಇದೆ.